Ayup 30 bob
1 Mine endi, o'zimnen jası kishi bolg'anlar u'stimnen ku'lip otır. Olardın' a'kelerin su'riwimdi qorıytug'ın iytlerdin' janına qoyıwg'a da ılayıq ko'rmes edim.
2 Olardın' qollarındag'ı ku'shten mag'an ne payda? Olar ku'sh-quwattan ayırılg'an.
3 Joqshılıq penen ashlıqtan qurıg'an, Olar tu'nde sho'lde ha'm elsiz jerlerde sho'p tamırın kemiredi.
4 Putalardın' tu'binen ashshı sho'pler teredi, Terektin' tamırı – olardın' awqatı.
5 Olar xalıq arasınan quwıp jiberilgen, Urılarg'a baqırg'anday, olardın' izinen baqıradı.
6 Olar saylardın' jıralarında, Jerdegi shuqırlarda ha'm jartaslardag'ı u'n'girlerde jasawg'a ma'jbu'r.
7 Olar putalar arasında ulısıp, Shatlı putalar astında toplanadı.
8 Olar aqmaq, ata tegi belgisiz adamlardın' ulları, Olardı elden qamshılap quwıp shıqqan.
9 Endi bolsa, men olardın' balalarının' qosıg'ına aylandım, Olar ushın ku'lki boldım.
10 Olar mennen tiksinip, janıma jolamaydı, Betime tu'kiriwden de tartınbaydı.
11 Quday menin' oq jayımnın' jibin bosatıp jiberip, meni jerge urg'anı ushın, Olar menin' aldımda o'zlerin jılawlay almaytug'ın boldı.
12 Bul ga'zzaplar menin' on' qaptalımnan hu'jim qılıp, Ayaqlarımnan shalıp, O'zlerinin' nabıt qılatug'ın jolın mag'an qarsı tayarlaydı.
13 Olar jolımdı tosıp, Basıma tu'setug'ın apatshılıqtı tezletedi, Olardı toqtatatug'ın hesh kim joq.
14 Olar omırılg'an u'lken tesikten japırılıp kirip, Topan suwınday u'stime bastıradı.
15 Meni qorqınısh basqan, Abırayım samalg'a suwırılg'anday ushıp ketti, Da'wletim de bult kibi o'tip ketti.
16 Endi janım meni ta'rk etpekte, Qayg'ılı ku'nler meni qorshap aldı.
17 Tu'ni menen su'yeklerim sırqırap, Azarı tınımsız janımdı jeydi.
18 Quday qa'ha'r menen kiyimimnen uslap, Shapanımnın' jag'ası sıyaqlı meni qılqındıradı.
19 Quday meni ılayg'a ılaqtırdı, Men shan' ha'm ku'lge aylandım.
20 Quday, Sag'an jalbarınaman, mag'an juwap bermeysen', Ayaqqa tursam, mag'an tek qarap turasan'.
21 Mag'an rehimsiz bolıp kettin', O'z ku'sh-quwatın' menen meni quwg'ın qılıp atırsan'.
22 Quyın menen meni ko'terip alıp, ılaqtırıp, Dawıldın' ishinde anda-mında zın'g'ıtasan'.
23 Awa, meni o'limge, Barlıq tiri jan ushın tayınlang'an u'yge alıp barajag'ın'dı bilemen.
24 Azap shegip, ja'rdem sorap, pa'riyad etkenge, Hesh kim qarsı qol ko'termes!
25 Ku'ni awır bolg'anlar ushın men jılamadım ba? Jarlılar ushın janım ashımadı ma?
26 Biraq men jaqsılıqtan u'mit qılsam, jamanlıq keldi, Jaqtılıqtı ku'tsem, tu'nek keldi.
27 Ju'regim astan-kesten, tınım bilmeydi, Basıma qayg'ılı ku'nler tu'sken.
28 Qarayıp kettim, biraq quyashtan emes, Jıyın arasında turıp, ja'rdem sorap, pa'riyad etemen.
29 Men sag'allardın' tuwısqanı, U'kilerdin' joldası boldım.
30 Terim qarayıp, tu'lep tu'spekte, Su'yeklerim ıssılıqtan ku'ymekte.
31 Liramnın' dawısı joqlaw aytqanlardın', Sıbızg'ımnın' dawısı jılag'anlardın' dawısına aylandı.
