Ayup 11 bob
1 Sonda naamalı Sofar bılay dedi:
2 – Sonsha ko'p so'z juwapsız qala ma? Ko'p so'ylegen adam aqlana ma?
3 Mıljın' ga'plerin' adamlardın' tilin tıyıp qoysın ba? Masqaralag'anın'da, seni hesh kim uyaltpasın ba?
4 Sen: «Ta'limim minsiz, O'zim de Qudaydın' aldında pa'kpen», – deysen'.
5 Qa'ne, endi Quday juwap berip, Sag'an qarsı til qatıp,
6 Danalıqtın' sırların bildirse edi! Sebebi danalıq ko'p qırlı g'oy. Bilip qoy, Quday gu'naların'nın' bazıların jen'il jazalaydı.
7 Qudaydın' teren' sırların tu'sine alasan' ba? Qu'direti ku'shli Qudaydın' shegine jete alasan' ba?
8 Qudaydın' danalıg'ı aspannan da biyik, sen ne qıla alasan'? O'liler ma'kanınan da teren', ne bile alasan'?
9 Onın' o'lshemi jerden de uzın, Ten'izden de ken'.
10 Eger Quday kelip, zindang'a taslasa, Hu'kim etiw ushın shaqırsa, kim Og'an tosqınlıq qıla aladı?
11 Ol o'tirikshilerdi biledi, Ol jawızlıqtı ko'rip, onı itibarsız qaldıra ma?
12 Qulannan adam tuwılmaytug'ını sıyaqlı, Miyi joq adam da dana bola almaydı.
13 Biraq, sen eger Og'an ju'regin'di qayta bag'ıshlap, Qolların'dı jayıp, duwa etsen',
14 Eger jawızlıq islegen bolsan', onı o'zin'nen uzaqlastırsan', Shatırın'nan nahaqlıqtı quwıp shıg'arsan',
15 Sonda uyalmastan basın'dı ko'terip, Qorqpastan tikke turatug'ının' so'zsiz.
16 Azabın'dı umıtıp, Onı ag'ıp ketken suwlar kibi yadqa alasan'.
17 O'mirin' tu'stegi ku'nnin' nurınan da jarıq bolar, Ondag'ı qaran'g'ılıq ta tan' nurına aylanar.
18 U'mitin' bolg'anlıqtan, arqayın bolarsan', A'tirapın' qorshalg'anlıqtan, qa'wipsiz dem alasan'.
19 Jatqanın'da, seni qorqıtatug'ın hesh kim bolmaydı, Ko'pler sennen miyrim izlep keledi.
20 Biraq zalımlardın' ko'zleri talıp, Bas sawg'alaytug'ın jeri de bolmaydı, U'mitleri tek son'g'ı demin beriw bolıp qaladı.
