Ayup 13 bob
1 Mine, bulardın' ha'mmesin ko'zlerim ko'rdi, Qulaqlarım menen esitip, tu'sindim.
2 Sizlerdin' bilgenlerin'izdi men de bilemen, Men sizlerden kem emespen.
3 Biraq men Qu'direti ku'shli Quday menen so'ylesip, Dawamdı Quday menen tartısqım keledi.
4 Al sizler meni o'tirik penen ılaslaysız, Ha'mmen'iz paydasız ta'wiplerge uqsaysız.
5 Qa'ne, ha'mmen'iz dım u'ndemey otırsan'ız, Bul sizler ushın danalıq bolar edi.
6 Endi menin' arzımdı tın'lap, Keltiretug'ın da'lillerime qulaq salın'.
7 Quday ushın nahaq so'zlerdi aytıp, Ol ushın o'tirik so'ylewin'iz kerek pe?
8 Eki ju'zlilik penen Qudaydı jaqlap, Onın' so'zin so'ylemekshimisiz?
9 Eger Quday sizlerdi tekserse, jaqsı bola ma? Adamlardı aldag'anday, Onı da aldaysızlar ma?
10 Eki ju'zlilik etip, jasırınsha Onı jaqlasan'ız, Ol sizlerdi so'zsiz jazalaydı.
11 Onın' ullılıg'ı sizlerdi qorqıtpay ma? Onın' aybatı sizlerge hu'jim qılmay ma?
12 Eskertiwlerin'iz ku'l sıyaqlı paydasız naqıllardan ibarat, Da'lillerin'iz ılaydan islengen qalqanday ha'lsiz.
13 U'ndemen'ler, men so'yleymen, Keyin ne bolsa, bolar.
14 Sonlıqtan ta'wekelge bel baylap, Janımdı qa'terge qoyıp atırman.
15 Qaran'lar, Ol meni o'ltirmekshi, u'mitim qalmadı, Biraq men jollarımdı Onın' aldında qorg'ayman.
16 Sol arqalı qutqarılaman, Qudaysız adam Onın' aldına barıwg'a ju'rek ete almaydı.
17 So'zlerimdi dıqqat penen tın'lan', Ga'plerim qulaqların'ızg'a kirsin.
18 Mine, men dawa-arzımdı tayarladım, 3 Aqlanatug'ınımdı bilemen.
19 Menin' menen tartısatug'ın adam bar ma? Eger birew meni ayıplı dep tapsa, u'ndemey o'lip ketemen.
20 Tek mına eki na'rseni sorayman, Quday, Sonı qılsan', men Sennen artıq jasırınbayman:
21 Mennen qolın'dı tart, Ha'm aybatın' menen meni qorqıtpa.
22 Son'ınan meni shaqır, juwap beremen, Yamasa mag'an so'ylewge ruxsat berip, O'zin' juwap ber.
23 Menin' qansha ayıp ha'm gu'nalarım bar? Mag'an qılmıslarım menen gu'namdı ko'rset.
24 Ne ushın ju'zin'di jasırasan'? Nege meni dushpanım dep sanaysan'?
25 Sen samal ushırg'an japıraqtı qorqıtpaqshımısan'? Quwrap qalg'an qawıqtı quwdalamaqshımısan'?
26 Sen men tuwralı ashshı ayıplar jazıp qoyıp, Balalıg'ımdag'ı gu'nalarımdı mag'an miyras etip, berip atırsan'+.
27 Ayaqlarımdı bug'awlap, Jollarımdı gu'zetip, İzimnen hesh qalmaysan'.
28 Sonlıqtan shirigen na'rsedey, Ku'ye jegen kiyimdey ıdırap joq bolmaqtaman.
