Ayup 5 bob
1 – Al endi, Ayup, shaqırg'ın' kelse, shaqır! Sag'an juwap bergendey, birew bar ma eken? Perishtelerdin' qaysısınan ja'rdem soramaqshısan'?
2 Ashıw-g'a'zep aqmaqtı nabıt qılar, Ku'nshillik sadanı o'ltirer,
3 Men aqmaqtın' tamır jayg'anın ko'rdim, Biraq tosattan onın' u'y-ishi g'arg'ısqa ushıradı.
4 Onın' balaları amanlıqtan awlaq bolar, Hu'kim waqtında eziler, Biraq olardı jaqlaytug'ın hesh kim bolmas.
5 Onın' zu'ra'a'tin ashlar jep qoyar, Ha'tte, tikenler arasında o'skenlerin de. Ashko'zler mal-mu'lkin de alıp keter.
6 Jawızlıq jerden o'sip shıqpaydı, G'am-qayg'ı da atızda o'speydi.
7 Degen menen, ot ushqınının' joqarı qarap ushqanı sıyaqlı, Azap shegiw ushın tuwılar insan.
8 Biraq men Qudaydı izlegen, Dawa-arzımdı Og'an tapsırg'an bolar edim.
9 Ol aqılg'a sıymaytug'ın, ullı islerdi islep, Sansız ka'ramatlar ko'rseter.
10 Ol jer betine jawın jawdırıp, Atızlardı suwg'arar.
11 Ol to'men awhaldag'ılardı joqarı ko'terip, Qayg'ıg'a batqanlardı qa'wipsizlikke shıg'arar.
12 Ol hiylekerlerdin' niyetlerine tosqınlıq jasap, Olardı tabıstan mahrum eter.
13 Ol hiylekerlerdin' niyetlerine tosqınlıq jasap, Olardı tabıstan mahrum eter.
14 Ku'ndiz olar qaran'g'ılıqqa tap bolar, Tal tu'ste de tu'ndegidey sıypalanıp ju'rer.
15 Quday jarlını jamanlardın' ashshı so'zlerinen, Ku'shlilerdin' qolınan qutqarar.
16 Solay eken, ka'mbag'allarda u'mit bar, Nahaqlardın' awzı jabılar.
17 Quday eskertip, du'zetetug'ın adam qanday baxıtlı! Sonlıqtan Qu'direti ku'shli Qudaydın' u'git-na'siyatın pisent etpey ju'rme.
18 Ol jaralaydı ha'm O'zi onı tan'adı, Ol zıyan keltiredi, biraq O'z qolı menen shıpalaydı.
19 Ol seni altı baxıtsızlıqtan qutqaradı, Jetinshi apat ta sag'an zıyan keltire almaydı.
20 Asharshılıqta o'limnen, Urısta qılıshtan saqlaydı.
21 Ol seni til ba'lesinen qorg'aydı, Apat kelgende qorqpaytug'ın bolasan'.
22 Wayranshılıq ha'm ashlıq u'stinen ku'letug'ın bolasan', Jabayı haywanlardan da qorqpaytug'ın bolasan'.
23 Atızdag'ı taslar menen til tabısasan', Jabayı haywanlar da senin' menen tatıw boladı.
24 Sen u'yin'nin' qa'wipsizlik ishinde ekenin bilesen', Su'riw ha'm padaların'dı ko'zden o'tkergenin'de, hesh na'rsen'nin' jog'almag'anın ko'resen'.
25 Senin' sansız balaların' boladı, Urpag'ın' jer betindegi sho'p sıyaqlı mol boladı.
26 O'z waqtında buwılg'an biyday bawı kibi, Jasarın'dı jasap, qa'birin'e kiresen'.
27 Mine, bizler bunı izertledik, ha'mmesi haqıyqat eken, Usılardı tın'lap, qabıl qıl.
