1 Sol arada payg'ambar Xaggay menen payg'ambar İddo ulı Zexariya Yahuda ha'm Erusalimde jasaytug'ın yahudiylerge olardın' u'stinen biylik etken İzraildın' Qudayının' atı menen payg'ambarshılıq etti.
2 Sonda Shealtiel ulı Zerubbabel ha'm İosadaq ulı Eshua Qudaydın' Erusalimdegi İbadatxanasın qayta qurıwdı basladı. Qudaydın' payg'ambarları da olar menen birge bolıp, olarg'a ja'rdem berdi.
3 Sol waqıtta Evfrattın' arg'ı ta'repindegi u'lkenin' ha'kimi Tattenay, Shetar-Boznay ha'm olardın' joldasları yahudiylerge kelip: «Mına İbadatxananı qurıp, bul qurılıstı qayta tiklewge sizlerge kim ruxsat berdi?» – dep soradı.
4 Olar bul qurılıstı alıp barıp atırg'an adamlardın' atların da soradı.
5 Biraq Quday yahudiy aqsaqallarına na'zerin salg'an edi. Persiya ha'meldarları bul is tuwralı Dariyge bir xat jibergen bolıp, sol xatqa juwap kelmegenshe, yahudiylerdi toqtatpadı.
6 Da'ryanın' arg'ı ta'repindegi u'lkenin' ha'kimi Tattenay, ShetarBoznay, olardın' joldasları, yag'nıy sol u'lkenin' ha'meldarları patsha Dariyge xat jazıp, nusqasın jiberdi.
7 Olar patsha Dariyge jollag'an xatta bılay dep jazılg'an edi: «Patsha Dariyge tınıshlıq tileymiz!
8 Patshag'a mınalardı bildirmekshimiz: bizler Yahuda wa'layatına, ullı Qudaydın' İbadatxanasına bardıq. Ol u'lken taslardan qurılıp, diywallarına ag'ashlar qosıp qalanıp atır. Bul jumıs jedel pa't alg'an bolıp, olardın' qollarında tabıslı ketip atır.
9 Bizler sol jerdegi aqsaqallar menen so'ylesip, olardan: „Mına İbadatxananı qurıp, bul qurılıstı qayta tiklewge sizlerge kim ruxsat berdi?“ – dep soradıq.
10 Bunın' u'stine, sizge mag'lıwmat retinde jazıp jiberiw ushın olardın' basshılarının' atların da soradıq.
11 Olar bizlerge bılay dep juwap berdi: „Bizler aspan ha'm jerdin' Qudayının' qullarımız. Bizler ko'p jıllar burın qurılg'an Qudaydın' İbadatxanasın qayta tiklep atırmız. Bul İbadatxana İzraildın' bir ullı patshası ta'repinen qurıp pitkerilgen edi.
12 Biraq ata-babalarımız aspannın' Qudayın g'a'zeplendirgeni ushın, Quday olardı Babilon patshası kaldeyli Nabuxodonosorg'a ta'slim etti. Ol bul İbadatxananı wayran etip, xalıqtı Babilong'a su'rgin qıldı.
13 Degen menen, Babilon patshası Kir o'z hu'kimdarlıg'ının' birinshi jılında usı Qudaydın' İbadatxanası qayta tiklensin dep, pa'rman shıg'ardı.
14 Nabuxodonosor Qudaydın' Erusalimdegi İbadatxanasınan altın ha'm gu'mis ıdıslardı alıp ketip, Babilondag'ı ibadatxanag'a aparıp qoyg'an edi. Patsha Kir Babilondag'ı ibadatxanadan sol ıdıslardı aldırıp, o'zi ha'kim etip tayınlag'an Sheshbassar degen adamg'a qaytarıp berdi.
15 Patsha Kir Sheshbassarg'a: „Bul ıdıslardı aparıp, Erusalimdegi İbadatxanag'a qoy. Al Qudaydın' İbadatxanası o'z ornına qayta qurılsın“, – dedi.
16 Solay etip, Sheshbassar kelip, Qudaydın' Erusalimdegi İbadatxanasının' tiykarın qoydı. Sonnan beri qurılıs dawam etpekte, ele tamamlanbadı“.
17 Eger patshag'a maqul bolsa, Babilon sarayındag'ı arxiv tekserilip, patsha Kirdin' Qudaydın' Erusalimdegi İbadatxanasın qurıwg'a ruxsat bergeni yamasa bermegeni anıqlansın. Son'ınan patsha o'z qararın bizlerge jazıp jibersin».
