Ayup 21 bob
1 Sonda Ayup bılay dep juwap berdi:
2 – So'zlerimdi dıqqat penen tın'lan', Usı sizlerdin' mag'an bergen ta'sellen'iz bolsın.
3 Sabır qılın', men de so'yleyin, So'ylep bolg'anımnan keyin mazaq qılarsız.
4 Mag'an kelsek, men ne adamg'a arız qılıp atırman ba? Ne ushın shıdamsızlanbayın?
5 Jag'dayıma qaran'lar, denen'iz tu'rshigedi, Awzın'ızdı qolların'ız benen jawın'.
6 Jag'dayımdı oylasam, qorqınısh biylep aladı, Denemdi qaltıratpa basadı.
7 Zalımlar ne ushın jasawın dawam etedi, Qartayıp, ha'tte, ku'sh-g'ayratı arta beredi?
8 Balaları saw-salamat do'gereginde, Urpaqları ko'z aldında ju'redi.
9 U'yleri qa'wipsiz, qorqıwsız jasaydı, Qudaydın' hasası u'stine do'nbes.
10 Bug'alarının' to'l qoyıwı hesh bosqa ketpes, Sıyırları buzawlaydı, hesh ish taslamas.
11 Balaların su'riw kibi shıg'arıp jiberer, Perzentleri ayaq oyıng'a tu'ser.
12 Da'p ha'm lira sestine qosılıp, qosıq aytar, Sıbızg'ı sestine qosılıp, kewil ko'terer.
13 O'mirleri zawqı-sapa menen o'tip, O'liler ma'kanına tınıshlıq penen keter.
14 Sonda da zalımlar Qudayg'a bılay dep aytar: «Bizlerdi tınısh qoy! Senin' jolların'dı biliwdi qa'lemeymiz,
15 Sag'an xızmet etetug'ınday Qu'direti ku'shli Quday, Sen kim bolıpsan'? Sag'an duwa etiwden bizge ne payda?»
16 Degen menen, olardın' abadanlıg'ı o'z qolının' isi emes, Zalımlardın' oyqıyalları mennen awlaq bolsın!
17 Qashan zalımlardın' shırag'ı so'ngen edi? Qashan olardın' basına apat do'ngen edi?Qashan Quday olarg'a g'a'zeplenip, jazalag'an edi?
18 Qashan olar jel ushırg'an sabanday, Yamasa dawıl ushırg'an qawıqtay bolg'an edi?
19 Sizler: «Olardın' gu'naları ushın balaların jazalaydı», – deysizler, Onnan da, Quday olardın' o'zlerin jazalasın, Bul olarg'a sabaq boladı.
20 Olar opat bolg'anların o'z ko'zleri menen ko'rsin, Qu'direti ku'shli Qudaydın' g'a'zebin tatsın.
21 O'miri tawısılg'annan keyin, İzinde qalg'an xojalıg'ına ne bolsa da, olarg'a ba'ri bir emes pe?
22 Biraq, en' joqarıdag'ılardı da hu'kim etetug'ın Qudayg'a, Kim aqıl u'yrete aladı?
23 Birew o'lgeninshe, ku'shke tolısar, Tınısh ha'm qayg'ısız jasar, 24Denesin may basıp, Su'yekleri kemik bolar.
24 Denesin may basıp, Su'yekleri kemik bolar.
25 Ekinshisi qayg'ıg'a batıp, O'mirden jaqsılıq ko'rmey o'tip keter.
26 Aqırında, olar topıraqta birge jatar, Ekewi de qurtqa jem bolar.
27 Awa, men sizlerdin' oyın'ızdı bilemen, Niyetin'iz mag'an zıyan keltiriw ekenin de bilemen.
28 Sizler: «Sol aqsu'yek adamnın' u'yi qay jerde? Zalımlardın' shatırları qay jerde?» – deysizler.
29 Jolawshılardan soramadın'ız ba? Olar bergen gu'walıqlardı qabıllamadın'ız ba?
30 Zalım adam ba'le kelgen ku'ni aman qaladı, G'a'zep ku'ni og'an qutılıw ushın jol ashıladı.
31 Ju'rgen jolın kim onın' betine aytadı, Qılmısları ushın kim og'an jaza beredi?
32 Ol qa'birge qoyılg'anda, Qa'birinin' basında gu'zetshi turadı.
33 Ha'mme adamlar onın' izine eredi, Aldında ju'rgenlerdin' de san-sanag'ı joq. Go'rdin' topırag'ı da og'an jag'ımlı boladı.
34 Bos ga'plerin'iz benen meni qalay jubatasız? Bergen juwapların'ızdın' ha'mmesi jalg'an.
