Shıg'ıw 12 bob

Qutqarılıw ası(1-14),Ashıtqısız nan bayramı(15-20),Birinshi Qutqarılıw ası(21-30),Mısırdan shıg'ıw(31-42),Qutqarılıw asının' qag'ıydaları(43-51).

¹ Jaratqan İye Mısır jerinde Muwsa menen Xarong'a bılay dedi:

² – Bul ay sizler ushın birinshi ay, jıldın' birinshi ayı boladı.

³ Pu'tkil İzrail ja'miyetine aytın'lar: usı aydın' onında ha'r bir xojalıq basshısı o'z xojalıg'ı ushın bir qoy yamasa eshki tan'lap alsın.

⁴ Eger bir xojalıqtag'ı adamlar sanı usı janlıqtın' go'shin jep tawısa almaytug'ınday az bolsa, onda onı jaqın qon'sısı menen bo'lissin. Janlıqtın' u'lkenkishiligine qarap, onı qansha adamnın' jey alatug'ının anıqlawın'ız kerek.

⁵ Sizler tan'lap alg'an qoy yamasa eshki minsiz, bir jıllıq erkek janlıq bolsın.

⁶ Janlıqtı usı aydın' on to'rtine deyin bag'ıp, sol ku'ni keshte İzrail ja'miyetinin' ha'r bir shan'arag'ı o'z janlıqların soyıwı tiyis.

⁷ Olar qandı alıp, o'zleri go'shti jeytug'ın u'ylerinin' qapısının' jaqlawlarına ha'm kese ag'ashına jaqsın.

⁸ Sol ku'ni keshte go'shti otqa pisirip, onı ashıtqısız nan ha'm ashshı sho'pler menen jesin.

⁹ Go'shti shiykiley yamasa suwg'a pisirip emes, al bas-sıyrag'ı ha'm ishek-qarnı menen birge otqa pisirip jen'ler.

¹⁰ Go'sh azang'a deyin qalmawı tiyis. Eger onnan awısıp qalsa, onı otta o'rtep jiberin'ler.

¹¹ Sizler go'shti jep atırg'an waqtın'ızda, bellerin'iz buwıwlı, ayaq kiyimin'iz kiyiwli, tayag'ın'ız qolın'ızda bolsın. Go'shti tez jen'ler. Bul – Jaratqan İyege arnalg'an Qutqarılıw ası

¹² 2Men sol tu'ni Mısır jerinen o'temen. Ondag'ı adamlardın' da, mallardın' da ha'r bir tun'g'ıshın o'ltiremen ha'm Mısırdın' pu'tkil qudayların hu'kim etemen. Men – Jaratqan İyemen+.

¹³ O'zlerin'iz turg'an u'ylerdin' esiginin' jaqlawlarına jag'ılg'an qan sizler ushın nıshan boladı. Men qandı ko'rip, sizlerdi shetlep o'temen. Mısır elin jazalag'anımda, nabıt qılıwshı apat sizlerge hesh qanday zıyan tiygizbeydi.

¹⁴ Bul ku'n sizler ushın eslew ku'ni bolsın. Onı Jaratqan İyenin' bayramı sıpatında bayramlan'lar. Bul bayramdı bayramlaw keleshek a'wladların'ız ushın ma'n'gi qag'ıyda bolıp qalsın.

¹⁵ – Jeti ku'n ashıtqısız nan jen'ler. Birinshi ku'ni-aq u'ylerin'izden ashıtqını joq qılın'lar. Kim de kim usı jeti ku'n ishinde ashıtqı salıng'an nan jese, ol İzrail xalqı arasınan joq qılınıwı tiyis.

¹⁶ Birinshi ha'm jetinshi ku'nleri muxaddes jıynalısın'ız bolsın. Sol ku'nleri tek o'zlerin'iz ushın awqat tayarlawdan tısqarı, hesh qanday jumıs islemen'ler.

