1 O'mirden toydım! Endi arzımdı erkin aytaman, İshimdegi ashshı da'rt penen so'yleymen.
2 Men Qudayg'a bılay deymen: «Meni ayıplama. Meni ne ushın ayıplap atırg'anın'dı ayt.
3 Yamasa meni eziw, Yag'nıy O'z qolların' jaratqannan bas tartıw, Zalımlardın' niyetlerin qollaw Sag'an unay ma?
4 Senin' ko'zlerin' insannın' ko'zlerindey me? Yamasa Sen de olar qarag'anday qaraysan' ba?
5 Senin' ku'nlerin' de insannın' ku'nlerindey me? Jılların' adamnın' jıllarınday ma?
6 Ne ushın menin' gu'namdı izlep, Ayıbımdı tabıwg'a asıg'asan'?
7 Biraq Sen menin' ayıpsız ekenimdi, Senin' qolın'nan meni hesh kimnin' qutqara almaytug'ının bilesen'.
8 Senin' qolların' meni sog'ıp, jarattı, Biraq endi meni pu'tkilley joq qılmaqshımısan'?
9 Meni ılaydan qalay soqqanın'dı esle. Endi meni ja'ne topıraqqa qaytarmaqshımısan'?
10 en emes pe, meni anamnın' qursag'ına su't kibi quyg'an, Sol jerde meni irimtik kibi qoyıltqan,
11 Meni teri ha'm dene menen kiyindirip, Su'yek ha'm sin'irler menen biriktirgen?
12 Sen mag'an o'mir sıylap, miyrimin'di ko'rsettin', Senin' g'amxorlıg'ın' menin' ruwxımdı qorg'adı.
13 Biraq, mine, Sen ju'regin'de mına na'rselerdi jasırıp qoydın', Senin' niyetin'nin' ne ekenin bilemen:
14 Gu'na islesem, meni gu'zetip turg'an bolasan', Bunı jazasız qaldırmaysan'.
15 Eger ayıplı bolsam, mag'an ha'siret bolsın! Biraq haq bolsam da, basımdı ko'tere almay atırman, Uyatqa qaldım, da'rtim awır.
16 Eger basımdı ko'tersem, Arıslan kibi mag'an taslanasan', Qorqınıshlı ku'shin'di qaytadan mag'an qarsı isletesen'.
17 Mag'an qarsı jan'adan gu'walar alıp kelesen', Mag'an degen g'a'zebin'di arttırasan', Shabıwıl u'stine shabıwıl qılasan'.
18 Ne ushın tuwılıwıma jol qoydın'? Hesh kim meni ko'rmesten aldın, o'lgenim jaqsı edi.
19 Hesh du'nyag'a kelmegendey bolıp, Anamnın' qursag'ınan tuwrı qa'birge qoyılg'anımda edi.
20 Menin' o'mir ku'nlerim qısqa emes pe? Meni tınısh qoy, bir sa't ta'selle tabayın.
21 Sebebi men qaytıp kelmes jolg'a, Tas tu'nek qaran'g'ılıq hu'kim su'rgen jerge atlanaman.
22 Qoyıw qaran'g'ılıqqa shu'mgen jerge, Ta'rtipke keltirilmegen o'lim tu'negi eline, Jaqtılıg'ı da tas tu'nek bolg'an jerge ketemen».
