Ayup 28 bob
1 Mine, gu'mis qazıp alınatug'ın ka'nler, Altındı tazartatug'ın orınlar bar.
2 Temir jerden qazıp alınadı, Mıs ta tastan balqıtıp alınadı.
3 Ka'nshi qaran'g'ılıqqa shek qoyadı, Jer astının' uzaq shetine barıp, Tu'nek ha'm qoyıw qaran'g'ılıqtan qazılma izleydi.
4 Ol adam jasaytug'ın jerlerden uzaqta, Adam ayaq baspaytug'ın jerlerde qudıq qazıp, Ha'mmeden uzaqta jipke asılıp, terbelip turadı.
5 Jer betine kelsek, onnan azıq-awqat o'nip shıg'adı, Al jer astı bolsa, jandırılg'anday astan-kesten bolıp atır.
6 Onın' tasları lazurittin' ma'kanı, Topırag'ında altın bar.
7 Jırtqısh qus ka'nge baratug'ın jollardı bilmeydi, Sun'qardın' ko'zi og'an tu'speydi.
8 Jabayı haywanlar ol jerlerge ayaq baspag'an, Arıslan da ol jerlerden ju'rmegen.
9 Adam jartaslardı sındırıp, Tawlardı tu'p-tamırı menen qoparıp taslaydı.
10 Ol jartaslar arasınan jol ashadı, Ko'zleri ha'r bir bahalı na'rseni ko'redi,
11 Adam da'ryalardın' sag'asın tabadı, Jasırın bolg'anlardı jaqtılıqqa shıg'aradı.
12 Biraq danalıqtı qayaqtan tabıwg'a boladı?Aqıldın' ma'kanı qay jerde eken?
13 Adamzat onın' qa'dirin bilmes, Tiriler a'leminen onı taba almas.
14 Teren' suwlar: «Ol mende emes», – der, Ten'iz de: «Ol menin' janımda da emes», – der.
15 Onı sap altıng'a da satıp ala almaysan', Qunın gu'mis penen de to'ley almaysan'.
16 Danalıq Ofir altını menen de, Qımbatbaha oniks ha'm lazurit penen de bahalanbas.
17 Ol altın menen de, kristall menen de salıstırılmas, Sap altın buyımg'a da almastırılmas.
18 Marjan ha'm yashmanı aytpay-aq qoyayıq, Danalıq yaqıttan da qımbat turadı.
19 Kush xrizoliti de og'an salıstırılmas, Sap altın menen de onın' qunı o'lshenbes.
20 Danalıq qaydan keledi? Aqıldın' ma'kanı qay jerde eken?
21 Ol barlıq tiri janlardın' ko'zinen jasırılg'an, Ko'ktegi quslardan da sır saqlang'an.
22 Nabıt bolıw ma'kanı ha'm o'lim: «Biz ol haqqında tek mısh-mısh esittik», – deydi.
23 Danalıqqa baratug'ın jol Qudayg'a ayan, Onın' ma'kanın tek Ol biledi.
24 Ol jerdin' shetlerine deyin ko'z salar, Ko'klerdin' astındag'ılardın' ha'mmesin ko'rer.
25 Ol samalg'a ku'sh berip, Suwlardın' o'lshemin belgilep bergende,
26 Ol jawın ushın qarar shıg'arıp, Jıldırım ushın jol belgilegende,
27 Ol danalıqtı ko'rip, onı bahaladı, Onı tekserip, tastıyıqladı.
28 Son'ınan adamg'a: «Haqıyqattan da, Jaratqan İyeden qorqıw – bul danalıq, Jawızlıqtan awlaq bolıw – bul aqıllılıq», – dedi.
