Shıg'ıw 15 bob
1 Sonnan son', Muwsa ha'm izraillılar Jaratqan İyege mına jırdı ayttı: «Jırlayman Jaratqan İyeni, Sebebi eristi Ol saltanatlı jen'iske, Atlardı da, sawash arbadag'ılardı da ılaqtırdı ten'izge.
2 Jaratqan İye ku'sh-qu'diretim menin', Qutqarıwg'a keldi Ol meni, Ol menin' Qudayım. Alg'ıslar aytaman Og'an, Ol menin' a'kemnin' Qudayı, Ullılayman Onı men.
3 Jaratqan İye jawıngerdur, Atı Onın' – Jaratqan İye.
4 Ol faraonnın' sawash arbaların, Ha'm la'shkerlerin attı ten'izge. G'arq boldı Qamıs ten'izine, Onın' saylandı la'shkerbasıları da.
5 Teren' suwlar qapladı olardı, Batıp ketti tas sıyaqlı tun'g'ıyıqqa.
6 Senin' on' qolın', Jaratqan İye, Qu'diretli ku'shke iyedur. Senin' on' qolın', Jaratqan İye, Tas-talqan eter dushpandı.
7 A'jayıp ullılıg'ın' menen, Sag'an qarsı shıqqanlardı, Jer menen jeksen qılasan', Jiberesen' olarg'a g'a'zebin'di, Saban sıyaqlı ku'ydirip, ku'l qılasan' olardı.
8 Murnın'nın' deminen, Jıynaldı suwlar bir jerge. Diywal sıyaqlı bolıp tolqınlar, Ten'iz qoynında qatıp qaldı.
9 Sonda dushpan bılay dedi: „Uslayman olardı izinen quwıp, Oljanı bo'lemen kewlimdi toq qılıp, Qıraman olardı qılıshımdı jalan'ashlap“.
10 Demin' menen u'plep edin', Qapladı ten'iz olardı. Qorg'asınday battı ullı suwlarg'a.
11 Jaratqan İye, qudaylar arasında Sag'an uqsag'anı bar ma? Sen sıyaqlı muxaddeslikte ullı, aybatı menen alg'ısqa ılayıq bolg'an, Ka'ramatlar jaratıwshı bar ma?
12 Sozıp edin' on' qolın'dı, Jutıp ketti jer olardı.
13 O'zin' qutqarg'an xalqın'dı, Jeteledin' su'yispenshiligin' menen, Alıp bardın' qu'diretin' menen muxaddes ma'kanın'a.
14 Qaltırasar esitip milletler, Qorqınısh biyledi Filistiya xalqın.
15 Hu'reyleri ushadı Edom biylerinin', Dirildi basar Moab ko'semlerin, Pu'tkil Qanan turg'ınlarının' ruwxı tu'sti.
16 Ju'regi suwlar ha'm qorqıw basar olardı, Senin' xalqın' o'tip ketkenshe, Jaratqan İye, Sen iyelik etken xalıq o'tip ketkenshe, Bilegin'nin' ku'shi aldında tas bolıp tilsiz qatıp qalar.
17 Jaratqan İye! Aparasan' xalqın'dı O'z tawın'a, Jaylastırasan' O'zin' ma'kan qılıp alg'an jerge, Qolların' menen qurg'an muxaddes ma'kang'a, İye!
18 Hu'kimdarlıq qılar sheksiz ha'm ma'n'gige Jaratqan İye».
19 Faraonnın' atları, sawash arbaları ha'm onın' u'stindegi a'skerleri ten'iz ishine kirgende, Jaratqan İye suwlardı olardın' u'stine qaytarıp a'keldi. Al izraillılar ten'izdin' ishinen qurg'aq jer arqalı ju'rip o'tti.
20 Xaronnın' a'japası payg'ambar Ma'riyam qolına da'p aldı. Basqa barlıq hayallar da da'p alıp, oynawı menen onın' izine erdi.
21 Ma'riyam naqırattı qaytalap bılay dep jırladı: «Jırlan' Jaratqan İyeni, Sebebi eristi Ol saltanatlı jen'iske. Atlardı da, atlılardı da ılaqtırdı ten'izge».
22 Muwsa izraillılardı Qamıs ten'izinen baslap shıqqannan son', olar Shur sho'line bardı ha'm sho'lde u'sh ku'n ju'rse de, suw taba almadı.
23 Son'ınan olar Mara degen jerge bardı. Biraq Maranın' suwı ashshı bolg'anlıqtan, olar ishe almadı. Sonlıqtan sol jer Mara dep ataldı.
24 onda xalıq Muwsag'a: «Ne ishemiz?» – dep narazı bolıp, ton'qılday basladı.
25 Muwsa Jaratqan İyege jalbarındı. Jaratqan İye og'an bir ag'ashtı ko'rsetti. Muwsa onı suwg'a ılaqtırıp jibergende, suw dushshı bolıp qaldı. Sol jerde Jaratqan İye xalıq ushın qag'ıyda ha'm nızam berdi ha'm olardı sınadı.
26 Jaratqan İye olarg'a bılay dedi: – Eger sizler Qudayın'ız Jaratqan İyenin', yag'nıy Menin' so'zimdi dıqqat penen tın'lap, na'zerimde tuwrı bolg'an islerdi islesen'ler, buyrıqlarıma qulaq asıp, ha'mme qag'ıydalarımdı orınlasan'lar, mısırlılarg'a bergen keselliktin' hesh birin sizlerge bermeymen. Sebebi Men – sizlerge shıpa beriwshi Jaratqan İyemen.
27 Sonnan keyin, olar Elimge keldi. Sol jerde on eki bulaq ha'm jetpis palma ag'ashı bar edi. Solay etip, olar suw jag'asına ornalastı.
