1 Endi Ayup, aytajag'ımdı tın'lap, Barlıq so'zlerime qulaq salın'!
2 Mine, awzımdı ashtım, So'zlerim tilimnin' ushında dizilip tur.
3 So'zlerim pa'k ju'regimnen shıg'adı, Tilim bilgenin ashıq aytadı.
4 Qudaydın' Ruwxı meni jarattı, Qu'direti ku'shli Qudaydın' demi mag'an o'mir berdi.
5 Qolın'ızdan kelse, mag'an juwap berin', Aldımda turıp, da'liller keltirin'.
6 Qudaydın' aldında men de sizdeymen, Men de ılay bo'leginen jasalg'anman.
7 Sonlıqtan mennen qorqpasan'ız da boladı, Qısıwg'a alıwım sizge awır batpasın.
8 Ga'plerin'izdi o'z qulaqlarım menen esittim, Olar ele qulaqlarımda jan'lap tur.
9 Siz bılay dedin'iz: «Men pa'kpen ha'm gu'nasızban, Minsiz ha'm ayıpsızban.
10 Sonda da, Quday mag'an qarsı sebep izlep atır, Meni O'z dushpanı dep sanamaqta.
11 Ol ayaqlarıma bug'aw salıp, Jollarımdı gu'zetpekte».
12 Biraq sizge aytayın: bul jerde siz nahaqsız, Quday adamzattan ullı.
13 «Hesh bir so'zime juwap bermedi», – dep turıp, Nege Onın' menen tartısıp atırsız?
14 Quday ha'r qıylı jol menen so'yleydi, Al bunı adamlar an'lamaydı da.
15 Adamlar teren' uyqıg'a shu'mgende, To'seklerinde qalg'ıp ketkende, Tu'slerinde, ko'rgen ayanlarında,
16 Quday olardın' qulaqların ashıp, Eskertiwleri menen olardı qorqıtadı.
17 Usılayınsha, Ol adamdı jaman islerinen qaytaradı, 3 Menmenlikten saqlaydı.
18 Janın qa'birden, O'mirin qılıshtan qutqaradı.
19 Yamasa adam to'sek tartıp jatqarılıp, Su'yekleri tınımsız sırqıraw menen jazalanadı.
20 Sonda ol nang'a da qaray almaytug'ın bolıp qaladı, Ha'tte, en' mazalı tag'amlarg'a da ishteyi bolmaydı.
21 Azıp-tozıp, tek su'lderi qaladı, Ko'rinbegen su'yekleri endi anıq ko'zge taslanadı.
22 Onın' janı qa'birge, O'miri jan alıwshı perishtelerge jaqınlasadı.
23 Al eger mın' perishtenin' ishinde adamdı jaqlaytug'ın, Og'an o'zi ushın nenin' tuwrı ekenin bildiretug'ın bir perishte bar bolsa,
24 Onın' miyrimi tu'sip: «Onı qa'birge tu'siwden aman saqlap qala go'r! Men onın' qunın o'teytug'ın to'lem taptım», – dese,
25 Sonda adamnın' denesi jas balanikindey bolıp, Onın' jaslıq shag'ı qaytıp keledi.
26 Son'ınan adam Qudayg'a duwa etedi ha'm Quday onı qabıl etedi. Ol quwanısh penen Qudaydın' da'rgayına keledi, Quday onın' a'dilligin tikleydi.
27 Sonda adam adamlar aldında qosıq aytıp, bılay deydi: «Men gu'na islep, haqıyqattı burmaladım, Biraq onın' jazasın tartpadım.
28 Ol janımdı qa'birden qutqardı, Men jaqtı du'nyanı ko'rip turman».
29 Mine, Quday bul na'rselerdin' ha'mmesin, Eki emes, u'sh emes, qayta-qayta ta'kirarlaydı.
30 Bunı adamnın' janın qa'birden qaytarıw, Og'an o'mirdin' nurın ko'rsetiw ushın solay isleydi.
31 Dıqqat qılın', ha'y Ayup, meni tın'lan', U'ndemen', men so'yleyin.
32 Eger aytatug'ın ga'pin'iz bolsa, aytın', Men sizin' aqlanıwın'ızdı qa'leymen.
33 Eger bolmasa, onda meni tın'lan', U'ndemen', men sizge danalıqtı u'yreteyin.
