Ayup 31 bob
1 Qızlarg'a qumarlanıp qaramaw ushın, Ko'zlerim menen kelisim du'zdim.
2 Aspandag'ı Qudaydan alatug'ın payım ne boladı? Joqarıdag'ı Qu'direti ku'shli Qudaydan berilgen miyrasım ne boladı?
3 Ol a'dalatsızlardın' basına apat, Jawızlıq qılg'anlardın' basına ba'le jawdırmay ma?
4 Ol menin' jollarımdı ko'rip, Ha'r bir adımımdı sanamay ma?
5 Eger men jalg'an joldan ju'rip, Ayag'ım hiylege asıqsa,
6 Quday meni tuwrı ta'rezige tartsın, Ha'm Ol menin' pa'kligimdi bilsin.
7 Eger ayaqlarım tuwrı joldan tayg'an, Ju'regim ko'zlerime boysıng'an, Yamasa qollarım haramlang'an bolsa,
8 Onda ekken eginimnin' o'nimin basqalar jesin, Eginlerim tamırı menen suwırılıp qalsın.
9 Eger bir hayal arqalı ju'regim azg'ırılsa, Qon'sımnın' qapısı aldında onın' hayalın an'lıg'an bolsam,
10 Onda menin' hayalım basqanın' biydayın tartsın, Basqa erkekler onın' menen jatsın.
11 Aqırı, bul jerkenishli jınayat, Hu'kim qılınatug'ın gu'na.
12 Sonday isler nabıt bolıw ma'kanına deyin jandırıp baratug'ın ot bolıp, Pu'tkil eginimdi tamırı menen ku'ydirip jiberer edi.
13 Eger qul ha'm shorılarım mag'an arız qılg'anda, Men olarg'a a'dalatsızlıq qılg'an bolsam,
14 Onda Quday ornınan turg'anda, men ne qılaman? Ol esap sorag'anda, Og'an ne dep juwap beremen?
15 Meni anamnın' qursag'ında jaratqan, olardı da jaratpadı ma? Bizlerge qursaqta pishim bergen bir Quday emes pe?
16 Eger men jarlılardın' tilegin orınlamag'an, Jesirlerdin' u'mitin pushqa shıg'arg'an bolsam,
17 Yamasa nanımdı bir o'zim jep, Jetimler menen bo'lispegen bolsam,
18 Jaslıg'ımnan jetimlerge a'kelik qılıp keldim, O'mir boyı jesirlerge g'amxorlıq qıldım.
19 Eger kiyimi bolmag'anı ushın jan berip atırg'andı, Yamasa jamılatug'ın na'rsesiz qalg'an jarlını ko'rip,
20 Olarg'a qoylarımnın' ju'ninen kiyim kiygizbegen bolsam, Olar da ju'rekten mag'an alg'ıs aytpag'an bolsa,
21 Qazıxanada so'zimnin' o'tetug'ınına ko'zim jetip, Jetimge qol ko'tergen bolsam,
22 Onda qollarım iynimnen julınıp tu'sip, Buwınlarınan bo'linip qalsın.
23 Men Qudaydan keletug'ın apattan qorqatug'ın edim, Qudaydın' ullılıg'ın bile tura, onday is qıla almas edim.
24 Eger altıng'a u'mit baylag'an bolsam, Yamasa sap altıng'a: «Sen – menin' u'mitimsen'», – degen bolsam,
25 Baylıg'ımnın' mollıg'ına, Ko'p na'rsege qol jetkizgenime maqtang'an bolsam,
26 Jarqırap turg'an quyashqa qarap, Jımın'lag'an aydın' ju'rgenine qarap,
27 Ju'regim jasırın azg'ırılıp, Qollarımdı su'yip, olarg'a qaray jayıp tabıng'an bolsam,
28 Bul da hu'kimge ılayıqlı gu'na bolar edi. Sebebi men ko'ktegi Qudayg'a opasızlıq qılg'an bolar edim.
29 Eger dushpanımnın' jıg'ılg'anın ko'rip, su'yingen, Apatshılıqqa duwshar bolg'anın ko'rip, quwang'an bolsam,
30 Olardı g'arg'aw arqalı, Awzıma gu'na islewge jol qoymadım.
31 Eger shatırımdag'ılar; «Ayup bergen go'shten jep, Qarnın toyg'ızbag'an bar ma?» – dep soramag'an bolsa,
32 Hesh bir jolawshı ko'shede tu'nemes edi, Qapım olar ushın ba'rqulla ashıq edi.
33 Eger basqalarg'a uqsap, qılmısımdı jasırg'an, Ayıplarımdı sır saqlag'an bolsam,
34 Onda men alamannan qorqqanım ushın, Urıwlaslarımnın' qıynawınan qorqqanım ushın, U'ndemey, qapıdan sırtqa shıqpag'an bolar edim.
35 Qa'ne, meni tın'laytug'ın birew bolsa edi! Mine, men aytqanlarımdı tastıyıqlap, mo'rledim. Qu'direti ku'shli Quday mag'an juwap bersin! Qa'ne endi, dushpanım ayıplawın jazıp, qolıma berse edi!
36 So'zsiz, onı iynimde ko'terip, Basıma tajday etip, kiyip ju'rer edim!
37 Men Qudayg'a atqan ha'r bir adımımnın' esabın berer edim, Xanzada kibi Og'an jaqınlasar edim.
38 Jerim mag'an qarsı pa'riyad etken bolsa, Onın' qarıqları da birge nala qılg'an bolsa,
39 Pulın to'lemey zu'ra'a'tin alg'an bolsam, Onın' iyelerinin' o'limine sebepshi bolg'an bolsam,
40 Onda biyday ornına tiken, Arpa ornına jabayı sho'pler o'sip shıqsın. Solay etip, Ayuptın' so'zi aqırına jetti.
