Ayup 6 bob
1 Sonda Ayup bılay dep juwap berdi:
2 – Ah, eger menin' shegip atırg'an qayg'ım o'lshenip, Men ko'rgen apatshılıq ta'rezige tartılsa edi!
3 Olar ten'iz qumınan da awır bolar edi. Sonlıqtan oylanbay so'yledim.
4 Qu'direti ku'shli Qudaydın' oqları deneme qadaldı, Ruwxım olardın' za'ha'rin ishpekte, Quday jibergen qorqınısh mag'an qarsı sapqa dizilgen.
5 Qulannın' jaylawda otı mol bolsa, an'qırar ma edi? Yamasa o'giz aqırının' basında mo'n'irer me edi?
6 Awqattın' duzsız da'mi bola ma? Yamasa ma'yektin' aq uwızında da'm bar ma?
7 Bunday awqatlardan da'm tatqım kelmeydi, Onday awqatlardan ju'regim aynıydı.
8 Eger tilegim orınlanıp, Quday a'rmanıma jetkizse edi!
9 Quday meni ezip taslasa edi, Qolın sozıp janımdı alsa edi!
10 Sonda men jubanısh tabar edim, Qattı awırıp atırsam da, quwanar edim. Sebebi men muxaddes Qudaydın' so'zlerinen ju'z burmadım.
11 Ku'shti qaydan tabaman ku'tetug'ınday? Aqıbetim ne bolar sabır qılatug'ınday?
12 Menin' ku'shim tastan ba edi? Yamasa denem temirden be edi?
13 O'zime o'zim ja'rdem bergendey ku'shim qaldı ma? Tabıs ta meni ta'rk etti.
14 Dostına miyrim ko'rsetiwden bas tartqan adam, Qu'direti ku'shli Qudaydan qorqıwdan waz keshken adam boladı.
15 Doslarım, sizler de qurıp qalg'an say kibi turaqsızsız, Ag'ıp ketetug'ın say suwlarına uqsaysız.
16 Olar muz erigende ılaylanıp tasıp, Qar suwlarına tolıp ketedi.
17 Biraq qurg'aq ma'wsimde olardın' suwları tartılıp, Issıda joq bolıp ketedi.
18 Ka'rwanlar suw izlep, bag'ıtın o'zgerter, Sho'lge kirip ketip, nabıt bolar.
19 Tema jurtının' ka'rwanları suw izler, Sheba jurtının' sawdagerleri u'mit penen qarar.
20 Olar o'z u'mitine aldanar, Sol jerge kelip, albırap qalar.
21 Sizler de men ushın sol saylar sıyaqlısız, Menin' qorqınıshlı awhalımdı ko'rip, hu'reyin'iz ushıp ketti.
22 Men sizlerden sawg'a sorap pa edim? Yamasa men ushın baylıg'ın'ızdan to'lem to'len' dedim be?
23 Meni dushpan qolınan qutqarın' dep jalındım ba? Yamasa qaraqshılardın' qolınan meni satıp alın' dedim be?
24 Mag'an u'yretin', u'ndemey turayın, Ko'rsetin'ler, men nede aljastım?
25 Tuwrı so'z qanday ashshı! Biraq sizlerdin' ayıplawların'ız neni da'lilleydi?
26 Sizler menin' so'zlerimdi du'zetpekshimisiz? Ezilgen adamnın' so'zlerin itibarg'a ılayıqsız dep sanaysızlar ma?
27 Sizler, ha'tte, jetimler ushın shek taslawdan, Dosların'ızdı sawdag'a salıp, satıwdan tayınbas edin'iz.
28 Endi o'tinemen, mag'an qaran'lar, Betin'izge qarap, o'tirik so'ylemeymen g'oy.
29 Raydan qaytın', endi a'dalatsız bolman'lar, Raydan qaytın', men haqpan!
30 Yamasa awzımnan a'dalatsız so'zler shıqqan ba edi? Yaki tilim apatshılıqtın' da'min ayıra almay ma?
