Ayup 23 bob
1 Sonda Ayup bılay dep juwap berdi:
2 – Bu'gin de aytar shag'ımım ashshı, Zarlag'anıma qaramastan, Quday awır jazalawın dawam etpekte.
3 Ah, eger Onı qay jerden tabıwdı bilsem edi! Ol taxtta otırg'an jerge bara alsam edi!
4 Arzımdı Onın' aldında bayan etip, Awzımdı toltırıp, da'lillerimdi aytar edim.
5 Onın' mag'an beretug'ın juwabın bilip, Ne aytajag'ın tu'siner edim.
6 Ol ullı ku'shi menen mag'an qarsı shıg'ar ma edi? Yaq, Onın' O'zi meni tın'lag'an bolar edi.
7 A'dil adam Onın' menen pikir talasıp biler edi, Men de Qazım ta'repinen ma'n'gige aqlanar edim.
8 Biraq shıg'ısqa barsam, ol jerde Quday joq, Batısqa barsam da, Onı taba almayman.
9 Arqada bir na'rse islese, men Onı ko're almayman, Qublag'a aylansa da, Onı bayqamayman.
10 Biraq Quday men tutqan joldı jaqsı biledi, Ol meni sınaqqa salg'anda, altınday pa'k bolıp shıg'aman.
11 Sebebi ayaqlarım adımba-adım Onın' izinen ju'rdi, Hesh jaqqa burılmay, Onın' jolın tuttım.
12 Awzınan shıqqan buyrıqlarınan ju'z burmadım, Onın' so'zlerin ku'ndelikli tamag'ımnan da u'stin qoydım.
13 Quday qarar shıg'aradı, kim Og'an qarsı shıg'a aladı? Ol neni qa'lese, sonı qıladı.
14 Men ushın shıg'arg'an qararın Ol aqırına shekem orınlaydı, Bunday na'rseler Onda ele ko'p.
15 Sonlıqtan Onın' da'rgayında hu'reyim ushadı, Bul haqqında oylasam, Onnan qorqaman.
16 Quday meni qoyan ju'rek qılıp qoydı, Qu'direti ku'shli Quday meni qorqınıshqa salıp qoydı.
17 Biraq ju'zimdi qaplag'an tas tu'nek qaran'g'ılıq ta, Menin' dawısımdı so'ndire almadı.
