Shıg'ıw 34 bob
1 Jaratqan İye Muwsag'a bılay dedi: – Burıng'ıg'a uqsag'an eki tas jonıp al. Men sen sındırıp taslag'an taslardag'ı so'zlerdi usılarg'a jazaman.
2 Azang'a deyin tayarlan. Azan bolg'anda, Sinay tawına shıg'ıp, tawdın' to'besinde, Menin' menen ushırasıwg'a aldıma bar.
3 Senin' menen birge basqa hesh kim tawg'a shıqpasın ha'm tawdın' hesh bir jerinde hesh kim ko'rinbesin. Tawdın' eteginde mal-janlıqlar da otlamasın.
4 Muwsa burıng'ıg'a uqsag'an eki tas jonıp aldı. Jaratqan İyenin' buyırg'anınday, erten'ine azanda taslardı alıp, Sinay tawına shıqtı.
5 Jaratqan İye bult ishinde sol jerge tu'sip, Muwsanın' qasında turdı ha'm O'zinin' «Jaratqan İye» degen atın ja'riyaladı.
6 Ol Muwsanın' aldınan o'tip: – Jaratqan İyemen, Jaratqan İyemen. Rehimli, miyrimli, sabır-taqatlı, su'yispenshiligi sheksiz ha'm sadıq Qudayman.
7 Mın'ınshı a'wladlarg'a deyin su'yispenshilik ko'rsetip, ayıplardı, jınayatlardı ha'm gu'nalardı keshiriwshimen. Biraq hesh bir ayıptı jazasız qaldırmayman. Ata-babalardın' islegen ayıpları ushın, olardın' ulların, aqlıqların, u'shinshi ha'm to'rtinshi a'wladın jazalayman, – dedi.
8 Sonda Muwsa da'rhal jerge jıg'ılıp, Jaratqan İyege sıyındı da:
9 – O, İyem! Eger men Senin' miyrimin'e erisken bolsam, bizler menen birge bar. Bul xalıq – qaysar xalıq bolsa da, Sen bizlerdin' ayıpgu'nalarımızdı keshirip, bizlerdi O'z xalqın' sıpatında qabıl et, – dedi.
10 Jaratqan İye Muwsag'a bılay dedi: – Mine, senin' xalqın' menen kelisim du'zemen. Olardın' aldında du'nyada ha'm basqa xalıqlar arasında bolıp ko'rilmegen ka'ramatlar isleymen. Sen arasında jasap atırg'an pu'tkil xalıq neler isleytug'ınımdı ko'redi. Menin' sen ushın isleytug'ın islerim qorqınıshlı boladı.
11 Bu'gin sizlerge beretug'ın buyrıqlarıma boysının'lar. Amor, qanan, xet, periz, xiw ha'm ebus xalıqların sizlerdin' aldın'ızdan quwıp shıg'araman.
12 O'zlerin'iz kiretug'ın eldegi adamlar menen kelisim jasawdan awlaq bolın'. Sebebi bul sizler ushın duzaq boladı.
13 Olardın' qurbanlıq orınların qıyratıp, kiyeli tasların maydalap taslan'lar ha'm kiyeli ag'ashların shawıp taslan'lar.
14 Basqa qudaylarg'a sıyınban'. O'ytkeni Men qızg'anshaq degen atı bar Jaratqan İyemen, qızg'anshaq Qudayman.
15 Sol jerdin' xalqı menen hesh qanday kelisim du'zben'. Bolmasa, olar opasızlıq qılıp, o'z qudaylarına arnap qurbanlıq shalg'anda, sizlerdi de mira't etedi, sizler de olardan jeysizler.
16 Eger olardın' qızların ulların'ızg'a alıp bersen'iz, onda sol qızlar o'z qudaylarına erip, buzıqlıq qılg'anda, ulların'ızdı da izlerine ertip ketedi.
17 O'zlerin'izge butlardın' mu'sinlerin sog'ıp alman'.
18 Sizlerge buyırg'anımday, Abib ayının' belgilengen ku'nlerinde jeti ku'n ashıtqısız nan jep, Ashıtqısız nan bayramın bayramlan'. Sebebi sizler Mısırdan Abib ayında shıqtın'lar.
