Ayup 7 bob
1 Adamnın' jerdegi turmısı awır miynetten ibarat emes pe? Onın' ku'nleri ku'nlikshinin' ku'nine uqsamay ma?
2 Adam keshki ko'len'keni an'sag'an qulg'a, Miynet haqısın ku'tken ku'nlikshige uqsaydı.
3 Sol sıyaqlı, u'les etip ma'nissiz aylar berildi, Payıma azaplı kesheler tiydi.
4 Jatqanımda: «Qashan turar ekenmen?» – dep aytaman, Biraq tu'n uzaqqa sozılıp, Tan' atqansha, o'rden-ıqqa awnap shıg'aman.
5 Denemdi qurt penen jara basqan, Terim tesilip, irin' aqpaqta.
6 Ku'nlerim toqıwshının' ma'kisinen de tezirek o'tpekte, Biraq u'mitsiz juwmaqlanbaqta.
7 Quday, o'mirimnin' bir dem sıyaqlı ekenin umıtpa, Ko'zim endi qaytıp jaqsılıqtı ko'rmeydi.
8 Meni ko'rip turg'an ko'zlerin' keyin meni ko'rmeydi, Ko'zlerin' meni izleydi, biraq men joq bolaman.
9 Bulttın' serpilip, joq bolıp ketkenindey, O'liler ma'kanına ketken adam da qaytıp kelmeydi.
10 Ol u'yine qaytıp kelmeydi, Jasag'an jeri de endi onı eske almaydı.
11 Sonın' ushın awzıma erk beremen, O'z da'rtimdi bayan etemen. Janımnın' azabı ishinde shag'ım etemen.
12 Qudayım, Sen mag'an saqshı qoyatug'ınday, Men ne, ten'iz yamasa ten'iz aydarhası ma edim?
13 To'segim mag'an ta'selle berer, Jatsam, da'rtim jen'illeser, dep oylasam,
14 Meni tu'sler arqalı qorqıtıp, Ayanlar arqalı za'rremdi ushırasan'.
15 Bul denede jasag'annan go're, Buwılıp, o'lgenim jaqsı edi.
16 Men jasawdan toydım, ma'n'gi jasawdı qa'lemeymen, Meni tınısh qoy, o'mirim o'zi bir demdey g'ana.
17 İnsan kim o'zi, onı sonsha qa'dirlep, Og'an dıqqat qoyasan',
18 Ha'r tan'da onı tekserip, Ha'r sa'tte onı sınaysan'?
19 Qashang'a shekem mennen ko'z u'zbeysen'? Tu'kirigimdi jutıp alg'ansha da, meni tınısh qoymaqshı emespisen'?
20 Eger gu'na islegen bolsam, Sag'an ne ta'siri bar, adamzattın' Gu'zetshisi? Ne ushın meni O'zin'e nıshan qılıp qoydın'? Men Sag'an sonshelli ju'k boldım ba?
21 Ne ushın qılmıslarımdı keshirip, Gu'nalarımdı mennen alıp taslamaysan'? Sebebi tez arada topıraqqa qaytaman. Meni izleysen', biraq men joq bolaman.
