Ester 4 bob
1 Mordoxay bolg'an islerdin' ha'mmesinen xabar tapqanda kiyimlerin jırtıp, aza kiyimin kiydi ha'm basına ku'l shashıp, dad salıp baqırıp jılawı menen qala ortasına keldi.
2 Ol barıp, saray da'rwazasının' aldında turdı, o'ytkeni aza kiyimindegi hesh bir adamdı sarayg'a kirgizbeytug'ın edi.
3 Sonday-aq patshanın' buyrıg'ı ha'm pa'rmanı jetip barg'an ha'r bir wa'layatta yahudiyler ullı qayg'ıg'a batıp, oraza tuttı ha'm dad salıp jılastı. Ko'pshiligi aza kiyimin kiyip, ku'ldin' u'stinde jattı.
4 Xanbiyke Esterdin' qa'nizekleri ha'm aqtaları kelip, Mordoxay tuwralı xabar bergende, Ester qattı tınıshsızlandı. U'stindegi aza kiyimlerin sheship, mınalardı kiyip alsın dep, ol Mordoxayg'a kiyimler jiberdi. Biraq Mordoxay olardı qabıl etpedi.
5 Ester o'zine patsha ta'repinen xızmetshi etip tayınlang'an Hatax degen aqtasın shaqırtıp alıp, og'an Mordoxayg'a ne bolg'anın bilip keliwdi buyırdı.
6 Hatax patsha sarayının' da'rwazası aldındag'ı ashıq maydang'a, Mordoxaydın' janına ketti.
7 Mordoxay og'an basına tu'sken ha'mme na'rseni ha'm Hamannın' yahudiylerdi qırıp taslaw ushın patsha qaznasına qansha gu'mis beriwdi wa'de etkenin de aytıp berdi.
8 Keyin Mordoxay yahudiylerdi qırıp taslaw haqqında Suzada ja'riyalang'an pa'rmannın' bir ko'shirmesin Hataxqa berip: «Esterge mınanı ko'rsetip, og'an ha'mmesin tu'sindir. Ester patshag'a barsın ha'm onnan o'z xalqına rehim etiwdi jalbarınıp sorasın», – dep tapsırdı.
9 Hatax qaytıp kelip, Mordoxaydın' aytqanların Esterge jetkizdi.
10 Ester Hataxtı Mordoxayg'a ja'ne jiberip, mına so'zlerdi jetkiziwdi buyırdı:
11 «Saraydın' ishki ha'wlisine, patshanın' aldına shaqırılmastan kirgen ha'r bir adamdı, onın' erkek yamasa hayal bolıwına qaramastan, tek bir jaza, yag'nıy o'lim jazası ku'tedi. Bul haqqında patshanın' ha'mme xızmetshileri de, onın' qol astındag'ı wa'layatlardın' xalıqları da biledi. Tek patsha kimge o'zinin' altın hasasın sozsa, sol adam g'ana tiri qaladı. Men de patshanın' aldına otız ku'nnen beri shaqırılg'an joqpan».
12 Hatax Esterdin' bul so'zlerin Mordoxayg'a jetkizgende,
13 Mordoxay Esterge mına juwaptı qaytardı: «Sarayda jasag'anım ushın pu'tkil yahudiyler ishinde jalg'ız o'zim aman qalaman, dep oylama.
14 Eger sen ha'zir u'ndemey qalsan', yahudiylerge ja'rdem ha'm qutqarılıw basqa jaqtan keledi. Al sen ha'm senin' a'ken'nin' u'y-ishi nabıt bolasızlar. Kim biledi, ba'lkim, usınday ku'nler ushın sen xanbiyke bolıw ma'rtebesine erisken shıg'arsan'».
15 Ester de Mordoxayg'a mına juwaptı qaytardı:
16 «Barıp, Suzadag'ı barlıq yahudiylerdi jıynap, men ushın oraza tutın'lar. U'sh ku'n ha'm u'sh tu'n hesh na'rse iship-jemen'ler. Men de o'z qa'nizeklerim menen sizler sıyaqlı oraza tutaman, son'ınan bul nızamg'a qarsı bolsa da, patshanın' aldına baraman. Eger men o'liwge tiyisli bolsam, o'lemen».
17 Solay etip, Mordoxay sol jerden ketip, Esterdin' o'zine buyırg'anlarının' ha'mmesin orınladı.