19 Qarınnan birinshi shıqqanlardın' ha'mmesi, barlıq iri ha'm mayda malların'ızdın' tun'g'ısh erkek to'lleri Mag'an tiyisli.
20 Eshektin' birinshi tuwılg'an to'linin' ornına bir qozı berip, satıp alın'lar. Eger olay etpesen'iz, gu'rrenin' moynın u'zin'. Barlıq tun'g'ısh ulların'ızdın' qunın o'tewin'iz tiyis. Hesh kim aldıma qurı qol kelmesin.
21 Altı ku'n jumıs islep, jetinshi ku'ni dem alın'. Egin egiw ha'm onı orıw waqtında da dem alın'.
22 Biydaydın' birinshi o'nimin jıynag'anda, Ha'pteler bayramın, al gu'zde Jıyın-terim bayramın o'tkizin'. 23Barlıq er adamların'ız jılına u'sh ret İyen' bolg'an Menin', yag'nıy İzraildın' Qudayı Jaratqan İyenin' aldına keliwi kerek.
23 Barlıq er adamların'ız jılına u'sh ret İyen' bolg'an Menin', yag'nıy İzraildın' Qudayı Jaratqan İyenin' aldına keliwi kerek+.
24 Men basqa milletlerdi aldın'ızdan quwıp jiberip, shegaraların'ızdı ken'eytemen. Jılına u'sh ret Qudayın'ız Jaratqan İyenin' aldına kelgenin'izde, hesh kim jerin'izdi basıp alıwdı niyet etpeydi.
25 Mag'an berilgen qurbanlıqtın' qanın ashıtqı salıng'an nan menen usınban'. Qutqarılıw bayramının' qurbanlıg'ı azang'a deyin qaldırılmasın.
26 Jerin'izdin' da'slepki o'niminin' en' jaqsısın Qudayın'ız Jaratqan İyenin' U'yine alıp kelin'. Ilaqtı o'z anasının' su'tine pisirmen'.
27 Sonnan son', Jaratqan İye Muwsag'a: – Mına so'zlerdi jaz. Sebebi Men senin' menen ha'm izraillılar menen usı so'zlerge tiykarlanıp, kelisim du'zemen, – dedi.
28 Muwsa sol jerde qırıq ku'n, qırıq tu'n Jaratqan İye menen birge boldı. Ol hesh na'rse iship-jemedi ha'm kelisim so'zlerin, yag'nıy on buyrıqtı taslarg'a jazdı.
29 Muwsa qolına buyrıqlar jazılg'an eki tastı alıp, Sinay tawınan tu'sti. Ol Jaratqan İye menen so'yleskenlikten, ju'zinen nur shashıp tur edi. Biraq bunı o'zi bilmedi.
30 Xaron ha'm pu'tkil izraillılar Muwsanın' nur shashqan ju'zin ko'rgende, og'an jaqınlasıwg'a qorqtı.
31 Biraq Muwsa olardı qasına shaqırdı. Xaron ha'm ja'miyettin' barlıq basshıları onın' janına keldi. Muwsa olar menen so'ylesti.
32 Keyin pu'tkil İzrail xalqı og'an jaqın keldi. Muwsa Jaratqan İyenin' Sinay tawında o'zine aytqanlarının' ha'mmesin orınlawdı xalıqqa buyırdı.
33 Muwsa olar menen so'ylesip bolg'annan son', ju'zin jawlıq penen jawdı.
34 Muwsa so'ylesiw ushın, Jaratqan İyenin' aldına barg'anda, sırtqa shıqqansha, ju'zindegi jawlıqtı alıp qoyatug'ın edi. Qaytıp kelgennen keyin, ol o'zine aytılg'an buyrıqlardı izraillılarg'a bildiretug'ın edi.
35 Sonda izraillılar onın' ju'zinen nur shashıp turg'anın ko'retug'ın edi. Al Muwsa ishke kirip, Jaratqan İye menen ushırasıwg'a deyin, ju'zin jawlıq penen jawıp qoyatug'ın edi.
