Shıg'ıw 23 bob
1 – Mısh-mısh ga'p tarqatpan'. Jalg'an gu'walıq beriw arqalı, jaman adamg'a qol bermen'.
2 Ko'pshilik jawızlıq islegende, olarg'a qosılman'. Dawlı iste gu'walıq bergenin'izde ko'pshilikti jaqlap, a'dillikti burmalaman'.
3 Ka'mbag'al bolsa da, dawda onı jaqlaman'.
4 Eger dushpanın'ızdın' joytılıp ketken o'gizin yamasa eshegin tawıp alsan'ız, onı iyesine qaytarıp berin'.
5 Eger dushpanın'ızdın' esheginin' ju'ktin' awırlıg'ınan jıg'ılıp qalg'anın ko'rsen'iz, onı sol halında taslap ketpey, og'an ja'rdem beriwin'iz tiyis.
6 Dawda ka'mbag'aldın' isin sheshiwde a'dillikti burmalaman'.
7 Jala jabıwdan awlaq bolın', ayıpsız ha'm haq adamdı o'limge hu'kim qılman'. O'ytkeni Men nahaq adamdı aqlamayman.
8 Para alman'. Sebebi para ko'retug'ın adamdı soqır etip, haq adamdı nahaqqa shıg'aradı.
9 Kelgindi adamg'a ja'bir bermen'. O'zlerin'iz de Mısır jerinde kelgindi bolg'anın'ız sebepli, kelgindi adamnın' jag'dayının' qanday ekenin bilesizler.
10 Altı jıl boyı jerin'izge tuqım sewip, zu'ra'a't jıynan'.
11 Al jetinshi jılı jerge dem berin'. Xalqın'ız arasındag'ı ka'mbag'allar ol jerden azıq tawıp jesin, olardan awısqanın jabayı haywanlar jesin. Ju'zim bag'ın'ız benen za'ytu'nzarın'ızg'a da solay islen'.
12 Altı ku'n jumısın'ızdı islep, jetinshi ku'ni dem alın'. Usılayınsha o'gizin'iz ha'm eshegin'iz dem alıp, shorın'ızdın' ulı da, kelgindi adamın'ız da ha'llenip alsın.
13 Menin' sizlerge aytqanlarımnın' ha'mmesin orınlan'. Basqa qudaylardın' atın aytıp shaqırman', olardı tilin'izge de alman'+.
14 – Jılına u'sh ma'rte Menin' aldıma kelip bayram qılın'.
15 Sizlerge buyırg'anımday, Abib ayının' belgilengen ku'nlerinde jeti ku'n ashıtqısız nan jep, Ashıtqısız nan bayramın bayramlan'. Sebebi sizler Mısırdan sol ayda shıqtın'lar. Hesh kim aldıma qurı qol kelmesin.
16 Atızg'a ekken biydayların'ızdı jıynap baslag'anın'ızda, Zu'ra'a't bayramın belgilen'. Al gu'zde atızdan barlıq eginlerin'izdi jıynap bolg'anın'ızda, Jıyınterim bayramın belgilen'.
17 Barlıq er adamların'ız jılına u'sh ret İyen' bolg'an Menin', yag'nıy Jaratqan İyenin' aldına keliwi kerek.
18 Mag'an berilgen qurbanlıqtın' qanın ashıtqı salıng'an nan menen bermen'. Bayramda Mag'an arnap berilgen qurbanlıqtın' mayı azang'a deyin qaldırılmasın.
19 Jerin'izdin' da'slepki o'niminin' en' jaqsısın Qudayın'ız Jaratqan İyenin' U'yine alıp kelin'. Ilaqtı o'z anasının' su'tine pisirmen'.
20 – Mine, jolda sizlerdi qorg'awı ha'm sizlerdi Men tayarlap qoyg'an jerge aparıwı ushın, aldın'ızdan bir perishte jiberip atırman.
21 Og'an dıqqatlı bolıp, so'zine qulaq salın'. Og'an qarsı shıqpan'. Sebebi Ol Menin' atımnan ha'reket etkenlikten, qarsılıq ko'rsetkenin'izge sabır etpeydi.
22 Biraq onın' so'zin dıqqat penen tın'lap, aytqanlarımnın' ha'mmesin orınlasan'ız, Men dushpanların'ızg'a dushpan bolıp, sizlerge qarsı shıqqanlarg'a qarsı turaman.
23 Perishtem aldın'ızda ju'rip, sizlerdi amor, xet, periz, qanan, xiw ha'm ebuslardın' jerlerine alıp barg'anda, Men olardı joq etemen.
24 Sizler olardın' qudaylarına tabınıp, xızmet qılman'. Olardın' a'detlerin de u'yrenben'. Kerisinshe, olardın' qudayların qulatıp, kiyeli tasların sındırıp taslan'.
25 Sizler Qudayın'ız Jaratqan İyege, yag'nıy Mag'an sıyının'. Sonda Men sizlerdin' nan-suwların'ızdı jarılqap, aran'ızdag'ı keselliklerdi joq etemen.
26 Elin'izde tu'sik tu'siretug'ın ha'm biyperzent hayal bolmaydı. Men sizlerge uzaq o'mir beremen.
27 Sizlerge qarsı shıqqan xalıqlardı Mennen qorqatug'ın qılaman ha'm olardı albıratıp taslayman. Dushpanların'ız aldın'ızdan qashatug'ın boladı.
28 Xiw, qanan ha'm xet xalıqların aldın'ızdan quwıw ushın, eshek ha'rre jiberemen.
29 El qan'ırap qalıp, sizlerge zıyan beretug'ın jabayı haywanlardın' sanı ko'beyip ketpewi ushın, olardı bir jıl ishinde quwıp jibermeymen.
30 Sizler ko'beyip, sol eldi iyelik etemen degenshe, olardı az-azdan quwıp shıg'araman.
31 Shegaran'ızdı Qamıs ten'izinen filistler ma'kan basqan ten'izge deyin, qubladag'ı sho'lden Evfrat da'ryasına deyin ornataman. Sol eldin' adamların sizlerge ta'slim etemen, sizler olardı aldın'ızdan quwıp shıg'asızlar.
32 Olar ha'm olardın' qudayları menen kelisim du'zben'.
33 Olardın' jerin'izde jasawına jol qoyman'. Bolmasa olar sizlerdi o'z qudaylarına sıyındırıp, Mag'an qarsı gu'na islewge baslaydı ha'm sizlerdi duzaqqa tu'siredi.
