Shıg'ıw 28 bob
1 – Ruwxaniy bolıp, Mag'an xızmet etiwi ushın, izraillılar arasınan a'jag'an' Xarondı, onın' ulları Nadab, Abihu, Elazar ha'm İtamardı janın'a al.
2 A'jag'an' Xaronnın' ma'rtebeli bolıp, ko'rkem ko'riniwi ushın, og'an muxaddes kiyimlerdi tiktirip ber.
3 Men ayrıqsha qa'bilet bergen adamlarg'a ayt, olar Xaronnın' Mag'an bag'ıshlanıp, ruwxaniylik etiwi ushın, og'an kiyim tiksin.
4 Olar mına kiyimlerdi tiksin: qaltalı o'n'irshe, efod, bahalı u'st kiyim, nag'ıslı uzın ko'ylek, sa'lle ha'm belbew. Ruwxaniy bolıp Mag'an xızmet qılıwı ushın, olar a'jag'an' Xarong'a ha'm onın' ullarına bul muxaddes kiyimlerdi tiksin.
5 Olar altın, ja'ne ju'nnen iyirilgen qızg'ısh ko'k, shım qızıl, qırmızı jiplerdi ha'm hasıl zıg'ır jibin qollansın.
6 – Efodtı altın sabaq, qızg'ısh ko'k, shım qızıl ha'm qırmızı jip penen hasıl zıg'ır jipten sheberlik penen nag'ıslap islesin.
7 Onın' aldıng'ı ha'm artqı ta'replerin bir-biri menen biriktiriw ushın, iyin arqalı o'tetug'ın eki bawı bolsın.
8 Efodtın' joqarısına biriktirilgen halda belbew islet. Bul efod sıyaqlı altın sabaq, qızg'ısh ko'k, shım qızıl, qırmızı jip ha'm hasıl zıg'ır jipten islensin.
9 Keyin sen eki oniks tas alıp, olarg'a İzrail ullarının' atların oyıp jazdır.
10 Jasına qarap, altawın birinshi tasqa, qalg'an altawın ekinshi tasqa oyıp jazdır.
11 Ustanın' tasqa mo'rdi oyıp jazg'anınday, İzrail ullarının' atların da eki tasqa oyıp jazdır ha'm taslardı o'rme nag'ıslı altın qasnaqqa qondır.
12 Son'ınan usı taslardı efodtın' iyin bawlarına ornat. Xaron Jaratqan İyenin', yag'nıy Menin' aldıma kirgende, sol taslar İzraildın' on eki urıwın esletip turıw ushın, ol eki iyin bawında bul taslardı alıp ju'redi.
13 Altınnan ja'ne o'rme nag'ıslı eki qasnaq islet.
14 Sap altınnan o'rilgen shınjırlar isletip, olardı qasnaqlarg'a biriktir.
15 – Qudaydın' erkin biliwde qollanılatug'ın qaltalı o'n'irshe islet. Onı da efod sıyaqlı altın sabaq, qızg'ısh ko'k, shım qızıl, qırmızı jip ha'm hasıl zıg'ır jipten sheberlik penen nag'ıslap islet.
16 O'n'irshe to'rt mu'yeshli ha'm eki qabatlı bolıp, uzınlıg'ı da bir qarıs, eni de bir qarıs bolsın.
17 O'n'irshege to'rt qatar qılıp hasıl taslardı qada. Birinshi qatarda serdolik, xrizolit ha'm zu'mret,
18 ekinshi qatarda periwza, lazurit ha'm gagat,
19 u'shinshi qatarda yaqıt, agat ha'm ametist,
20 to'rtinshi qatarda sarı yaqıt, oniks ha'm yashma bolsın. Taslar altın qasnaqlarg'a ornatılıwı tiyis.
21 Taslar on eki bolıp, olarda mo'r oyılg'anday qılıp, İzraildın' on eki ulının' atları birme-bir oyılıp jazılsın. Bul taslar İzraildın' on eki urıwının' tımsalı bolsın.
