Ayup 35 bob
1 Elihu so'zin bılay dawam etti:
2 – Ayup, siz: «Qudaydın' aldında haqpan», – deysiz. Usı durıs dep oylaysız ba?
3 Ja'ne de: «Mende qanday artıqmashlıq bar? Gu'na islemew arqalı men nege eristim?» – dep soraysız.
4 Men sizge ha'm dosların'ızg'a juwap beremen.
5 Ko'klerge ko'z jiberip, qaran'lar, Bultlarg'a ko'z jiberin', olar sizlerden biyik.
6 Eger gu'na islesen'iz, bunnan Qudayg'a qanday zıyan keledi? Eger qılmısın'ız ko'beyse, Og'an qanday ta'siri bar?
7 Eger a'dil bolsan'ız, bunnan Qudayg'a ne payda? Yamasa Ol sizlerdin' qolın'ızdan ne aladı?
8 Jawızlıg'ın'ız o'zlerin'izge uqsag'an adamlarg'a zıyan keltiredi. Al a'dilligin'iz bolsa, tek adam balası ushın ta'sir etedi.
9 Eziwshiliktin' ha'dden tıs ko'pliginen adamlar pa'riyad etedi, Ku'shlilerdin' qolınan qutqarıwdı sorap, jalbarınadı.
10 Biraq hesh kim: «Tu'nde qosıqlar inam etken, Menin' Jaratıwshım – Quday qayda eken?
11 Ol bizlerge jer betindegi haywanlarg'a qarag'anda ko'birek u'yretken, Bizlerdi ko'ktegi quslardan aqıllıraq etip jaratqan», – demeydi.
12 Jawız adamlardın' menmenligi sebepli, Adamlar pa'riyad etedi, biraq Quday juwap bermeydi.
13 Awa, Quday bos so'zlerge qulaq salmaydı, Qu'direti ku'shli Quday onı itibarg'a almaydı.
14 Ayup, siz: «Onı ko'rip turg'an joqpan», – deysiz, Biraq dawa-arzın'ız Onın' aldında. Onı ku'te turın'!
15 Endi siz: «Ol qa'ha'rlenip, jaza bermedi, Qılmıs iske de kewil bo'lmeydi», – deysiz.
16 Usılayınsha, siz mıljın' ga'plerdi aytasız, Hesh na'rse bilmey turıp, ga'pti ko'beytip atırsız.
