Ayup 15 bob
1 Sonda temanlı Elifaz bılay dep juwap berdi:
2 – Qarnın ıssı samalg'a toltırg'anday, Dana adam bunday hawayı so'zler menen juwap bere me?
3 Paydasız so'zler menen aytısıp, Ma'nissiz ga'pler aytıp, tartısar ma edi?
4 Haqıyqattan da, sen Qudaydan qorqıwdı shetke ısırıp qoydın', Onın' aldında duwa etiwdi de bolar-bolmas na'rse dep sanadın'.
5 Gu'naların' awzın'a so'z salıp tur, Hiylekerlerdin' tili menen so'ylep tursan'.
6 Seni ayıplap atırg'an men emes, al o'z awzın', Tilin' o'zin'e qarsı gu'walıq berip tur.
7 Sen ne adamzattın' tun'g'ıshımısan'? Yamasa to'beler jaratılmastan da burın tuwılg'anbısan'?
8 Qudaydın' ma'jilisine qatnasıp, Onı tın'lap pa edin'? Yamasa dana adam tek jalg'ız o'zin'bisen'?
9 en bilip, biz bilmeytug'ın ne na'rse eken? Sen tu'sinip, biz tu'sinbeytug'ın ne na'rse eken?
10 Aramızda aq shashlılar da, g'arrılar da bar, Olardın' jası senin' a'ken'nen de u'lken.
11 Qudaydın' ta'sellesi sen ushın az boldı ma? Sag'an aytqan jag'ımlı so'zleri kemlik qıldı ma?
12 Ne ushın ju'regin' seni alag'ada qıladı? Ne ushın ko'zlerin'de g'a'zep otı lawlap tur?
13 Ne ushın Qudayg'a ashıwlanıp, Awzın'a sonshelli erk beresen'?
14 Adam qalay pa'k bola aladı? Hayal zatınan tuwılg'an bende qalay a'dil bola aladı?
15 Quday O'z perishtelerine de isenbeydi, Ha'tte, aspan da Onın' na'zerinde pa'k emes.
16 Solay eken, nahaqlıqtı suw kibi ishetug'ın, İplas ha'm buzıq insan onnan beter emes pe?
17 Qulaq sal, men sag'an tu'sindiremen, O'zim ko'rgenimdi aytıp beremen.
18 Danalardın' aytqanların, Ata-babalarınan u'yrenip, jasırmay u'yretkenlerin aytıp beremen.
19 Jer tek olardın' ata-babalarına berilgen edi, Olardın' arasında jat adamlar joq edi.
20 Zalım adam o'mir boyı azap shegedi, Eziwshilerge berilgen jıllar sanawlı.
21 Qorqınıshlı dawıslar olardın' qulaqlarınan ketpeydi, Tınıshlıq waqtında da basqınshılardın' hu'jimine ushıraydı.
22 Olar qaran'g'ılıqtan qutılıwg'a u'mit etpeydi, Olardın' ta'g'dirine qılıshtan o'liw jazılg'an.
23 Olar bir tislem nan izlep sergizdan bolar, Qaran'g'ılıq ku'ninin' jaqınlasqanın da biler.
24 Azap ha'm qayg'ı olardı qorqınıshqa salar, Urısqa tayar turg'an patsha sıyaqlı qorqınısh olardı jen'er.
25 Olar qolların Qudayg'a qarsı ko'terip, Qu'direti ku'shli Qudaydı maydang'a shaqırar
26 Qalın', bekkem qalqanın ko'terip, O'jetlenip, Og'an qarsı juwırar.
27 Zalım adamnın' betin may qaplap, Bo'kselerine may jıynalg'an.
28 lar qarabaqanag'a aylang'an qalalarda jasaydı, Qulap keteyin dep turg'an, Qan'ırap qalg'an u'ylerde jasaydı.
29 Olar bayımaydı, baylıg'ı uzaqqa sozılmaydı, Mal-mu'lki jer betine jayılmaydı.
30 Olar qaran'g'ılıqtan qutıla almaydı, Olar shaqaları jang'an terekke uqsaydı, Qudaydın' demi olardı ushırıp jiberedi.
31 Bos na'rsege u'mit baylap, o'zin aldamasın, Olardın' sıyı boslıq boladı.
32 Waqtı-saatı kelmey shawıp taslanadı, Artıq shaqaları ko'germeydi.
33 Olar ko'kley miywesi to'gilgen ju'zim ag'ashına, Gu'lleri to'gilip, miywesiz qalg'an za'ytu'n ag'ashına uqsaydı.
34 Qudaysızlardın' toparı na'silsiz boladı, Paraxorlardın' shatırların ot jalmap, joq qıladı.
35 Olar qayg'ıg'a ha'miledar bolıp, jawızlıqtı tuwadı, Ju'rekleri jalg'ang'a tolı boladı.
