Shıg'ıw 17 bob
1 Son'ınan İzrail xalqının' pu'tkil ja'miyeti Jaratqan İyenin' buyrıg'ı boyınsha Sin sho'linen shıqtı da, bir jerden ekinshi jerge ko'ship-qonıp ju'rip, Refidimge ornalastı. Degen menen, ol jerde ishetug'ın suw joq edi.
2 Olar Muwsag'a: – Bizlerge ishetug'ın suw ber, – dep urıstı. – Nege mag'an urısıp atırsızlar? Nege Jaratqan İyeni sınap atırsızlar? – dedi olarg'a Muwsa.
3 Biraq xalıq sho'llegenlikten, Muwsag'a narazı bolıp: – Bizlerdi ne ushın Mısırdan alıp shıqtın'? Bizlerdi, balalarımızdı ha'm mallarımızdı sho'lden o'ltiriw ushın ba? – dep ton'qıldadı.
4 Muwsa Jaratqan İyege dad salıp: – Bul xalıqqa ne isleyin? Birazdan son', olar meni tas boran qılıp o'ltiredi-g'o! – dedi.
5 Jaratqan İye Muwsag'a bılay dedi: – Xalıqtın' aldına o't. Nil da'ryasın urg'an tayag'ın'dı al da, İzrail aqsaqallarının' ayırımların izin'e ertip, alg'a qaray ju'r.
6 Mine, Men Xoreb tawındag'ı bir jartastın' u'stinde, senin' aldın'da turaman. Sen jartastı urg'anın'da, suw atlıg'ıp shıg'adı ha'm xalıq suw ishedi. Muwsa İzrail aqsaqallarının' ko'z aldında solay isledi.
7 Solay etip, sol jer Massa ha'm Meriba dep atadı. Sebebi izraillılar sol jerde Muwsa menen urısıp: «Aramızda Jaratqan İye bar ma eken, ya joq pa eken?» – dep Jaratqan İyeni sınag'an edi.
8 Amalekler kelip, Refidimde izraillılarg'a urıs ashtı.
9 Sonda Muwsa Eshuag'a: – Xalıq ishinen adamlardı saylap al da, barıp, amalekler menen urıs. Erten' men qolıma Qudaydın' tayag'ın uslap, to'beshiktin' basında turaman, – dedi.
10 Eshua Muwsanın' aytqanın islep, amalekler menen urıstı. Sol waqıtta Muwsa, Xaron ha'm Xur to'beshiktin' basına shıqtı.
11 Muwsa qolın ko'tergende izraillılar, al tu'sirgende amalekler u'stin kele berdi.
12 Biraq Muwsanın' qolları sharshap qaldı. Sonda olar bir tas a'kelip, Muwsanın' astına qoydı. Muwsa tastın' u'stine otırdı. Bir jag'ında Xaron, ekinshi jag'ında Xur Muwsanın' qolların joqarı ko'terip turdı. Quyash batqansha, Muwsanın' qolları bekkem ko'terilip turdı.
13 Solay etip, Eshua amaleklerdi qılıshtan o'tkizip, olardı jen'di.
14 Son'ınan Jaratqan İye Muwsag'a: – Estelik bolıp qalıwı ushın, bunı kitapqa jazıp qoy. Eshuanın' qulag'ına quyıp qoy, Men amaleklerdin' atın jer ju'zinen pu'tkilley joq qılaman, – dedi.
15 Muwsa bir qurbanlıq orın qurıp, onın' atın Yahwe Nissi dep qoydı.
16 Keyin ol bılay dedi: «Jaratqan İyenin' taxtına qarsı qol ko'tergeni ushın, Ol a'wladlar dawamında amaleklerge qarsı urısadı».