¹⁷ 7Solay etip, sizler Ashıtqısız nan bayramın bayramlan'lar! O'ytkeni anıq sol ku'ni Men sizlerdi top-tobın'ız benen Mısır jerinen alıp shıqtım. Keleshek urpaqların'ız bul ku'ndi ma'n'gi qag'ıyda sıpatında bayramlasın.

¹⁸ Birinshi aydın' on to'rtinshi ku'ninin' keshinen jigirma birinshi ku'ninin' keshine deyin ashıtqısız nan jen'ler

¹⁹ Sol jeti ku'n dawamında u'ylerin'izde ashıtqı bolmasın. Kim de kim ashıtqı salıng'an bir na'rse jese, meyli ol kelgindi bolsın, meyli jergilikli bolsın, ol İzrail ja'miyeti arasınan joq qılınadı.

²⁰ Ashıtqı salıng'an hesh na'rse jemen'ler. Qay jerde jasasan'ız da, ashıtqısız nan jen'ler.

²¹ Sonnan keyin, Muwsa İzraildın' barlıq aqsaqalların shaqırıp alıp, olarg'a bılay dedi: – Xojalıg'ın'ız ushın qozı yamasa ılaq tan'lap alıp, onı Qutqarılıw ası ushın soyın'lar.

²² Son', bir baw mayoran sho'bin alın' da, onı qırmadag'ı qurbanlıqtın' qanına batırıp, qandı qapıların'ızdın' jaqlawlarına ha'm kese ag'ashına jag'ın'lar. Azang'a shekem hesh kim u'yinen shıqpasın.

²³ Jaratqan İye mısırlılardı o'ltiriw ushın elden o'tkende, qapıların'ızdın' jaqlawlarındag'ı ha'm kese ag'ashındag'ı qandı ko'rip, u'ylerin'izdi shetlep o'tedi. Ol nabıt qılıwshının' u'ylerin'izge kirip, sizlerdi o'ltiriwine jol qoymaydı.

²⁴ O'zlerin'iz de, sizlerdin' a'wladların'ız da bunı ma'n'gi qag'ıyda qılıp orınlan'lar.

²⁵ Jaratqan İye o'zlerin'izge beremen dep wa'de etken jerge kirgenin'izden keyin de, bul ra'simdi o'tkizip barın'lar.

²⁶ Balaların'ız sizlerden: «Bul ra'simnin' ma'nisi qanday?» – dep sorag'anda,

²⁷ olarg'a: «Bul – Jaratqan İyege arnalg'an Qutqarılıw bayramının' ası. Sebebi Jaratqan İye mısırlılardı o'ltirgende, u'ylerimizdi shetlep o'tip, bizlerdi aman qaldırdı», – den'ler. Sonda xalıq ta'jim etip, sıyındı.

²⁸ Son'ınan izraillılar barıp, Jaratqan İyenin' Muwsa menen Xarong'a bergen buyrıg'ın tolıq orınladı.

²⁹ Tu'nnin' yarımında Jaratqan İye taxtında otırg'an faraonnın' tun'g'ısh balasınan, qamaqta otırg'an tutqınnın' tun'g'ısh balasına deyin, Mısır elindegi barlıq tun'g'ıshlardı ha'm mallardın' da tun'g'ısh to'llerin o'ltirdi.

³⁰ Sol ku'ni tu'nde faraon, onın' xızmetkerleri ha'm pu'tkil Mısır ayaqqa turdı. Mısır eli dad salıp, way-waylasqan dawıslarg'a tolıp ketti. O'ytkeni o'li bolmag'an birde bir u'y joq edi.

³¹ Sol ku'ni tu'nde-aq faraon Muwsa menen Xarondı shaqırıp alıp bılay dedi: – Barın'lar! Sizler de, izraillılar da xalqımnın' arasınan shıg'ıp ketin'ler. O'zlerin'iz aytqanın'ızday, Jaratqan İyege sıyının'lar.

