1 Sen taw eshkisinin' qashan tuwatug'ının bilesen' be? Yamasa suwınnın' balalag'anına qarap turg'anbısan'?
2 Olardın' qansha ay buwaz bolıp ju'retug'ının bilesen' be? Olardın' balalaytug'ın waqtın she?
3 Olar tolg'atqanda, ju'resine otırıp, Balasın du'nyag'a keltiredi.
4 Olardın' balaları ashıq jaylawlarda o'sip, ku'shke toladı, Keyin ketip, qaytıp kelmeydi.
5 Qulang'a erkinlik bergen kim? Jabayı eshektin' arqanın sheship taslag'an kim?
6 Men sho'l dalanı og'an u'y, Shorlı jerlerdi ma'kan qılıp berdim.
7 Ol qaladag'ı shawqım-su'ren u'stinen ku'ledi, Mal aydawshının' baqırısın esitpeydi.
8 Ol otlaw ushın tawlardı sharlap, O'zine ko'k jaylaw izleydi.
9 Jabayı bug'a sag'an xızmet etiwge ırazı bolıp, Senin' qoran'dag'ı aqırın'nın' janında tu'ner me eken?
10 Jerin'di aydatıw ushın, Onı ju'wenlep, gu'ndege qosa alasan' ba?
11 Ku'shli dep, og'an isene alasan' ba? Awır islerin'di og'an tapsıra alasan' ba?
12 Jabayı o'gizdin' eginin'di tasıp, Qırmanın'a alıp keletug'ınına isenesen' be?
13 Tu'yequs qanatların ga'rdiyip qaqsa da, Ol la'ylektin' qanat ha'm pa'rine jetpeydi.
14 Tu'yequs ma'yeklerin jerge qaldırıp ketedi, Al qum olardı jılıtadı.
15 Ma'yekler ayaq astında qalıp, eziledi, Jabayı haywan olardı basıp ketpey me, bunı hesh oylamaydı.
16 Tu'yequs o'z balalarına basqaniki sıyaqlı qatal, Miynetinin' ku'yip ketiwinen qa'weterlenbeydi.
17 O'ytkeni Men onı danalıqtan mahrum etkenmen, 9 Og'an aqıl da bermegenmen.
18 Biraq tu'yequs qanat jayıp juwırg'anda, At ha'm shabandozdı izde qaldırıp, u'stinen ku'ledi.
19 Atqa ku'sh bergen, Onın' jelkesine jal o'sirgen,
20 Onı shegirtke kibi sekiretug'ın qılg'an sen be edin'? Onın' pısqırıp kisnegeninin' o'zi qorqınıshlı.
21 At tuyaqları menen jer tepsinip, o'z ku'shine quwanıp, Dushpannın' u'stine qaray shabadı.
22 Ol qorqınısh u'stinen ku'lip qarap, hesh na'rseden seskenbeydi, Qılıshtan da qaymıqpaydı.
23 Oq salıng'an qap u'stinde shın'g'ırlaydı, Nayza ha'm semser jaltıldaydı.
24 G'a'zep penen reyimsiz jerdi tepkilep, Ka'rnay sestin esitkende, bir jerde turmaydı,
25 Ka'rnay shertilgen sayın kisnep, Sawashtın' iyisin alıstan sezedi, Sa'rka'rdalardın' shawqım-su'renlerin esitedi.
26 Qarshıg'anın' qublag'a qaray qanat jayıp, Biyiklep ushatug'ını senin' danalıg'ın'nın' arqası ma?
27 Bu'rkit senin' buyrıg'ın' menen ko'terilip ushıp, Biyiklikke uya sala ma?
28 Ol jartaslar u'stine ma'kan basıp, sol jerde jasaydı, Jartastın' usha bası – onın' qorg'anı.
29 Ol sol jerde turıp, an' awlaydı, Onın' ko'zleri oljasın uzaqtan ko'redi.
30 Palapanları qan sorıydı, O'lik qay jerde bolsa, ol da sol jerde boladı.
31 Jaratqan İye so'zin dawam etip, Ayupqa bılay dedi:
32 – Qu'direti ku'shli Quday menen tartısıp atırg'an adam endi Onı jolg'a salmaqshı ma? Qudaydı ayıplap atırg'an adam juwap bersin.
33 Sonda Ayup Jaratqan İyege bılay dep juwap berdi:
34 – Men sanda joq bir adamman, Sag'an ne dep juwap bereyin? Endi awzıma bek bolaman.
35 Bir ret so'yledim, biraq juwap bere almadım, Ekinshi ret so'yledim, biraq artıq so'ylemeymen.
