1 Hayaldan tuwılg'an insannın', O'miri qısqa, azapqa tolı boladı.
2 Ol gu'l sıyaqlı o'sedi, solıp qaladı, Ko'len'ke sıyaqlı tez o'tip ketedi, turıp qalmaydı.
3 Sonday insan bolg'an mag'an na'zerin'di u'zbey qaraysan' ba? Hu'kim qılıw ushın meni da'rgayın'a alıp kelesen' be?
4 Kim haram na'rseden hadal na'rse shıg'ara aladı? Hesh kim!
5 İnsannın' ku'nlerin belgilep, Aylarının' sanın sanap, Asıp ketpeytug'ın shek te qoyg'an ekensen',
6 Endi onnan na'zerin'di alıp, onı tınıshına qoy. Ol da ku'nlikshinin' jumıs ku'ninin' ayaqlang'anına quwang'anınday, o'mirinen ra'ha'tlensin.
7 Ha'tte, ag'ashta da u'mit bar, Onı kesip taslasa, ol qayta o'sedi, O'siwin toqtatpaydı.
8 Tamırları qartayıp qawsap, Tu'biri topıraqta shirip ketse de,
9 Suw iyisin alıp-aq, jaynap ketedi, Jas terek sıyaqlı shaqaların jayadı.
10 Biraq insan o'lse, bar ku'shinen ayırıladı, Son'g'ı demin shıg'arg'annan son', ol qay jerde boladı?
11 Ko'ldin' suwı qurıp qalg'anday, Da'rya suwı tartılıp, kewip qalg'anday,
12 O'lgen adam da jatadı, qaytıp turmaydı, Aspan jog'alıp ketpegenshe, ol oyanbaydı, Uyqısınan hesh turmaydı.
13 Qa'ne, Sen meni o'liler ma'kanına jasırıp qoysan' edi, G'a'zebin' basılg'ansha, saqlap qoysan' edi! Men ushın bir waqıt belgilep, Son'ınan meni eske alsan' edi!
14 Adam o'lgennen son', qayta tirile me? Eger sonday bolsa, azat etilgenimshe, 4 Azaplı ku'nlerimnin' barlıq ku'nlerinde qayta tiriliwdi ku'ter edim.
15 Sonda meni, O'zin' jaratqan jaratılısın'dı ko'rgin' kelgende, shaqırar edin', Men de juwap berer edim.
16 Sonda Sen adımlarımdı sanap, gu'zeter edin', Biraq gu'nalarımnın' esabın almas edin'.
17 Qılmıslarımdı dorbag'a salıp mo'rlep, İslegen gu'nalarımdı jasırar edin'.
18 Biraq tawlar qulap, maydalanıp, Jartaslar o'z ornınan qozg'alg'anday,
19 Suwdın' tastı jalmap, Ag'ıstın' topıraqtı ag'ızıp ketkenindey, Sen de insannın' u'mitin joq qılasan'.
20 Sen onı aqırına shekem ezesen', ol joq boladı, O'lgeninde ju'zin o'zgertip, uzaqqa jiberesen'.
21 Ulları hu'rmetke miyasar bolar, bunnan onın' xabarı bolmas, Jerge urılar, bunı bilmes.
22 Ol tek o'z denesinin' azabın sezer, Tek o'zi ushın qayg'ırar.
