Ayup 16 bob
1 Sonda Ayup bılay dep juwap berdi:
2 – Men bunday na'rselerdi ko'p esittim, Sizlerdin' ha'mmen'iz qanday biyshara jubatıwshısızlar!
3 Bos so'zlerin'izdin' aqırı bar ma o'zi? Tartısıwg'a sizlerdi ne ma'jbu'rlep tur?
4 Eger sizler menin' ornımda bolg'anın'ızda, Men de sizlerdin' aytqanın'ızdı ayta alaman. Sizlerge qarsı so'z toqıp aytıp, Basımdı shayqay alaman.
5 Biraq men so'zlerim menen ta'selle berer edim, Ernimnin' qıymıldısı menen da'rtin'izdi jen'illeter edim.
6 Al ha'zir so'ylesem de, azabım jen'illenbeydi, So'ylemesem de, ol basılmaydı.
7 Eh, Quday, Sen meni jenship tasladın', Pu'tkil u'y-ishimdi qırıp tasladın'!
8 Ju'zimdi a'jim menen qapladın', Olar mag'an qarsı gu'walıq bolmaqta, Azg'ınlıg'ım da mag'an qarsı turıp, Mag'an qarsı gu'walıq bermekte.
9 Quday meni jek ko'rip, G'a'zep penen tilkim-tilkim etpekte, Tislerin qayrap mag'an, Dushpan ko'zi menen qarap, meni tespekte.
10 Adamlar awızların kerip ashıp, Meni masqaralap, shekeme urdı, Olar mag'an qarsı birikti.
11 Quday meni jawızlardın' qolına tapsırdı, Zalımlardın' qolına taslap qoydı.
12 Men tınısh jasap atır edim, Biraq Ol meni maydalap tasladı, Jelkemnen uslap alıp, jerge urdı. Meni O'zine nıshan qıldı.
13 Onın' sadaqshıları meni qorshap aldı, Ayamay bo'tekelerimdi tesip, O'timdi jerge to'kti.
14 Quday denemdegi tesiktin' u'stin qayta-qayta tesip, Jawınger a'sker kibi u'stime topılmaqta.
15 Men u'stime aza kiyimin tiktim, Ayaq-astı bolıp, topıraqta otırman.
16 Jılag'annan ju'zim qızardı, Qabaqlarım qarayıp ketti.
17 Biraq qollarım jawızlıq islemedi, Duwam da taza.
18 Topıraq, sen menin' qanımdı jasırma, Pa'riyadım hasla tınbasın
19 Mine, ha'zir menin' gu'wam aspanda, Joqarıda menin' Qorg'awshım bar.
20 Doslarım meni mazaq qılmaqta, Ko'z jaslarım Qudayg'a qaray aqpaqta.
21 Birewdin' dosları arasında ta'welleshi bolg'anınday, Quday menen menin' aramda da bir ta'welleshi bolsa edi!
22 O'mirimnin' aqırı jaqınlap qaldı, Qayta kelmes jolg'a atlanaman.
