Ezra 3 bob
1 İzraillılar o'z qalalarına jaylasıp bolg'annan son', jetinshi ayda* olardın' ha'mmesi bir adamday Erusalimge jıynaldı.
2 Qudaydın' adamı bolg'an Muwsanın' Nızam kitabındag'ı jazıwlarg'a muwapıq, qurbanlıq orın u'stinde jandırılatug'ın qurbanlıqlar usınıw ushın, İosadaq ulı Eshua ha'm onın' ruwxaniy ag'ayinleri, Shealtiel ulı Zerubbabel ha'm onın' tuwısqanları İzraildın' Qudayına arnap qurbanlıq orın qurıwg'a kiristi.
3 Olar a'tiraptag'ı xalıqlardan qorqsa da, qurbanlıq orındı onın' burıng'ı tiykarı u'stine qurıp, onda azanda ha'm keshte Jaratqan İyege arnap jandırılatug'ın qurbanlıqlar berdi.
4 Son'ınan Nızamda jazılg'ang'a go're, Qos bayramın nıshanladı ha'm qag'ıyda boyınsha ha'r ku'n ushın belgilengen mug'darda jandırılatug'ın qurbanlıqlar berdi.
5 Bunnan son', ku'ndelikli jandırılatug'ın qurbanlıqlardı, Jan'a ay bayramında* ha'm Jaratqan İye belgilegen barlıq muxaddes bayramlarda beriletug'ın qurbanlıqlardı, Jaratqan İyege arnap ıqtıyarlı sadaqalardı usındı.
6 Jetinshi aydın' birinshi ku'ninen baslap, olar Jaratqan İyege arnap jandırılatug'ın qurbanlıqlar beriwdi baslag'an edi. Biraq ele Jaratqan İyenin' İbadatxanasının' tiykarı salınbag'an edi.
7 İzraillılar tas qashawshılarg'a ha'm ustalarg'a gu'mis ten'ge, Lebanonnan Yafo jag'ısına ten'iz jolı arqalı kedr ag'ashların alıp keliwi ushın sidonlılar menen tirlilerge azıq-awqat, ishimlik ha'm za'ytu'n mayın berdi. Bularg'a Persiya patshası Kir ruxsat bergen edi.
8 Erusalimge, Qudaydın' İbadatxanası bolg'an jerge kelgennen son', ekinshi jıldın' ekinshi ayında Shealtiel ulı Zerubbabel, İosadaq ulı Eshua, basqa ruwxaniyler, lebiyliler ha'm su'rginnen Erusalimge qaytqanlardın' ha'mmesi isti basladı. Jigirma ha'm onnan joqarı jasta bolg'an lebiyliler Jaratqan İyenin' İbadatxanasındag'ı islerdi qadag'alaw ushın qoyıldı.
9 Qudaydın' İbadatxanasındag'ı jumısshılardı Eshua, onın' ulları ha'm ag'ayinleri, Qadmiel ha'm onın' ulları, Hodawiyanın' pu'tkil urpaqları qadag'alap turdı. Olar bul xızmetti atqarıwda Xenadad urpag'ınan bolg'an lebiylilerden ja'rdem aldı.
10 Qurılısshılar Jaratqan İyenin' İbadatxanasının' tiykarın salıp bolg'anda, ruwxaniyler arnawlı kiyimlerin kiyip, qollarına ka'rnayların aldı. Asaf urpaqlarınan bolg'an lebiyliler de kimbalların alıp, İzrail patshası Dawıt belgilegen qag'ıydag'a muwapıq, Jaratqan İyege alg'ıs-maqtaw aytıw ushın o'z orınların iyeledi.
11 Olar gezekpe-gezek: «Jaratqan İye iygilikli, Onın' İzrailg'a bolg'an sadıqlıg'ı ma'n'gilik», – dep Jaratqan İyege alg'ıs-maqtaw ha'm ta'riyiplew qosıqların ayttı. Jaratqan İyenin' İbadatxanasının' tiykarının' salıng'anı ushın, pu'tkil xalıq qattı dawıs penen Jaratqan İyege alg'ıs-maqtaw ayta basladı.
12 Ko'pshilik quwanıshtan qıshqırg'an bolsa da, Jaratqan İyenin' burıng'ı İbadatxanasın ko'rgen ko'plegen jası u'lken ruwxaniyler, lebiyliler ha'm urpaq basshıları bul İbadatxananın' tiykarının' salıng'anın ko'rgende o'kirip jıladı.
13 Xalıq qattı shuwlasıp baqırısqanlıqtan, quwanısh seslerinen jılag'anlardın' dawısların ajıratıw mu'mkin emes edi. Shawqım uzaqtan esitilip turg'an edi.
