Ayup 29 bob
1 Ayup so'zin dawam etip bılay dedi:
2 – Qa'ne endi, o'tken aylar, Quday meni qorg'ap-saqlag'an ku'nler qaytıp kelse edi!
3 Sol waqıtları Onın' shırası to'bemde jarqırap, Onın' nurı menen qaran'g'ılıqtı qa'wipsiz kesip o'ter edim!
4 Awa, o'nip-o'sken ku'nlerim, Qudaydın' doslıg'ı shatırımdı qorg'ap turg'an ku'nler qaytıp kelse edi!
5 Sol ku'nleri Qu'direti ku'shli Quday ele menin' menen birge bolıp, Balalarım da a'tirapımda edi.
6 U'yimde ag'arg'anım mol bolıp, Jartas men ushın za'ytu'n mayın da'rya qılıp ag'ızar edi.
7 Qala da'rwazası aldına barıp, Maydandag'ı ornıma otırmaqshı bolg'anımda,
8 Jaslar meni ko'rip jol berer, Jası u'lkenler de ornınan turar edi.
9 Basshılar da so'ylewin toqtatıp, Qolları menen awızların basar edi.
10 Aqsu'yeklerdin' de dawısı so'nip, Tilleri tan'layına jabısıp qalar edi.
11 Meni tın'lag'anlar mag'an raxmet aytar edi, Meni ko'rgenler meni maqtar edi.
12 Men nala shekken jarlını da, Ja'rdemge mu'ta'j jetimdi de qutqarar edim.
13 O'lim to'seginde jatırg'anlar mag'an pa'tiyasın berer edi, Jesir hayallardın' ju'regi de men bergen ja'rdemnen quwanıshqa tolar edi.
14 A'dillikti kiyim kibi kiyip aldım, A'dalatlıq shapanım ha'm sa'llemdey edi.
15 Soqırg'a ko'z, Mayıpqa ayaq boldım.
16 Jarlılarg'a a'kelik qıldım, O'zim tanımag'an adamnın' dawın da a'dillik penen sheship berdim.
17 Nahaqlardın' jaqların sındırıp, Oljasın awzınan tartıp alar edim.
18 Sonlıqtan men bılay oylar edim: «Ku'nlerim qum kibi ko'p boladı, Men o'z oshag'ımnın' basında jan beremen,
19 Men tamırı suwg'a tiyip turg'an, Shaqalarına tu'n boyı shıq tu'sip turatug'ın terek yan'lıman.
20 Ataq-abırayım o'se beredi, Qolımdag'ı oq jay jan'alana beredi».
21 Adamlar mag'an sabırlılıq penen qulaq salıp, Ken'eslerimdi u'nsiz tın'lar edi.
22 Menin' so'zlerimnen keyin hesh kim ga'p qospas edi, So'zlerim olarg'a mayday jag'ar edi.
23 Olar meni jawındı ku'tkendey ku'ter edi, So'zlerimdi ba'ha'rdegi jawındı simirgen jer sıyaqlı simirer edi.
24 Olarg'a ku'lip qarasam, ko'zlerine isenbes edi, Ju'zimdegi nurdan olar jigerlener edi.
25 Olarg'a bas bolıp, jol ko'rsetip otırar edim, La'shkerleri arasındag'ı patsha sıyaqlı, Jılag'anlardı jubatatug'ın adam bolıp jasadım.
