Ester 6 bob
1 Sol tu'ni patsha Axashweroshtın' uyqısı qashtı. Ol jılnama kitabın a'keliwdi buyırdı ha'm kitap patshag'a oqıp berildi.
2 Onnan da'rwaza saqshıları bolg'an Bigtan ha'm Teresh degen eki aqtanın' patsha Axashweroshtı o'ltiriwdi rejelestirgeni, bunı Mordoxaydın' bilip qalg'anı ha'm xabarlag'anı tuwralı jazılg'an so'zler tabıldı.
3 Patsha: – Bul isi ushın Mordoxayg'a qanday hu'rmet-izzet ko'rsetildi? – dep soradı. Patshanın' arnawlı xızmetshileri: – Og'an hesh na'rse de islenbedi, – dep juwap berdi.
4 Sonda patsha: – Ha'wlide kim bar? – dep soradı. Tayarlatıp qoyg'an darına Mordoxaydı astırıwdı patshadan soraw ushın, Haman tap sol waqıtta saraydın' sırtqı ha'wlisine kelgen edi.
5 Xızmetshileri patshag'a: – Ha'wlide Haman ku'tip turıptı, – dep juwap berdi. – İshke kirsin, – dedi patsha.
6 Haman ishke kirgende, patsha onnan: – Patsha hu'rmet ko'rsetkisi kelgen adamına ne islewi kerek? – dep soradı. Haman ishinen: «Patsha mennen basqa kimge hu'rmet ko'rsetiwdi qa'ler edi», – dep oylap,
7 patshag'a bılay dedi: – Patsha hu'rmet ko'rsetkisi kelgen adamg'a.
8 patsha kiygen patshalıq kiyim menen patsha mingen at a'kelinsin ha'm attın' basına patshalıq taj kiydirilsin.
9 Kiyim de, at ta patshanın' en' abıraylı wa'zirlerinin' birine berilsin. Ol adam patsha hu'rmet ko'rsetkisi kelgen adamg'a sol kiyimlerdi kiygizip, sol atqa mindirip, onı qala maydanı boylap aylandırsın. Onın' aldında ju'rip: «Mine, patsha kimge hu'rmet ko'rsetkisi kelse, og'an usılay isleydi», – dep jar salsın, – dedi.
10 Sonda patsha Hamang'a: – Tez bar da, kiyimler menen attı alıp kel ha'm saray xızmetshisi yahudiy Mordoxayg'a o'zin'nin' aytqanların'dı isle. Aytqanların'nın' birewi de qalıp qoymasın, – dedi.
11 Solay etip, Haman kiyimlerdi ha'm attı alıp keldi. Keyin Mordoxaydı kiyindirip, onı atqa mindirdi de, qala maydanı boylap alıp ju'rdi ha'm onın' aldında: «Mine, patsha kimge hu'rmet ko'rsetkisi kelse, og'an usılay isleydi», – dep jar saldı.
12 Son'ınan Mordoxay sarayg'a qaytıp keldi. Haman bolsa, shermendelikten ju'zin jawıp, asıg'ıs u'yine qayttı.
13 Haman hayalı Zereshke ha'm ha'mme doslarına ju'z bergen barlıq waqıyalar tuwralı aytıp berdi. Sonda hayalı Zeresh ha'm ken'esshileri og'an: «Senin' ma'rteben' Mordoxay aldında to'men tu'se baslag'an eken, eger ol yahudiy bolsa, onda sen onı jen'e almaysan', kerisinshe, onın' aldında jıg'ılatug'ının' gu'mansız», – dedi.
14 Olar ele so'ylesip otırg'anda, patshanın' aqtaları kelip, Hamandı Ester tayarlag'an zıyapatqa asıg'ıs alıp ketti.
