Ayup 9 bob
1 Sonda Ayup bılay dep juwap berdi:
2 – Awa, ıras, bunın' sonday ekenin men de bilemen, Biraq insan Qudaydın' aldında qalay aqlana aladı?
3 Eger adam Quday menen tartıspaqshı bolsa da, Ol bergen mın' sorawdan birewine de juwap bere almas edi.
4 Qudaydın' danalıg'ı teren', qu'direti ku'shli, Onın' menen qasarısıp, Kim aman qala aldı?
5 Aldın ala eskertpey-aq, Ol tawlardı jıljıtar, G'a'zeplengende, olardı awdarıp taslar.
6 6Ol jerdi ornınan qozg'ap, silkiter, Onın' tireklerin titireter.
7 Ol quyashqa buyrıq berse, quyash uyasınan shıqpay qoyar, Juldızlardı da qulıplap qoyar.
8 Onın' jalg'ız O'zi ko'klerdi jayg'an, Ol ten'iz tolqınları u'stinde ju'rer.
9 Ol Jeti qaraqshını, Oriondı, U'rkerdi ha'm qubladag'ı juldızlardın' ha'mmesin jarattı.
10 Ol aqılg'a sıymaytug'ın, ullı islerdi islep, Sansız ka'ramatlar ko'rseter.
11 Eger Ol qasımnan o'tip ketse de, men Onı ko'rmeymen, Jaqınlap o'tip ketse de, men Onı bayqamayman.
12 Eger Ol alıp qoysa, Onı kim toqtata aladı? Kim Og'an: «Sen ne qılıp atırsan'?» – dep ayta aladı?
13 Quday O'z g'a'zebin tutıp turmaydı, Rahabtın' ja'rdemshileri de Onın' ayag'ına jıg'ıladı.
14 Solay eken, men qalay Og'an juwap bere alaman? Og'an aytıw ushın so'zlerdi qaydan tabaman?
15 Ayıpsız bolsam da, Og'an juwap bere almas edim, Men tek Qazımnan rehim etiwin g'ana sorap jalbarınar edim.
16 Eger Onı dawıslap shaqırsam, Ol da mag'an juwap berse edi. Biraq, menin' dawısıma qulaq salatug'ınına isenbeymen.
17 Ol meni du'beley menen soqqılap, azap bermekte, Ayıpsızdan ayıpsız jaralarımdı ko'beytpekte.
18 Ol dem alıwg'a da jol qoymaydı, Ju'regimdi qayg'ıg'a toltırıp atır.
19 Eger ku'sh sınalsa, Ol ku'shli! Eger a'dalat soralsa, Onı kim qazıxanag'a alıp kele aladı?
20 Ayıpsız bolsam da, o'z awzım meni ayıplı eter, Eger, ha'tte, minsiz bolsam da, Ol meni nahaqqa shıg'arar.
21 Men minsizben, biraq endi mag'an ba'ri bir, O'z o'mirimnen tu'n'ilip turman.
22 Awa, ba'ri bir eken. Sonlıqtan men bılay deymen: «Quday ayıpsızdı da, zalımdı da nabıt qıladı».
23 Baxıtsızlıq tosattan o'lim keltirse, Ol ayıpsızlardın' basına tu'sken apatqa ku'ledi.
24 Jer ju'zi zalımlardın' qolına berilgen, Ol onın' qazılarının' ko'zin jawıp qoyg'an. Eger bunı Ol islemegen bolsa, onda basqa kim eken?
25 Ku'nlerim juwırıwshıdan da tez juwırıp o'tpekte, Olar jaqsılıq ko'rmey-aq, o'tip ketpekte.
26 Olar qamıs qayıq sıyaqlı, Oljag'a taslang'an bu'rkit sıyaqlı, tez ko'zden g'ayıp boladı.
27 Eger men: «Shag'ımımdı umıtayın, Qayg'ılı tu'rimdi o'zgertip, ku'limsireyin», – desem de,
28 Ba'ri bir ko'retug'ın azabımnan qorqar edim. Bilemen, Sen meni ayıpsız dep sanamaysan'.
29 Eger ayıplı dep tabılg'an ekenmen, Onda bostan-bosqa gu'resip ne qılaman?
30 Ha'tte, qar suwına juwınsam da, Qollarımdı sabın menen juwsam da,
31 Ba'ri bir Sen meni ılay shuqırg'a taslaysan', Ha'tte, kiyimlerim de mennen jerkenedi.
32 Quday men sıyaqlı insan bolmag'anlıqtan, Men Og'an juwap bere almayman, Onın' menen birge qazıxanag'a da bara almayman+.
33 Qolın ekewimizdin' u'stimizge qoyıp, jarastıratug'ın, Aramızda bir da'ldalshı bolsa edi!
34 Hasasın u'stimnen alıp taslasa edi Quday, Qorqınıshı da meni qorqıtıwdı toqtatsa edi!
35 Sonda men Onnan qorqpastan, Onın' menen so'yleser edim, Biraq bul awhalda hesh na'rse qıla almayman.
