1 Bunnan ju'regim dirildep, Qanasınan shıg'ıp keteyin deydi.
2 Tın'lan'lar! Onın' gu'rkiregen dawısına, Awzınan shıqqan sestine qulaq tu'rin'ler!
3 Ol pu'tkil aspan astı boylap shaqmaq shaqtıradı, Shaqmaqtın' jaltıldısı jerdin' to'rt ta'repine jetip baradı.
4 Bunnan keyin, Qudaydın' dawısı gu'rkirep shıg'adı, Ol a'jayıp dawısı menen gu'rkireydi, Onın' dawısı esitilgende, u'zliksiz shaqmaq shag'adı.
5 Qudaydın' dawısı a'jayıp ta'rizde gu'rkireydi, Ol bizlerdin' aqılımız jetpeytug'ın ullı islerdi isleydi.
6 Ol qarg'a: «Jerge jaw!» – deydi. Al no'ser jawıng'a: «No'ser bolıp quy!» – deydi.
7 Sonda ha'r bir adam isin toqtatadı, Barlıq adamlar bulardın' Onın' isi ekenin biledi.
8 Jabayı haywanlar o'z inlerine kirip, Uyaların panalaydı.
9 Dawıl o'z ma'kanınan shıg'ıp, Ku'shli samal ayaz alıp keledi.
10 Qudaydın' deminen muz payda boladı, Sheksiz suwlar muzlap qaladı.
11 Qoyıw bultlardı ıg'al menen toydıradı, Olar arqalı shaqmag'ın shaqtıradı.
12 Bultlar Onın' basqarıwında aylanıp ju'redi, Pu'tkil jer betin aylanadı, Bulardın' ha'mmesin Quday o'zlerine buyırg'anı ushın isleydi.
13 Ol geyde adamlardı jazalaw ushın, Al geyde jer ju'zin suwg'arıp, Su'yispenshiligin ko'rsetiw ushın jawın jawdıradı.
14 Ayup, mınalardı tın'lan', Toqtap, Qudaydın' ullı isleri haqqında oylap ko'rin'.
15 Qudaydın' bultlardı qalay basqaratug'ının, O'z bultlarınan shaqmaqtı qalay shaqtıratug'ının bilesiz be?
16 Bultlardın' aspanda qalay qalqıp ju'retug'ının, Bilimi jetik Qudaydın' ka'ramatlı islerin bilesiz be?
17 Qubla samalı esip, jer beti quwrap qalg'anda, Kiyimlerin'iz sizdi terletkende,
18 Qola ayna sıyaqlı qattı aspandı, Siz de Quday sıyaqlı jayıp jibere alasız ba?
19 Qudayg'a ne aytıwımız kerekligin bizlerge u'yretin', Qaran'g'ılıqta bolg'anlıg'ımız sebepli, biz isimizdi qorg'ay almaymız.
20 Menin' so'ylespekshi bolg'anım tuwralı Og'an birew xabarlay ma? Kim o'zinin' nabıt bolıwın qa'leydi?
21 Samal esip, aspandag'ı bultlardı serpip taslag'anda, Jarqırag'an ku'n nurına hesh kim qaray almaydı.
22 Quday arqadan altın nur taratıp kelmekte, Ol a'jayıp saltanatqa bo'lengen.
23 Bizler Qu'direti ku'shli Qudayg'a jete almaymız, Onın' qu'direti ha'm a'dilligi ullı,A'dalatlıg'ı sheksiz, Ol hesh nahaqlıq qılmaydı.
24 Sonlıqtan, ha'y adamlar! Onnan qorqın'lar! O'zin dana dep bilgenlerge Ol itibar bermeydi.
