Ayup 34 bob
1 Elihu so'zin dawam etip, bılay dedi:
2 – So'zlerimdi tın'lan', ha'y danıshpanlar! Mag'an qulaq salın', ha'y bilimpazlar!
3 Awızdın' awqattın' da'min ajıratqanınday, Qulaq ta so'zlerdin' ma'nisin ayıradı.
4 Kelin'ler, durıs na'rseni tan'lap, Jaqsı na'rseni birgelikte anıqlap alayıq.
5 Mine, Ayup: «Men ayıpsızban, Biraq Quday meni huqıqımnan mahrum etti.
6 Meniki durıs bolsa da, jalg'anshı sanaldım, Men jazıqsız bolsam da, da'rtime em joq», – dedi.
7 Ayupqa uqsag'an adam bar ma? Ol ushın mazaq qılıw suw ishkendey na'rse!
8 Ol jamanlıq islewshiler menen dos tutınıp, Jawızlar menen ju'redi.
9 Ol bılay deydi: «Qudayg'a unaytug'ın islerdi islew, Adamg'a hesh qanday payda keltirmeydi».
10 Ha'y, sanalı adamlar, meni tın'lan'lar! Quday jawızlıq islewden awlaq, Qu'direti ku'shli Quday nahaqlıq islewden awlaq!
11 Ol adamnın' isine say to'lem to'leydi, Ju'rgen jolına say qaytaradı.
12 Haqıyqattan da, Quday jamanlıq qılmaydı, Qu'direti ku'shli Quday a'dillikti burmalamaydı.
13 Jer u'stinen hu'kimdarlıq qılıwdı Og'an kim berdi? Kim Onı pu'tkil du'nyag'a hu'kimdar qılıp qoydı?
14 Eger Quday O'z ruwxın, Demin qaytarıp alıwdı qarar qılsa,
15 Pu'tkil tiri janlar birge nabıt bolar, Adamzat ja'ne topıraqqa qaytqan bolar edi.
16 Aqılın'ız bolsa, mınanı tın'lan', So'zlerime qulaq salın'.
17 A'dalattı jek ko'retug'ın adam hu'kimdar bola ala ma? A'dil ha'm qu'diretli Qudaydı ayıplamaqshımısız?
18 Ol patshag'a: «Sen jaramassan'», – dep, Aqsu'yeklerge: «Sizler zalımsızlar», – deydi.
19 Ol basshılarg'a jaramsaqlanbaydı, Baydı jarlıdan artıq ko'rmeydi. Olardın' ha'mmesin O'z qolları menen jaratqan.
20 Olar tu'n ortasında ko'zdi ashıp-jumg'ansha o'lip ketedi, Qaltıratpa tiyedi de, jan beredi. Ku'shliler de adam qolı tiymey-aq, joq qılınadı.
21 Qudaydın' ko'zleri adamnın' jolın gu'zetip turadı, Ol adam basqan ha'r bir adımdı ko'redi.
22 Jawızlıq islewshiler jasırınıw ushın, Qaran'g'ılıq ta, tu'nek te joq.
23 Ha'r qanday adamdı hu'kim qılıw ushın, Quday waqıt belgilewi sha'rt emes.
24 Ol teksermey-aq, ku'shlilerdi maydalap taslaydı, Olardın' ornına basqalardı qoyadı.
25 Quday olardın' islerin biledi, Sonlıqtan tu'nde olardı awdarıp taslaydı, olar joq boladı.
26 Olardı zalımlıg'ı ushın, Ha'mmenin' ko'z aldında jazalaydı.
27 Olar Qudaydın' izine ermedi, Onın' jolların itibarg'a almadı.
28 Olar sebepli jarlılardın' nalası Og'an jetip keldi, Azap shekkenlerdin' pa'riyadın esitti.
29 Eger Quday u'ndemese, kim Onı ayıplay aladı? Eger Ol ju'zin jasırsa, kim Onı ko're aladı? Quday ha'r bir millet ushın da, ha'r bir adam ushın da birdey.
30 Ol, qudaysızlardın' hu'kimdarlıq qılıp, Xalıqqa duzaq qurıwınan saqlaydı.
31 Qudayg'a: «Men jazamdı aldım, Artıq jamanlıq qılmayman.
32 Ko'rmegenimdi mag'an u'yret, Nahaqlıq qılg'an bolsam, endi islemeymen», – deytug'ının'ız bar ma?
33 So'zlerimnen ju'z burg'anın'ız ushın, Quday sizdi sıylıqlawı kerek pe? Men emes, siz tan'lawın'ız kerek, Ne bilesiz, aytın'.
34 Sanalı adamlar, Meni tın'lap turg'an danalar mag'an:
35 «Ayup bilmegenlikten, solay so'ylep tur, Onın' ga'plerinin' ma'nisi joq», – deydi.
36 Jawız adam sıyaqlı so'ylegeni ushın, Ayup, siz aqırına deyin sınalsan'ız edi!
37 Siz gu'nan'ızg'a qozg'alan'dı da qostın'ız, Aramızda qol shappatlap, Qudayg'a qarsı ga'pti balalattın'ız.
