1 Atqarıwshılardın' jetekshisine. «Tan'dag'ı suwın» namasına aytıladı. Dawıttın' jırı
2 Qudayım, Qudayım! Nege meni taslap kettin'? Nege mennen sonshelli uzaqtasan'? Ne ushın mag'an ja'rdem bermeysen', Shekken nalalarımdı esitpeysen'?
3 Qudayım! Ku'n boyı shaqıraman, juwap bermeysen', Tu'n boyı shaqıraman, ele tınıshlıq tappadım.
4 Sen muxaddessen', İzraildın' alg'ısları u'stine taxt qurg'ansan'.
5 Sag'an u'mit qıldı ata-babalarımız, U'mit bayladı, Sen olardı qutqardın'.
6 Sag'an jalbarınıp, azat boldı, Sag'an u'mit baylap, aldanıp uyatqa qalmadı.
7 Biraq men adam emes, qurtpan, Adamlar meni kemsitedi, xalıq jek ko'redi.
8 Meni ko'rgenlerdin' ha'mmesi u'stimnen ku'ledi, Basların shayqap bılay deydi:
9 «Jaratqan İyege o'zin tapsırdı, onı qutqarsın, Onnan kewli tolsa, Onın' O'zi ja'rdem bersin!»
10 Sen edin' meni ana qarnınan shıg'arg'an, Sen edin' emiziwli waqtımda meni aman saqlag'an.
11 Tuwılmasımnan aldın, Senin' g'amxorlıg'ın'a o'tkenmen, Anamnın' qarnınan berli, Qudayım Sensen'.
12 Mennen uzaq bolma, Apat jaqın mag'an, Ja'rdem beretug'ın hesh kim joq.
13 Su'zetug'ın bug'alarday qorshap atır ko'p dushpanlar, Bashannın' ku'shli bug'alarınday do'gereklep tur.
14 Arqırag'an jırtqısh arıslan yan'lı, Olar mag'an qarsı awzın ashıp turıptı.
15 Suw sıyaqlı to'gildim, Barlıq su'yeklerim buwınlarınan bosastı, Mumday bolıp, ju'regim ishimde eridi.
16 Kewip qalg'an gu'lalday hal-da'rmanım qalmadı, Tilim tan'layıma jabıstı, Meni o'lim topırag'ına jatqızdın'.
17 A'tirapımda iytler ızg'ıp ju'r, Jawızlar toparı do'geregimdi qorshap tur. Ayaq-qollarımdı tesip atır.
18 Barlıq su'yeklerimdi sanay alaman, Dushpanlarım mag'an tigilip, tamasha qılıp tur.
19 Kiyimlerimdi o'z ara bo'lispekte, Lipaslarım ushın shek taslamaqta.
20 Mennen uzaq bolma, Jaratqan İye, Ku'sh-quwatım menin', ja'rdemge asıq!
21 Janımdı qılısh ju'zinen, O'mirimdi iytlerdin' pa'njesinen qutqar!
22 Qutqar meni arıslannın' awzınan, Jabayı bug'alardın' shaqınan, Jalbarınıwıma juwap berdin'.
23 Tuwısqanlarıma Senin' atın'dı ja'riyalayman, Ja'miyet aldında Sag'an alg'ıs-maqtaw aytaman.
24 Ha'y, Jaratqan İyeden qorqatug'ınlar, Og'an alg'ıs-maqtaw aytın'lar! Onı dan'qqa bo'len', ha'y, Yaqıp urpag'ı! Og'an hu'rmet ko'rsetin', ha'y, İzrail urpag'ı!
25 Ezilgennin' qayg'ı-ha'siretin ko'rip, Ol tiksinip, jerkenip qaramadı. Al onnan ju'zin jasırmay, qulaq saldı pa'riyadına.
26 Ullı jıyında alg'ıs-maqtaw aytıwımnın' sebebi Sensen', Sennen qorqqanlardın' aldında wa'delerimdi orınlayman.
27 Jarlılar jep toyadı, Seni izlegenler alg'ıs-maqtaw aytadı, Olardın' o'miri uzaq ha'm shad boladı!
28 Jer ju'zinin' barlıg'ı Jaratqan İyeni eslep, Og'an qaytadı, Du'nyadag'ı barlıq milletler Onın' aldında ta'jim qıladı.
29 Patshalıq Jaratqan İyege tiyisli, Barlıq milletlerge Ol hu'kimdarlıq qıladı.
30 Jer ju'zindegi barlıq baylar iship-jep, Og'an ta'jim qıladı, Ha'tte, topıraqqa ketetug'ın ha'm janın saqlay almaytug'ınlar da, Onın' aldında dize bu'gip, bas iyedi.
31 Keleshek a'wladlar Og'an xızmet etedi, Tuwılatug'ın na'sillerge İyemiz haqqında ja'riyalanadı.
32 Olar kelip, Jaratqan İyenin' qutqarıw jolın, Onın' qılg'an islerin ele tuwılmag'anlarg'a jetkeredi.
