2 Jılnama 33 bob
1 Menashshe on eki jasında patsha boldı ha'm Erusalimde eliw bes jıl patshalıq etti.
2 Ol Jaratqan İyenin' İzrail xalqının' aldınan quwıp jibergen xalıqlardın' jerkenishli jaman islerine eliklep, Jaratqan İyenin' na'zerinde jaman bolg'an islerdi isledi.
3 A'kesi Xizkiya qıyratıp taslag'an sıyınıw orınların qayta tikledi, Baallarg'a arnap qurbanlıq orınlar qurdı, kiyeli ag'ashların ornattı ha'm pu'tkil aspan denelerine tabınıp, olarg'a xızmet etti.
4 Menashshe Jaratqan İyenin' İbadatxanasına, yag'nıy Jaratqan İyenin': «Atım ma'n'gige Erusalimde boladı», – degen İbadatxanasına basqa qudaylarg'a arnap, qurbanlıq orınlar qurdırdı.
5 Ol Jaratqan İyenin' İbadatxanasının' eki ha'wlisine de barlıq aspan denelerine arnap qurbanlıq orınlar qurdı.
6 Ol Ben-Hinnom oypatlıg'ında o'z ulın otta jandırıp qurbanlıqqa berdi, pal ashtı, belgilerdi jorıdı, duwaxanlıq qıldı, a'rwaq ha'm ruwxlardı shaqırıwshılarg'a ma'sla'ha't saldı. Ol Jaratqan İyenin' na'zerinde jaman bolg'an islerdi ko'p islep, Onı g'a'zeplendirdi.
7 Menashshe o'zi isletken oyma buttı Qudaydın' İbadatxanasına qoydı. Quday Dawıtqa ha'm onın' ulı Sulaymang'a: «Bul İbadatxanada ha'm İzrail urıwları arasınan tan'lap alg'an qalam Erusalimde atımdı ma'n'gige ornataman.
8 Eger olar Muwsa arqalı bergen barlıq Nızam, qag'ıyda ha'm pa'rmanlarıma baylanıslı buyrıqlarımdı muqıyatlı tu'rde orınlap jasasa, onda İzrail xalqın o'zlerinin' atababalarına belgilep bergen jerden qaytadan quwıp shıg'armayman», – degen edi.
9 Biraq Menashshe Yahuda xalqın ha'm Erusalim turg'ınların joldan azg'ırg'anı sonshelli, İzrail xalqı o'zinin' aldınan Jaratqan İye joq qılg'an xalıqlarınan da ko'birek jamanlıqlar isledi.
10 Jaratqan İye Menashshege ha'm onın' xalqına eskertse de, olar qulaq salmadı.
11 onlıqtan Jaratqan İye olarg'a Assiriya patshasının' a'skerbasıların jiberdi. Olar Menashsheni tutqıng'a aldı, murnına halqa o'tkerip, qola kisen menen kisenledi ha'm onı Babilong'a alıp ketti.
12 Ol azap shegip atırıp, Qudayı Jaratqan İyege jalbarındı ha'm ata-babalarının' Qudayı aldında shın ju'rekten bas iydi.
13 Ol duwa etti, Jaratqan İye de onın' duwasın qabıl etip, jalbarınıwın esitti. Onı ja'ne Erusalimge, o'z taxtına qaytardı. Sonda Menashshe Jaratqan İyenin' haqıyqattan da Quday ekenin bildi.
14 Bunnan keyin, Menashshe Dawıttın' qalasının' sırtqı diywalın burıng'ıdan da biyik etip qayta qurdı. Bul diywal oypatlıqtag'ı Gixon bulag'ının' batısınan Ofel to'besin aynala o'tip, Balıq da'rwazasının' kireberisine shekem sozıldı. Patsha Yahudanın' qorg'anlı qalalarının' ha'mmesine a'skerbasılar tayınladı.
15 Menashshe Jaratqan İyenin' İbadatxanasınan basqa jerlerdin' qudaylarının' mu'sinlerin, o'zi qoydırg'an butlardı, İbadatxana jaylasqan tawdag'ı ha'm Erusalimdegi barlıq qurbanlıq orınlardı aldırıp, olardı qaladan shıg'arıp tasladı.
16 Menashshe Jaratqan İyenin' İbadatxanasınan basqa jerlerdin' qudaylarının' mu'sinlerin, o'zi qoydırg'an butlardı, İbadatxana jaylasqan tawdag'ı ha'm Erusalimdegi barlıq qurbanlıq orınlardı aldırıp, olardı qaladan shıg'arıp tasladı.
17 Degen menen, xalıq sıyınıw orınlarında qurbanlıq beriwin dawam etti. Biraq olar bergen qurbanlıqların Qudayı Jaratqan İyege arnaytug'ın edi.
18 Menashshenin' basqa isleri, Qudayına arnalg'an duwası ha'm İzraildın' Qudayı Jaratqan İyenin' atınan og'an aytılg'an wa'liydin' so'zleri İzrail patshalarının' jılnama kitabında jazılg'an.
19 Onın' duwası, Qudaydın' og'an rehim etiwi, barlıq gu'naları, opasızlıg'ı, sıyınıw orınlarına qurg'ızg'an butxanalarının' orınları, kiyeli ag'ashları, tabıng'an butları haqqında barlıg'ı Ko'zi ashıqlardın' jılnama kitabında jazılg'an.
20 Menashshe o'lip, ata-babalarına qosılg'anda, o'z sarayına jerlendi. Onın' ornına ulı Amon patsha boldı.
21 Amon jigirma eki jasında patsha bolıp, Erusalimde eki jıl patshalıq etti.
22 Amon da a'kesi Menashshege uqsap, Jaratqan İyenin' na'zerinde jaman bolg'an islerdi isledi. Ol a'kesi soqtırg'an barlıq butlarg'a qurbanlıq berip, olarg'a xızmet etti.
23 Amon a'kesi Menashshege uqsap, Jaratqan İyege qayta ju'z burmadı, kerisinshe, gu'na islewdi arttıra berdi.
24 Amonnın' xızmetshileri og'an qarsı til biriktirip, onı o'z sarayında o'ltirdi.
25 Biraq u'lke xalqı patsha Among'a qarsı til biriktirgenlerdin' ha'mmesin o'ltirdi ha'm onın' ornına ulı İoshiyanı patsha etip qoydı.
