1 Liwyatandı tutıwg'a u'mit etiw paydasız, Onın' qarası ko'riniwden-aq, qorqınıshtan adamnın' ju'regi jarıladı.
2 Onı qozg'awg'a hesh kimnin' batılı barmaydı. Solay eken, onda kim Menin' aldımda tura aladı?
3 Og'an qarızdar bolıp qalatug'ınday, kim Mag'an bir na'rse berdi eken? Aspan astındag'ı ha'mme na'rse – Meniki.
4 Men Liwyatannın' dene ag'zaları, Ullı ku'shi ha'm a'jayıp denesi haqqında aytıp bereyin.
5 Kim onın' terisin sılıp ala aladı? Kim onın' eki qabat sawıtın tesip zaqımlay aladı?
6 Kim onın' awzın ashıp ko're aladı? Onın' awzındag'ı tisleri qorqınıshlı.
7 Arqası qatar-qatar qalqannan islengen, Olar mo'r basılg'anday etip, bir-birine tıg'ız bekkemlengen.
8 Olardın' bir-birine jaqın jaylasqanı sonshelli, Arasınan hawa da o'tpeydi.
9 Olar bir-birine tıg'ızlanıp, jabıstırılg'an, Olardı ajıratıw mu'mkin emes.
10 Liwyatan tu'shkirgende, ot shashadı, Onın' ko'zleri tan' nurı sıyaqlı jaynap turadı.
11 Awzınan jalın lawlap, Ot ushqınları shashıraydı.
12 Murnınan shıqqan tu'tin, Janıp turg'an qamıs u'stinde qaynap turg'an qazannın' puwına uqsaydı.
13 Demi ko'mirdi alıstıradı, Awzınan jalın shashadı.
14 Onın' ku'shi moynında, Onın' aldında qorqınısh oyıng'a tu'sedi.
15 Etinin' qabatları bir-birine bekkem jabısqan, Quymag'a uqsaydı, hesh terbelmeydi.
16 Ju'regi tastay, Digirmannın' astıng'ı tasınday qattı.
17 Ol ornınan turg'anda, ku'shlilerdin' de hu'reyi ushadı, Qorqınıshtan artqa sheginedi.
18 Onı qılısh ta kespeydi, Og'an nayza da, qanjar da, oq ta o'tpeydi.
19 Temir og'an saban kibi, Qola shirigen terek kibi ko'rinedi.
20 Atılg'an oqlar onı qashıwg'a ma'jbu'rley almaydı, Saqpannan atılg'an tas ol ushın qawıqtay na'rse.
21 Shoqmar menen urg'an og'an saban menen urg'anday, O'zine ılaqtırılg'an semserlerdin' sestine ku'ledi.
22 Denesinin' astıng'ı ten'geleri gu'zenin' o'tkir sınıqlarına uqsaydı, Ilaydın' u'stinde jatsa, tu'yek aydalg'anday iz qaldıradı.
23 Tu'psiz teren' iyirimdi ol qazan kibi qaynatadı, Ten'izdi qaynap turg'an may kibi tastıradı.
24 Ol izinde nurlı iz qaldıradı, Ko'rgenler ten'izdin' aq shashı bar dep oylaydı.
25 Jer betinde onın' ten'i-tayı joq, Ol qorqınıshtı bilmeytug'ın etip jaratılg'an.
26 Ol barlıq ta'kabbirlerge pa's na'zer menen qaraydı, Ha'm barlıq menmenlerdin' patshası.