22 Qaltalı o'n'irshe ushın sap altınnan o'rilgen shınjırlar islet.
23 Tag'ı da, eki altın halqa da isletip, olardı o'n'irshenin' u'stingi eki mu'yeshine taq.
24 O'rilgen eki altın shınjırdın' bir ushın o'n'irshedegi halqalarg'a ildir.
25 Al ekinshi ushın iyin bawlardag'ı eki qasnaqqa bekkemlep, efodtın' aldı betine bayla.
26 Ja'ne eki altın halqa islet. Olardı o'n'irshenin' astıng'ı eki shetine, efodqa jaqın bolg'an ishki jiyegine taq.
27 Tag'ı da, eki altın halqa islet. Olardı efodtın' aldı betindegi iyin bawlardın' astınan, tigiske jaqın qılıp, belbewdin' joqarısınan taq.
28 Qaltalı o'n'irshenin' halqaları menen efodtın' halqaları qızg'ısh ko'k bawlar menen bir-birine baylansın. Sonda o'n'irshe efodtan ayırılmay, efodtın' belbewinin' joqarısında turadı.
29 Solay etip, Xaron ha'r sapar Muxaddes orıng'a kirgende, Jaratqan İyenin' aldında ma'n'gige estelik bolıwı ushın, İzrail ullarının' atları jazılg'an o'n'irsheni ju'reginin' tusında ko'terip ju'redi.
30 Usı qaltalı o'n'irshege Urim menen Tummimdi salıp qoy. Xaron Menin' aldıma kelgende, olar Xaronnın' ju'reginin' tusında bolsın. Xaron izraillılarg'a Menin' erkimdi bildiriw ushın qollanatug'ın Urim menen Tummimdi Jaratqan İyenin' aldında ba'rqulla ju'reginin' tusında alıp ju'rsin.
31 – Efodtın' ishinen kiyiletug'ın bahalı kiyim tolıq qızg'ısh ko'k jipten islensin.
32 Onda bas sıyatug'ın orın bolsın. Ol so'tilip ketpewi ushın, onın' jiyeklerin aylandırıp toqıt.
33 Usı kiyimnin' etegine qızg'ısh ko'k,
34 shım qızıl ha'm qırmızı jipten islengen anardı ha'm onın' aralarına kishkene altın qon'ırawlardı gezekpe-gezek taqtır.
35 Xaron xızmet etkende, usı kiyimdi kiysin. Ol Muxaddes orıng'a kirgende ha'm shıqqanda qon'ıraw sesti esitilsin, sonda ol o'lmey aman qaladı.
36 Sap altınnan taj sıyaqlı man'laysha isletip, og'an mo'r oyg'anday qılıp: «Jaratqan İyege bag'ıshlang'an» dep jazdır.
37 Man'laysha qızg'ısh ko'k baw menen sa'llenin' aldı betine baylap qoy.
38 Solay etip, izraillılar Mag'an arnap muxaddes sıyların a'kelgende, qa'tege jol qoysa, olardın' ayıpların Xaron o'z moynına aladı. Menin' olardın' qurbanlıqların qabıl alıwım ushın, Xaron man'layshanı ba'rqulla man'layına tag'ıp ju'riwi tiyis.
39 Hasıl zıg'ırdan bir uzın ko'ylek nag'ıslap toqıt ha'm hasıl zıg'ırdan bir sa'lle islet. Ja'ne de, nag'ıslı belbew toqıt.
40 Xaronnın' ulları ma'rtebeli bolıp, ko'rkem ko'riniwi ushın, olarg'a uzın ko'ylekler, belbewler ha'm kishigirim sa'lleler tiktir.
41 Bul kiyimlerdi a'jag'an' Xarong'a ha'm onın' ullarına kiydir. Olardın' baslarına may quyıp, ruwxaniylik wazıypasına tayınla. Usılay etip, olardın' xızmet etiwi ushın, Mag'an bag'ıshla.
42 Denenin' ashıq jerleri ko'rinip qalmawı ushın, olarg'a zıg'ırdan diz kiyimler tiktir. Bul kiyimler belinen dizesine deyin jawıp tursın.
43 Xaron ha'm onın' ulları Ushırasıw shatırına kirgende yamasa Muxaddes jerde xızmet etiw ushın qurbanlıq orıng'a jaqınlag'anda, usı kiyimlerdi kiyiwi tiyis. Bolmasa, olar ayıplı bolıp, o'lip qaladı. Xaron ha'm onın' urpaqları ushın bul ma'n'gi qag'ıyda bolsın.
