1 Ruwxım tu'sken, o'mirim az qalg'an, Qa'bir meni ku'tip turıptı.
2 Mazaq qılıwshılar a'tirapımdı orap alg'an, Olardın' qalay xorlıq ko'rsetip atırg'anın ko'rip turman.
3 Quday, O'zin' mag'an kepil bola go'r, Sennen basqa kim bar meni jaqlaytug'ın?
4 Sen menin' doslarımnın' aqıl-sanasın tu'sinbeytug'ın etip jawıp qoydın', Sonlıqtan Sen olardın' jen'iske erisiwine jol qoymaysan'.
5 O'z paydasın go'zlep, dosların satqan adamnın', Soqırlıg'ının' kesapatı balalarına tiyedi.
6 Quday meni adamlardın' tiline tu'sirdi, Olar betime tu'kirdi.
7 Qayg'ıdan ko'zlerim qarawıtıp, Denemnin' su'lderi qaldı.
8 A'dil adamlar bunı ko'rip shorshıp keter, Ayıpsızlar qudaysızlarg'a qarsı g'a'zep atına miner.
9 Sonda da a'dil adamlar o'z jollarına berik qalar, Qolları taza bolg'anlar bekkemlenip bara berer.
10 Qa'ne, sizler ja'ne bir ha'reket etip ko'rin', Ba'ri bir aran'ızdan dana adam taba almaspan.
11 Menin' ku'nlerim o'tip ketti, Niyetlerim de shilpa'rshe boldı. Ju'rektegi qa'lewlerim de o'ldi.
12 Doslarım tu'ndi ku'ndizge aylandıradı, Qaran'g'ı bassa da: «Ha'zir jarıq tu'sedi», – deydi.
13 Eger o'liler ma'kanı menin' u'yim bolsa, To'segimdi qaran'g'ılıqqa salayın dep atırsam,
14 Qa'birge: «Sen menin' a'kemsen'», – desem, Qurtlarg'a: «Sizler menin' anam ha'm apa-qarındaslarımsız», – desem,
15 Onda menin' u'mitimnin' qayda bolg'anı? Kim menin' u'mitimdi ko're aladı?
16 U'mitim menin' menen birge o'liler ma'kanına bara ma? Menin' menen birge topıraq qoynına kire me?
