Ayup 20 bob
1 Sonda naamalı Sofar Ayupqa bılay dedi:
2 – Qa'weterli pikirlerim meni juwap beriwge ma'jbu'r etpekte, Men qattı tınıshsızlanıp turman.
3 Men kewlime tiyetug'ın ayıplawların'dı esitip turman, Sonlıqtan aqılım men ushın juwap bermekte.
4 Bilmes pe edin' a'yyemnen beri, Adamzat du'nyag'a kelgenli beri,
5 Zalımnın' shadlıg'ı uzaqqa sozılmadı, Qudaysızdın' quwanıshı bir sa'tlik g'ana.
6 Onın' ko'kiregi ko'klerge jetip, Bası bultlarg'a tiyse de,
7 Ol o'zinin' da'reti kibi ma'n'gige joq boladı. Onı ko'rgenler: «Ol qay jerde?» – dep soraydı.
8 Ol ko'rilgen tu's sıyaqlı g'ayıp boladı, onı hesh kim taba almaydı, Tu'nde ko'ringen elestey jog'alıp ketedi.
9 Onı ko'rgen ko'zler endi ko'rmeydi, U'y-ishindegilerge qaytıp ko'rinbeydi.
10 Onın' balaları ka'mbag'allardan mehir ku'tedi, Urpaqları tartıp alg'an mal-du'nyasın qaytarıp beredi.
11 Denesin toltırg'an jaslıq jigeri, Onın' menen birge topıraqta jatadı.
12 Jamanlıq onın' awzında tatlı ko'rinip, Onı tilinin' astına jasırsa da,
13 Onı qa'dirlep, jibermey, Awzında uslap tursa da,
14 Ol asqazanda aynıp, İshinde jılannın' uwına aylanadı.
15 Ol jutqan baylıqların qaytarıp qusadı, Quday olardı asqazanınan shıg'arıp aladı.
16 Ol jılannın' uwın sorıydı, Za'ha'rli qara jılan onı shag'ıp o'ltiredi.
17 Ag'ar suwlardın', su't ha'm pal ag'ıp turg'an da'ryalardın', Ra'ha'tin ko're almaydı.
18 Miynet penen eriskenlerin jemey atırıp, qaytarıp beredi, Sawdadan tapqan paydasınan la'zzet almaydı.
19 Miynet penen eriskenlerin jemey atırıp, qaytarıp beredi, Sawdadan tapqan paydasınan la'zzet almaydı.
20 Na'psiqawlıg'ı tınıshlıq bermegenlikten, O'zi unatatug'ın na'rselerdin' hesh qaysısın saqlap qala almaydı.
21 Ashko'zliginen hesh na'rse qaldırmaydı, Sonlıqtan abadanlıg'ı uzaqqa sozılmaydı.
22 Da'wletli waqtında basına apat keledi, Apatshılıqlar onı joq qıladı.
23 Qarnın qampaytıp toltırıp bolg'anda, Quday og'an lawlag'an g'a'zebin shashıp, U'stine g'a'zebin jawınday jawdıradı.
24 Zalım temir quraldan qashıp ketse de, Onı qola oq tesip o'tedi.
25 Atılg'an oq arqasınan shıg'adı, O'tin tesip o'tken ushı jıltırap turadı, O'lim qa'wpi onı biylep aladı.
26 Qara tu'nek onın' g'a'ziynelerin ku'tpekte, Adam jaqpag'an ot onı jalmaydı, Shatırında qalg'an son'g'ı na'rselerin de jag'ıp joq qıladı.
27 Aspan onın' ayıbın a'shkara etedi, Jer og'an qarsı bas ko'teredi.
28 Onın' u'yindegi baylıg'ı joq boladı, Qudaydın' qa'ha'rlenip, jazalaytug'ın ku'ni ha'mmesi seldey bolıp ag'ıp ketedi.
29 Mine, zalımnın' Qudaydan alatug'ın payı usı, Qudaydın' og'an beretug'ın miyrası usı.