³² Sonday-aq mayda ha'm iri malların'ızdı da alıp ketin'ler. Al mag'an pa'tiya berin'ler.

³³ İzraillılardın' elden tezirek shıg'ıp ketiwi ushın, mısırlılar olardı asıqtırdı. «Bolmasa, ha'mmemiz o'lemiz», – desti olar.

³⁴ Solay etip, izraillılar ele ashımag'an qamırların tabag'ı menen kiyimlerine oradı da, iyinlerine ko'terip aldı.

³⁵ İzraillılar Muwsanın' aytqanı boyınsha, mısırlılardan gu'mis ha'm altın buyımlar menen kiyimler sorap aldı.

³⁶ Jaratqan İye izraillılardı mısırlılarg'a unamlı qılıp ko'rsetkenlikten, mısırlılar olarg'a sorag'anın berdi. Solay etip, izraillılar olardı tonap ketti.

³⁷ İzraillılar Ramsesten Sukkotqa qaray jol aldı. Bala-shag'alardı esaplamag'anda, shama menen altı ju'z mın'day er adam piyada jolg'a shıqtı.

³⁸ Ja'ne de, ko'p sanlı basqa millet adamları, esap-sansız mayda ha'm iri mallar da olar menen birge ketti.

³⁹ Xalıq o'zleri Mısırdan alıp shıqqan ashımag'an qamırdan nan pisirdi. Sebebi olar Mısırdan quwıp shıg'arılg'anlıqtan, qamırdı ashıtıwg'a da, jolg'a azıq-awqat tayarlawg'a da u'lgere almag'an edi.

⁴⁰ İzraillılardın' Mısırda jasag'anına to'rt ju'z otız jıl bolg'an edi.

⁴¹ To'rt ju'z otız jıldın' son'g'ı ku'ni, anıq sol ku'ni Jaratqan İyenin' xalqı top-tobı menen Mısır jerinen shıqtı.

⁴² Sol ku'ni tu'nde Jaratqan İye izraillılardı Mısır jerinen alıp shıg'ıw ushın sergek boldı. İzraillılar da a'wladlar dawamında sol tu'ndi Jaratqan İyege bag'ıshlap, oyaw bolıwı tiyis.

⁴³ Sonnan keyin, Jaratqan İye Muwsa menen Xarong'a bılay dedi: – Qutqarılıw asının' qag'ıydaları mınaday: hesh bir jat jerli adam bayram asınan jemesin.

⁴⁴ Biraq satıp alg'an qulların'ız su'nnet etilgennen keyin, onnan jese boladı.

⁴⁵ Waqıtsha qonıs basqanlar ha'm jallang'an jumısshılar onnan jemewi tiyis.

⁴⁶ As tayarlang'an u'yde jelinsin. Janlıqtın' go'shi u'ydin' sırtına shıg'arılmasın ha'm onın' hesh bir su'yegi sındırılmasın.

⁴⁷ Pu'tkil İzrail ja'miyeti Qutqarılıw bayramın bayramlawı tiyis.

⁴⁸ Aran'ızda jasap atırg'an kelgindi adam Mag'an, Jaratqan İyege arnalg'an Qutqarılıw bayramın bayramlawdı qa'lese, onda onın' u'yindegi ha'mme erkekler su'nnet etiliwi kerek. Son'ınan ol jergilikli xalıq turg'ını sıpatında İzrail xalqına qosılıp, bayramdı bayramlay aladı. Biraq su'nnetsiz adam Qutqarılıw bayramının' go'shin jemesin.

⁴⁹ Jergilikli adam ushın da, aran'ızda jasaytug'ın kelgindi adam ushın da bir qag'ıyda qollanıladı.

⁵⁰ İzraillılar Jaratqan İyenin' Muwsa menen Xarong'a bergen buyrıg'ın tolıq orınladı.

⁵¹ Sol ku'nnin' o'zinde Jaratqan İye izraillılardı top-tobı menen Mısır jerinen alıp shıqtı.