Ayup 3 bob
1 Aqırı Ayup tilge kirip, o'zinin' du'nyag'a kelgen ku'nin na'letledi.
2 Ol bılay dedi:
3 – Men tuwılg'an ku'nge na'let jawsın! „Boyına bala pitti“ degen tu'nge na'let jawsın!
4 Sol ku'n tu'nekke aylanıp qalsın! Aspandag'ı Quday da ol ku'ndi eslemesin, Jarıq ta sol ku'nge sa'wle shashpasın.
5 Sol ku'ndi tas tu'nek qaran'g'ılıq iyelep alsın, Ju'zin qara bultlar qaplap alsın, Qaran'g'ılıq sol ku'nnin' hu'reyin ushırsın.
6 Awa, sol tu'ndi tas tu'nek qaran'g'ılıq jutıp jibersin, Ol jıl ku'nleri arasında sanalmasın, Aylardın' birewine de kirmesin.
7 Sol tu'n qısır bolsın, Onda hesh bir shadlıq hawazı esitilmesin.
8 Ku'nlerdi na'letleytug'ınlar, Liwyatandı oyata alatug'ınlar, Sol tu'ndi g'arg'asın.
9 Onın' tan' juldızları so'nip qalsın. Jarıqlıqtı ku'tsin, biraq ol kelmesin, Tan' shug'lasın ko'rmesin.
10 O'ytkeni usı azaptı ko'zlerim ko'rmewi ushın, Sol tu'n anamnın' qursag'ın jappadı.
11 Ne ushın tuwılıp atırıp, o'lmedim eken? Yamasa tuwıla sala, demim tawısılmadı eken?
12 Meni nege dizesine alıp otırdı? Nege meni emizdi eken?
13 Solar bolmag'anda, ha'zir tınısh jatqan bolar edim, Uyıqlap tınım tapqan bolar edim.
14 Qarabaqanalardı o'zlerine qayta tiklep alg'an, Du'nya patshaları ha'm ma'sla'ha'tshileri menen birge bolar edim.
15 Yamasa u'ylerin gu'miske toltırg'an, Altıng'a bay hu'kimdarlar menen birge bolar edim.
16 Yamasa ne ushın o'li tuwılg'an bo'pe sıyaqlı, Ku'n nurın ko'rmegen na'reste sıyaqlı ko'milmedim?
17 Ol du'nyada zalımlar jamanlıq qılıwdı toqtatadı, Harıqqanlar da tınım tabadı.
18 Ol jerde tutqınlar da tınıshlıqtan ra'ha't aladı, Qadag'alawshılardın' baqırısların esitpeydi.
19 Ullı da, kishi de bardur ol jerde, Qul bolsa, xojayınınan azat.
20 Ne ushın azap shegip ju'rgenge nur, Al qayg'ıg'a batqang'a o'mir beriledi eken?
21 Olar o'limin ku'tedi, biraq ol kelmes, A'jelin ko'milgen g'a'ziyneden de beter izler.
22 Eger a'jelin tapsa, Olar quwanıshqa bo'lenip, shadlanar edi.
23 Jolın ko're almaytug'ın adamg'a, Quday aynala do'geregin qaran'g'ılıq penen qorshag'an adamg'a, Ne ushın o'mir beriler eken?
24 Nan jewdin' ornına gu'rsinemen, Ahıw-nalam suw kibi aqpaqta.
25 Neden qorqqan bolsam, sol ju'z berdi, Neden qa'weterlengen bolsam, sol basıma tu'sti.
26 Mag'an tınıshlıq ta, tınım da, ra'ha't te joq, Basıma g'awasatlı ku'n tuwdı.
