Ayup 22 bob
1 Sonda temanlı Elifaz bılay dedi:
2 – Adam Qudayg'a payda keltire ala ma? Ha'tte, en' aqıllı adam da Og'an payda keltire alar ma edi?
3 Senin' a'dilligin'nen Qu'direti ku'shli Quday ne la'zzet aladı? Pa'k o'mir ta'rzin'nen Og'an ne payda?
4 Qudaydın' seni jazalawı, hu'kim etiwi, Onnan qorqqanın' ushın ba?
5 Kerisinshe, senin' jawızlıg'ın' ullı, Qılmısların' sheksiz bolg'anlıqtan emes pe?
6 Sen tuwısqanların'nan jo'nsiz kepillik aldın', Kiyimlerin sheship alıp, jalan'ash qaldırdın'.
7 Sho'llegenge suw bermedin', Ash bolg'ang'a nan bermedin'.
8 Bilegin'nin' ku'shi menen u'lkege iyelik ettin', Hu'rmetli adam bolıp jasadın'.
9 Biraq jesir hayallardı qurı qol qaytardın', Jetimlerdin' qol-qanatın qayırdın'.
10 Sonlıqtan a'tirapın'dı duzaqlar orap alg'an, Tosattan seni qorqınısh baspaqta.
11 Qaran'g'ılıq ishindesen', ko're almaysan', Seller seni g'arq qılmaqta.
12 Quday ko'klerden de joqarıda emes pe? Juldızlarg'a qara, olar qanshelli biyikte!
13 Biraq sen: «Quday ne biledi? Teren' qaran'g'ılıq ishinen hu'kim ete ala ma?
14 Qoyıw bultlar Onı jasırıp tur, Ol bizlerdi ko'rmeydi, Ol aspan gu'mbezinde aylanıp ju'r», – deysen'.
15 Sen ne, zalımlar ju'rgen, Eski joldı tutpaqshımısan'?
16 Olar waqtınan burın joq qılındı, Tiykarların sel ag'ızıp ketti.
17 Olar Qudayg'a: «Bizlerdi tınısh qoy! Qu'direti ku'shli Quday bizlerge ne qıla alar edi?» – dedi.
18 Biraq olardın' u'ylerin bereketke toltırg'an Quday edi g'oy! Al men bolsam, zalımlardın' niyetinen awlaq bolaman.
19 A'diller olardın' qulag'anın ko'rip, quwanar, Ayıpsızlar olardın' u'stinen ku'lip, bılay der:
20 «Dushpanlarımız joq qılındı, Mal-mu'lki janıp, ku'l boldı».
21 Quday menen jaras, tınıshlıqta bol, Sonda bereket tabarsan'.
22 Qudaydın' awzınan shıqqan ko'rsetpelerin qabıl etip, So'zlerin ju'regin'de saqla.
23 Eger sen Qu'direti ku'shli Qudayg'a qayta ju'z bursan', Eski halın'a qaytarsan'.Shatırın'dı nahaqlıqtan tazalasan',
24 Altındı jerdegi topıraqtay, Ofir altının saydag'ı taslarday ko'rsen',
25 Onda Qu'direti ku'shli Qudaydın' O'zi senin' altının', Qımbatbaha gu'misin' boladı.
26 Sonda Qu'direti ku'shli Qudaydan zawıq alarsan', Qudayg'a basın'dı ko'terip qaray alarsan'.
27 Og'an duwa et, Ol seni esitedi, Sen de o'zin' wa'de etip atag'anların'dı beresen'.
28 Sonda neni niyet etsen', orınlanar, Jolların'a nur to'giler.
29 Eger birew ayaq-astı bolsa, sen: «Onı qollay go'r», – dep aytasan', Sonda Quday kemkewillilerdi qutqaradı.
30 Ol, ha'tte, ayıplılardı da qutqaradı, Olar senin' qolların'nın' pa'kligi sebepli qutqarılar.
