1 Jaratqan İyeni ta'riyiplen', Ol iygilikli, Su'yispenshiligi ma'n'gi dawam etedi.
2 Solay desin Jaratqan İyenin' qutqarg'anları, Dushpan qolınan azat etip alg'anları,
3 Shıg'ıs, batıs, arqa ha'm qubladan, Shet ellerden jıynap alg'anları.
4 Bazıları izsiz dalalarda gezip ju'rdi, Ma'kanlaw ushın qalag'a jol tappadı.
5 Ash bolıp, sho'llep qaldı, Janları ha'lsirep, o'le jazladı.
6 Sonda olar ha'siret shegip, Jaratqan İyege jalbarındı, Jaratqan İye olardı azaptan azat etti.
7 Ma'kanlay alatug'ın qalag'a olardı, Tuwrı jol menen jetelep, baslap bardı.
8 Alg'ıslar aytsın Jaratqan İyege su'yispenshiligi ushın, Adamlarg'a islegen a'jayıp isleri ushın.
9 Ol sho'llegennin' sho'lin qandırdı, Ash bolg'andı jaqsı azıqlar menen toydırdı.
10 Bazıları tas tu'nek qaran'g'ılıqta, Shınjırlanıp, azap ishinde otırdı.
11 Olar Qudaydın' so'zlerine qarsı shıg'ıp, Quday Taalanın' u'gitna'siyatların mensinbegen edi.
12 Ol awır jumıslar menen olardın' ko'kiregin bastı, Jıg'ılg'anda, ja'rdem beretug'ın hesh kim bolmadı.
13 Sonda olar ha'siret shegip, Jaratqan İyege jalbarındı, Jaratqan İye olardı azaptan qutqardı.
14 Alıp shıqtı tas tu'nek qaran'g'ılıqtan, U'zip tasladı shınjırların.
15 Alg'ıslar aytsın Jaratqan İyege su'yispenshiligi ushın, Adamlarg'a islegen a'jayıp isleri ushın!
16 Ol qola da'rwazalardı sındırdı, Temir ta'mbilerdi ekige bo'lip tasladı.
17 Bazıları jınayat qılıp, aqmaqtay boldı, Gu'naları sebepli azap shekti.
18 Barlıq azıq-awqattan ju'rekleri aynıp, O'lim awzına jaqınlap qaldı.
19 Sonda olar ha'siret shegip, Jaratqan İyege jalbarındı, Jaratqan İye olardı azaptan qutqardı.
20 So'zin jiberip, shıpaladı, Qa'birden olardı qutqardı.
21 Alg'ıslar aytsın Jaratqan İyege su'yispenshiligi ushın, Adamlarg'a islegen a'jayıp isleri ushın!
22 Minnetdarshılıq qurbanlıqların usınsın, Onın' islerin ba'lent dawıs penen ja'riyalasın!
23 Bazıları kemeler menen ten'izge shıg'ıp, Sheksiz suwlarda sawda qıldı,
24 Jaratqan İyenin' islerin, Teren' suwlarda islegen a'jayıp islerin ko'rdi.
25 Ol buyrıq bergende, dawıl baslandı, Ten'iz tolqınları biyik ko'terildi.
26 Kemeler joqarı ko'terilip, ja'ne tun'g'ıyıqqa tu'sti, Apattan kemedegilerdin' ruwxları tu'sip ketti.
27 Olar ma'sku'nemdey shayqalıp ju'rdi, Olardın' sheberlikleri na'tiyje bermedi.
28 Sonda olar ha'siret shegip, Jaratqan İyege jalbarındı, Jaratqan İye olardı apattan alıp shıqtı.
29 Ol dawıldı tınıshlandırdı, Ten'iz tolqınları da basıldı.
30 Dawıl toqtag'anda, olar quwandı, O'zleri qa'legen ma'nzilge Jaratqan İye jetkerdi.
31 Alg'ıslar aytsın Jaratqan İyege su'yispenshiligi ushın, Adamzatqa islegen a'jayıp isleri ushın!
32 Onı ullılasın ja'miyet ishinde, Alg'ıslar aytsın aqsaqallar jıyınında.
33 Ol da'ryalardı sho'lge, Bulaqlardı kewip qalg'an jerge aylandıradı.
34 Turg'ınlarının' jawızlıg'ı sebepli, O'nimli topıraqtı shor jerge aylandıradı.
35 Al sho'ldi ko'llerge, Kewip qalg'an jerdi bulaqlarg'a aylandıradı.
36 Ashlardı sol jerge jaylastıradı, Olar jasaw ushın qala quradı.
37 Egin egip, ju'zimzarlar otırg'ızadı, Solardan mol o'nim aladı.
38 Jaratqan İyenin' jarılqawı astında, Olar o'sip-o'nedi, Mallarının' sanı ko'beyedi.
39 Keyin ku'shli eziwshilikten ha'm azaptan, Olardın' sanı azayıp, ko'kirekleri basıldı.
40 Jaratqan İye xor qıldı aqsu'yeklerdi, İzsiz bir sho'lde gezdirdi olardı.
41 Al jarlılardı bolsa, eziwshilikten qutqardı, Qoy su'riwindey etip, zu'ryadın ko'beytti.
42 Haq adamlar bunı ko'rip shadlanadı, Nahaqlar bolsa awızların jabadı.
43 Kim dana bolsa, usılarg'a itibar bersin, Jaratqan İyenin' su'yispenshiligin an'lasın.
