Ayup 2 bob
1 Basqa bir ku'ni ila'hiy barlıqlar Qudaydın' aldına ja'ne kelgende, Onın' da'rgayında turıw ushın, shaytan da olar menen birge kelgen edi.
2 onda Jaratqan İye shaytannan: – Sen qay jerden kiyatırsan'? – dep soradı. Shaytan Jaratqan İyege: – Men jer betin gezip, onın' ha'mme jerin aylanıp shıqtım, – dep juwap berdi.
3 Jaratqan İye shaytang'a: – Qulım Ayupqa ser saldın' ba? Jer betinde ol sıyaqlı minsiz, a'dil, Mennen qorqatug'ın ha'm jamanlıqtan awlaq ju'retug'ın adam joq. Qara, ol ele minsizliginde bekkem turıptı. Al sen bolsan', ayıpsızdan ayıpsız onı joq qılıw ushın Meni iytermeledin', – dedi.
4 Sonda shaytan: – Etke et degenindey, adam o'z janı ushın qolındag'ısının' ba'rin beredi.
5 Qolın'dı sozıp, et penen su'yegine zıyan tiygizip ko'r, sonda Ayup ju'zin'e tik qarap, na'let aytadı, – dedi.
6 Jaratqan İye shaytang'a: – Yaqshı, onı senin' qolın'a beremen, tek onın' janın alma, – dedi.
7 Solay etip, shaytan Jaratqan İyenin' da'rgayınan shıg'ıp ketti ha'm Ayuptı basınan ayag'ının' ushına deyin awırtatug'ın jara menen qaplap tasladı.
8 Sonda Ayup ku'ldin' ortasında otırıp, gu'zenin' sınıg'ı menen jaraların qasıp otırg'an edi.
9 Hayalı og'an kelip: – Sen ele minsiz bolıwg'a tırısıp atırsan' ba? Onnan da Qudaydı na'letlep, keyin o'lip qala g'oysesh, – dedi.
10 Ayup og'an: Sen aqılsız hayallar sıyaqlı so'ylep tursan'. Sonda ne, bizler Qudaydan tek jaqsılıqtı qabıl etip, jamanlıqtı qabıl etpewimiz kerek pe? – dep juwap berdi. Sonshama azap shekse de, Ayuptın' awzınan gu'na bolg'anday so'z shıqpadı.
11 Ayuptın' u'sh dostısı: temanlı Elifaz, shuwaxlı Bildad ha'm naamalı Sofar Ayuptın' basına tu'sken baxıtsızlıqları haqqında esitkende, jasap turg'an jerlerinen shıqtı ha'm bir jerde ushırasıp, jolg'a atlandı. Olar Ayuptın' qayg'ısın bo'lisip, og'an ta'selle beriw ushın onın' janına keldi.
12 Dosları Ayuptı uzaqtan ko'rip, onı zorg'a tanıdı. Sonda olar zar en'irep jıladı, kiyimlerin jırtıp, aspang'a qaray topıraq shashıp, onı baslarına da septi.
13 Dosları jeti ku'n, jeti tu'n Ayup penen birge qara jerde otırdı. Hesh biri og'an bir awız so'z so'ylemedi, olar Ayuptın' sonshelli qattı qıynalıp atırg'anın ko'rip turg'an edi.
