Ayup 42 bob
1 Sonda Ayup Jaratqan İyege bılay dep juwap berdi:
2 – Men bilemen, Senin' qolın'nan ha'mme na'rse keledi, Niyetin'e kesent etiw de mu'mkin emes.
3 Sen: «Bilimsizlik penen Menin' qararımdı qaralap atırg'an mına adam kim o'zi?» – dep sorag'an edin'. Awa, men o'zim tu'sinbegen na'rseler haqqında, Hasla tu'siniwge aqılım jetpeytug'ın ullı isler haqqında so'yledim.
4 Sen ja'ne: «Sen dıqqat penen tın'la, Men so'yleyin, Men sorayın, sen juwap ber», – degen edin'.
5 Burın men Sen tuwralı tek qulaqlarım menen esitken edim, Al ha'zir Seni o'z ko'zlerim menen ko'rip turman.
6 Sonlıqtan burıng'ı aytqanlarıma o'kinip, Ta'wbe qılıp, topıraq penen ku'lde otırman.
7 Jaratqan İye Ayup penen so'ylesip bolg'annan son', temanlı Elifazg'a til qatıp, bılay dedi: «Menin' sag'an ha'm senin' eki dostın'a qa'ha'rim keldi. Sizler Men tuwralı qulım Ayup sıyaqlı durıs so'ylemedin'ler.
8 Endi jeti bug'a ha'm jeti qoshqar alıp, qulım Ayupqa barın'lar ha'm o'zlerin'iz ushın jandırılatug'ın qurbanlıq usının'lar. Qulım Ayup sizler ushın duwa etedi. Men onın' duwasın qabıl etemen ha'm aqmaqlıg'ın'ız ushın sizlerdi jazalamayman. Sizler Men tuwralı qulım Ayup sıyaqlı durıs so'ylemedin'ler».
9 Solay etip, temanlı Elifaz, shuwaxlı Bildad ha'm naamalı Sofar Jaratqan İyenin' aytqanların orınladı. Jaratqan İye de Ayuptın' duwasın qabıl etti.
10 Ayup dosları ushın duwa etkennen son', Jaratqan İye onın' haljag'dayın burıng'ı qa'lpine keltirip, burın bolg'an na'rselerinin' ha'mmesin eki ese qılıp qaytarıp berdi.
11 Ayuptın' ag'a-inileri, apa-qarındasları ha'm onı burın tanıg'annın' ha'mmesi onın' u'yine kelip, Ayup penen birge awqatlandı. Olar Jaratqan İyenin' basına salg'an barlıq sınaqları ushın Ayupqa kewil ayttı ha'm ta'selle berdi. Olardın' ha'r biri Ayupqa bir ten'ge gu'mis ha'm bir altın sırg'adan sıyg'a berdi.
12 Jaratqan İye Ayuptın' son'g'ı ku'nlerin burıng'ısınan da beter jarılqadı. Endi onda on to'rt mın' qoy, altı mın' tu'ye, bir mın' jup o'giz ha'm mın' urg'ashı eshek boldı.
13 Ja'ne de, Ayuptın' jeti ul ha'm u'sh qızı boldı.
14 Ol birinshi qızına Emima, ekinshisine Kesia, u'shinshisine KerenHappux dep at qoydı.
15 U'lkenin' hesh bir jerinde Ayuptın' qızlarınday sulıw qızlar bolmadı. A'kesi Ayup qızlarına ag'a-inileri menen birdey miyras ajıratıp, enshige berdi.
16 Bunnan keyin, Ayup ja'ne bir ju'z qırıq jıl jasap, to'rt a'wlad ko'rdi.
17 Solay etip, Ayup uzaq ha'm mazmunlı o'mir su'rip, du'nyadan ko'z jumdı.
