2 Jılnama 36 bob
1 Yahuda xalqı a'kesi İoshiyanın' ornına ulı Ehoaxazdı Erusalimde patsha etip qoydı.
2 Ehoaxaz jigirma u'sh jasında patsha bolıp, Erusalimde u'sh ay patshalıq etti.
3 Mısır patshası Nexo onı Erusalimde taxttan tu'sirip, Yahuda eline ju'z talant gu'mis ha'm bir talant altın salıq saldı.
4 Mısır patshası Nexo Yahuda ha'm Erusalim taxtına Ehoaxazdın' a'jag'ası Elyakimdi otırg'ızdı ha'm atın o'zgertip, Ehoyakim dep qoydı. Al Ehoaxazdı bolsa, Mısırg'a alıp ketti.
5 Ehoyakim jigirma bes jasında patsha bolıp, Erusalimde on bir jıl patshalıq etti. Ol Qudayı Jaratqan İyenin' na'zerinde jaman bolg'an islerdi isledi.
6 Babilon patshası Nabuxodonosor Ehoyakimge hu'jim jasadı ha'm onı qola kisenler menen kisenlep, Babilong'a alıp ketti.
7 Ol Jaratqan İyenin' İbadatxanasındag'ı bir qansha buyımlardı alıp ketip, Babilondag'ı o'zinin' butxanasına qoydı.
8 Ehoyakimnin' basqa isleri, ol islegen jerkenishli isler ha'm onın' basına tu'sken barlıq isler haqqında İzrail ha'm Yahuda patshalarının' jılnama kitabında jazılg'an. Onın' ornına ulı Ehoyakin patsha boldı.
9 Ehoyakin segiz jasında patsha bolıp, Erusalimde u'sh ay on ku'n patshalıq etti. Ol da Jaratqan İyenin' na'zerinde jaman bolg'an islerdi isledi.
10 Erte ba'ha'rde patsha Nabuxodonosor adam jiberip, onı Babilong'a aldırttı. Kelgenler onın' menen birge Jaratqan İyenin' İbadatxanasındag'ı qımbatbaha buyımlardı da alıp ketti. Ehoyakinnin' ornına Ehoyakinnin' a'kesinin' inisi Sedekiyanı Yahuda ha'm Erusalimge patsha etip qoydı.
11 Sedekiya jigirma bir jasında patsha bolıp, Erusalimde on bir jıl patshalıq etti.
12 Sedekiya da Qudayı Jaratqan İyenin' na'zerinde jaman bolg'an islerdi isledi. Jaratqan İyenin' so'zin xabarlag'an Eremiya payg'ambar aldında boysınıwshılıq bildirmedi.
13 Sedekiya Qudaydın' atı menen o'zine ant ishtirgen patsha Nabuxodonosorg'a qarsı bas ko'terdi. Ol qaysarlıq penen qasarısıp, İzraildın' Qudayı Jaratqan İyege ju'z burmadı.
14 Bunın' u'stine, ruwxaniylerdin' ha'm xalıqtın' barlıq basshıları da barg'an sayın basqa xalıqlardın' jerkenishli islerine eliklep, opasızlıq qıldı ha'm Jaratqan İyenin' muxaddes qılg'an Erusalimdegi İbadatxanasın da haramladı.
15 Ata-babalarının' Qudayı Jaratqan İye O'z xalqı ha'm O'z ma'kanına janı ashıp, O'z xabarshıları arqalı olarg'a qayta-qayta eskertti.
16 Biraq olar Qudaydın' xabarshıların mazaq qılıp, Onın' so'zlerin pisent etpedi ha'm Onın' payg'ambarlarının' u'stinen ku'ldi. Aqırında, Jaratqan İyenin' O'z xalqına g'a'zeplengeni sonshelli, endi qutqarılıwdın' sharası joq edi.
17 Quday kaldeylerdin' patshasın olarg'a qarsı atlandırdı. Qaldeylerdin' patshası olardın' jasların Muxaddes orında qılıshtan o'tkerdi, jastı da, qız balanı da, g'arrını da, aq shashlını da ayamadı. Jaratqan İye olardın' ha'mmesin Nabuxodonosordın' qolına berdi.
18 Ol Qudaydın' İbadatxanasındag'ı u'lken-kishi buyımlardın' ha'mmesin, Jaratqan İyenin' İbadatxanasının' qaznaların, patshanın' ha'm onın' wa'zirlerinin' qaznaların Babilong'a alıp ketti.
19 l Qudaydın' İbadatxanasına ot qoydı, Erusalimnin' diywalın qulattı, ondag'ı barlıq a'hmiyetli imaratlardı jag'ıp jiberip, ondag'ı qımbatbaha na'rselerdin' ha'mmesin joq qıldı.
20 Al qılıshtan aman qalg'anlardı bolsa, Babilong'a su'rgin qıldı. Olar Persiya patshalıg'ı ku'sheygenge shekem, Babilon patshasının' ha'm onın' ullarının' qulları boldı.
21 Solay etip, Jaratqan İyenin' Eremiya payg'ambar arqalı aytqan mına so'zleri orınlandı: «Jer jetpis jıl bos qalıp, Shabbat dem alısların o'temegenshe dem aladı».
22 Persiya patshası Kirdin' patshalıg'ının' birinshi jılında* Jaratqan İye O'zinin' Eremiya payg'ambar arqalı aytqan so'zin a'melge asırıw ushın, Persiya patshası Kirdin' ju'regine tu'rtki saldı. Sonda patsha Kir mınaday pa'rman shıg'arıp, onı pu'tkil patshalıg'ı boylap ja'riyalawdı ha'm jazba tu'rde taratıwdı buyırdı:
23 «Persiya patshası Kir bılay deydi: „Aspannın' Qudayı Jaratqan İye jer ju'zindegi barlıq patshalıqlardı mag'an berdi ha'm Yahudanın' Erusalim qalasına O'zi ushın bir İbadatxana qurıwdı mag'an tapsırdı. Aran'ızdag'ı Onın' xalqınan bolg'an ha'r bir adam Erusalimge barsın. Qudayı Jaratqan İye og'an yar bolsın!“»
