1 Ne ushın Qu'direti ku'shli Quday hu'kim ushın waqıt belgilemeydi? Ne ushın Onı tanıg'anlar bul ku'nlerdi hesh ko'rmeydi?
2 Zalımlar shegara belgilerin jıljıtıp, O'zlestirip alg'an su'riwlerin sol jaylawlarda bag'adı.
3 Jetimlerdin' eshegin tartıp aladı, Jesirlerdin' o'gizin kepillikke aladı.
4 Jarlılardı joldan quwıp shıg'aradı, U'lkedegi barlıq ka'mbag'allar bolsa, olardan jasırınıwg'a ma'jbu'r boladı.
5 Sonlıqtan ka'mbag'allar sho'ldegi qulanlar sıyaqlı, erte iske shıg'ıp, Balaları ushın qula du'zden awqat izleydi.
6 Olar azıqların basqalardın' atızlarınan toplaydı, Zalımlardın' ju'zim bag'ınan qalg'an-qutqanların terip aladı.
7 Tu'ndi kiyimsiz, jalan'ash o'tkeredi, Suwıqta jamılatug'ın hesh na'rsesi joq.
8 Tawda jawg'an jawınnan u'sti-bası sel bolıp, Baspanası bolmag'anlıqtan, jılınıw ushın jartaslarg'a tıg'ıladı.
9 Zalımlar jesir hayaldın' bo'pesin ko'kirek su'tinen ayıradı, Jarlının' balasın qarızı ushın tartıp aladı.
10 Olar kiyimsiz, jalan'ash sandalıp ju'redi, Ash qarıng'a biyday da'stelerin tasıydı.
11 Diywallap qorshalg'an jerde za'ytu'nnen may shıg'aradı, İskenjede ju'zim sıg'adı, biraq o'zleri sho'lden harıg'an.
12 Qalalarda o'lip baratırg'anlar nala shekpekte, Jaraqatlang'an janlar ja'rdem sorap, pa'riyad etpekte, Biraq, sonda da Quday olardın' jalbarınıwlarına kewil bo'lmeydi.
13 Nurg'a qarsı bas ko'teretug'ınlar da bar, Olar nurdın' jolın tanımas, Onın' soqpaqlarınan da ju'rmes.
14 Jarlı ha'm ka'mbag'aldı o'ltiriw ushın, Qanxor ku'n batqanda ayaqqa turar, Tu'nde bolsa, urlıq qılar.
15 Buzıqshılıq qılıwshının' ko'zi ımırt jabılıwın ku'ter, Ol: «Meni hesh kim ko'rmeydi», – dep oylap, Ju'zin jawıp alar.
16 Qaran'g'ılıqta urılar u'ylerdi tonap, Al ku'ndizleri o'z u'ylerine tıg'ılıp alar, Olar nurdın' ne ekenin bilmes.
17 Olar ushın azan o'limdey qoyıw qaran'g'ılıq, Al tu'nektin' qorqınıshları – olardın' dostı.
18 Biraq onday adamlar suw betindegi ko'biktey tez joq boladı, Olardın' jer betindegi u'lesine na'let jawg'an, Hesh kim olardın' ju'zim bag'ına ayaq baspas.
19 Issı hawa ha'm qurg'aqshılıq qar suwların sorıp alg'anday, O'liler ma'kanı da gu'nakarlardı o'z qushag'ına aladı.
20 Olardı, ha'tte, qursag'ına ko'tergen ana da umıtadı, Qurtlar olardı ha'z etip jeydi, Olardı artıq hesh kim eslemeydi, Solay etip, nahaq adamlar ag'ash kibi sındırıladı.
21 Zalımlar perzenti joq, qaqsal hayalg'a zulımlıq qılar, Jesirge hesh jaqsılıq qılmas.
22 Biraq Quday O'z ku'shi menen ku'shlilerdi joq qılar, Olar bekkem ornalasıp alsa da, o'miri ushın u'miti bolmas.
23 Quday olarg'a qa'wipsizlik berer, olar Og'an su'yener, Biraq Qudaydın' ko'zleri olardın' jollarında.
24 Olar bir demge ko'terilip, keyin joq bolar, To'menletiler, basqalar kibi o'lip keter, Masaq sıyaqlı quwrap qalar.
25 Solay emes pe? Jalg'an dep, kim meni ayıplay aladı? Kim menin' ga'plerimnin' bos ekenin ko'rsete aladı?
