Ayup 12 bob
1 Sonda Ayup bılay dep juwap berdi:
2 – A'lbette, sizler ha'mmesin bilesiz, Danalıq ta sizler menen birge o'lip ketse kerek!
3 Biraq mende de sizlerdegidey aqıl bar, Men de sizlerden kem emespen, Sizler aytıp atırg'anlardı kim bilmeydi?
4 Men o'z doslarıma ku'lki boldım. Qudaydı shaqırg'anımda, Ol mag'an burın juwap beretug'ın edi. A'dil ha'm minsiz bolsam da, ku'lkige qalıp otırman!
5 Qayg'ısızlar baxıtsızlıqqa ushırag'andı mensinbeydi, Su'rnikkendi iyterip jiberedi.
6 Qaraqshılardın' shatırında tınıshlıq hu'kim su'rgen, Qudaydın' g'a'zebin keltirgenler qa'wip-qa'tersiz jasap atır, Tap Quday olardın' qolında sıyaqlı.
7 Biraq haywanatlardan sora, olar sag'an u'yretedi, Ko'ktegi quslardan sora, olar sag'an aytıp beredi.
8 Jer menen so'yles, ol sag'an ta'lim beredi, Ten'izdegi balıqlar sag'an bildiredi.
9 Olardın' qaysısı bilmes, Bulardın' ha'mmesi Jaratqan İyenin' qolı menen islengenin?
10 Ha'r bir jaratılıstın' o'miri de, Ha'r bir adamnın' janı da Onın' qolında.
11 Awız awqattın' da'min ajıratqanınday, Qulaq ta so'zlerdin' ma'nisin ayıra almay ma?
12 Danalıq jası u'lkenlerde bolmay ma? Aqıl uzaq o'mir su'rgenlerde bolmay ma?
13 Biraq Qudayda danalıq ta, ku'sh te bar, Ma'sla'ha't penen aqıl da Og'an tiyisli.
14 Ol qulatqan na'rse qayta tiklenbeydi, Ol qamaqqa taslag'andı, hesh kim bosata almaydı.
15 Quday suwlardı toqtatsa, qurg'aqshılıq bolar, Eger jiberse, du'nyanı suw alar.
16 Ku'sh-quwat penen jen'is te Og'an tiyisli, Aldang'an da, aldag'an da Onın' qolında.
17 Ol ma'sla'ha'tshilerdi jalan'ayaq aydatıp, Biylerdi aqmaqqa aylandıradı.
18 Ol patshalardın' sa'nli belbewlerin sheship alıp, Bellerine arqan baylap qoyadı.
19 Ruwxaniylerdi de jalan'ayaq aydatıp, Ku'shlilerdi awdarıp taslaydı.
20 Ol isenimli ma'sla'ha'tshilerdi tilden ayıradı, Aqsaqallardı aqılınan juda qıladı.
21 Ol aqsu'yeklerdi shermende qıladı, Ku'shlilerdi ku'shinen ayıradı.
22 Ol qaran'g'ılıqtın' teren' sırların ashadı, Tas tu'nekti de jarıqqa shıg'aradı.
23 Xalıqlardı ullı qılatug'ın da, joq qılatug'ın da Ol, Olardı ko'beytetug'ın da, tarqatıp jiberetug'ın da Ol.
24 Jer betindegi xalıq basshıların aqılınan ayıratug'ın da Ol, Jolsız sho'lde gezdirip qoyatug'ın da Ol.
25 Olar tas tu'nek qaran'g'ılıqta sıypalanıp ju'redi, Olardı ma's adamday ten'seldirip qoyadı.
