Ayup 4 bob
1 Sonda temanlı Elifaz Ayupqa bılay dedi:
2 – Eger birew sag'an so'z aytpaqshı bolsa, Sag'an awır batpay ma?Aqırı, kim so'ylewden o'zin tıyıp tura aladı?
3 Eslep ko'r, sen ko'plerge ta'lim berer, Ha'lsizlerdi jigerlendirip, ku'sh berer edin'.
4 Senin' so'zlerin' jıg'ılg'ang'a tirek bolıp, Dizeleri qaltırap, ha'lsiregenlerge ku'sh beretug'ın edi.
5 Al endi sol na'rseler o'z basın'a tu'skende, tu'skinlikke tu'sip qalıpsan', O'zin' baxıtsızlıqqa ushırag'anda, ruwxın' tu'sip ketipti.
6 Qudaydan qorqıwın' – isenimin'nin', Minsiz jasawın' – u'mitin'nin' belgisi emes pe?
7 Oylap ko'rshi: qashan ayıpsız adam nabıt bolıp, A'dil adam joq qılıng'an edi?
8 Menin' ko'rgenim mınaw: kim jawızlıqtı shu'digarlap, G'am-qayg'ı tuqımın ekse, sonı orıp aladı.
9 Olar Qudaydın' u'plegen deminen nabıt boladı, Onın' g'a'zebinin' dawılınan joq boladı.
10 Arıslanlar aqırıp, ırıldassın, Biraq Quday jırtqısh arıslanlardın' tislerin sındıradı.
11 Sonda arıslan oljasız o'lip ketedi, Jetim qalg'an balaları tarap ketedi.
12 Mag'an jasırınsha bir so'z keldi, Sıbırlısı qulag'ıma shalındı.
13 Tu'ngi ta'shiwishli tu'sten tuwg'an oylar ishinde, Adamlar qattı uyqıg'a shu'mgen waqıtta,
14 Meni qorqıw biylep alıp, qaltıratpa bastı, Pu'tkil denem la'rzege keldi.
15 Samal betimdi sıypap o'tti, Sonda to'be shashım tik turdı.
16 Bir su'lder turg'anday boldı, Biraq men onın' ne ekenin tu'sinbedim. Ko'z aldımda bir tulg'a payda boldı, Tınıshlıq hu'kim su'rdi ha'm men o'lpen' dawıstı esittim:
17 «Basında o'limi bar adam Qudaydın' aldında a'dil bola ala ma? Adam o'z Jaratıwshısının' aldında pa'k bola ala ma?
18 Quday, ha'tte, O'zinin' aspandag'ı xızmetshilerine de isenbeydi, Ha'tte, perishtelerinen de kemshilik tabadı.
19 Sonda tiykarı topıraqtan bolg'an, Ilaydan jaratılg'an, Ja'nliktey an'sat jenshilip qalatug'ınlarg'a ne boladı?
20 Olar ku'n shıqqannan ımırt jabılg'ang'a shekemgi aralıqta nabıt boladı, Olardın' ma'n'gige joq bolg'anın bayqamay da qalasan'.
21 Olardın' shatırlarının' ishindegi jipleri u'zilgen, Danalıqtan xabarsız o'lip ketedi».
