1 Jaratqan İye quyın ishinen Ayupqa ja'ne bılay dedi:
2 Erkek kibi belin'di bekkem buw, Men sorayman, sen juwap ber.
3 Sen Meni a'dalatsızlıqta ayıplamaqshımısan'? O'zin'di aqlaw ushın meni qaralamaqshımısan'?
4 Sende Qudaydın', yag'nıy Menin' qu'diretimdey qu'diret bar ma? Dawısın' Meniki sıyaqlı gu'rkirey ala ma?
5 Eger solay bolsa, onda o'zin'di dan'q ha'm ba'lent ma'rtebe menen beze, Ullılıq ha'm saltanatqa bo'len.
6 G'a'zebin'di to'gip, shash, Ta'kabbirlerge ko'z salıp, olardı boysındır.
7 Ta'kabbirlerge na'zer salıp, olardı diz sho'ktir. Jawızlardı turg'an jerinde mıljalap tasla.
8 Olardın' ha'mmesin birge topıraqqa ko'm, Ju'zin kepinge orap, qaran'g'ı du'nyag'a baylap qoy.
9 Sonda on' qolın'nın' seni qutqarg'anın, Men de moynıma alayın.
10 Mına begemotqa qara, Seni jaratqanım sıyaqlı, onı da Men jarattım. Ol o'giz sıyaqlı sho'p jeydi.
11 Onın' belinde ne degen ku'shi bar, Qarnındag'ı bulshıq etleri qanday bekkem!
12 Onın' quyrıg'ı kedr ag'ashı sıyaqlı mıqlı, Jambasındag'ı sin'irleri o'rim-o'rim.
13 Su'yekleri qola bo'renelerge, Qabırg'aları temir baqanlarg'a uqsaydı.
14 Begemot Menin' jaratqanlarım ishindegi en' a'jayıbı, Jaratqannın' O'zi g'ana og'an qılısh ko'tere aladı.
15 Tawlar og'an azıq beredi, Ol jerde barlıq jabayı haywanlar oynaqlap ju'redi.
16 Begemot lotos japırag'ı astında, Batpaqlıqta o'sken qamıslar arasında jatadı.
17 Lotos japıraqları og'an ko'len'ke tu'sirip, Da'rya boyındag'ı tallar onı orap turadı.
18 Da'rya burqasınlap aqsa da, ol qorqpaydı, İordan tasıp, awzına kelse de, og'an ta'sir etpeydi.
19 Kim onı ko'zine tu'spey, tuta aladı? Kim onın' murnınan ilmek o'tkere aladı?
20 Al Liwyatandı she, balıq uslaytug'ın qarmaq penen uslap, Tilin jip penen baylay alasan' ba?
21 Onın' murnınan jip o'tkizip, Jag'ına qarmaq ildire alasan' ba?
22 Ol sag'an qayta-qayta jalınıp-jalbarınıp, Senin' menen jıllı so'yleser me eken?
23 Sag'an ma'n'gige qul bolıw ushın, Senin' menen kelisim du'zer me eken?
24 Qus penen oynag'an sıyaqlı, onın' menen oynay alasan' ba? Yamasa ermek qılıwı ushın, qızların'a onı baylap bere alasan' ba?
25 Balıqshılar onın' ushın sawdalasa ma? Sawdagerler onı o'z ara bo'lisip ala ma?
26 Onın' terisin nayza menen, Basın balıqshının' shanıshqısı menen tese alasan' ba?
27 Qolın'dı og'an tiygizip ko'r, Ekinshi ma'rte tiygizbeytug'ın bolasan', Bul sawashtı da hesh qashan umıtpaytug'ın bolasan'.
