Shıg'ıw 8 bob
1 Jaratqan İye Muwsag'a bılay dedi: – Faraong'a barıp, Menin' mına so'zlerimdi jetkiz: «Jaratqan İye bılay deydi: Mag'an sıyınıwı ushın, xalqımdı jiber.
2 Eger xalqımdı jiberiwden waz keshsen', pu'tkil elin'di qurbaqalarg'a toltırıp, jazalayman.
3 Nil da'ryası qurbaqalarg'a tolıp tasıp ketedi. Qurbaqalar da'ryadan shıg'ıp, sarayın'a, uyıqlaytug'ın bo'lmen'e, to'segin'e, xızmetkerlerin'nin' ha'm xalqın'nın' u'ylerine, ha'tte, tandırların' menen qamır tabaqların'a da kirip aladı.
4 Olar senin', xalqın'nın' ha'm pu'tkil xızmetshilerin'nin' u'stinde sekirip ju'redi».
5 Son'ınan Jaratqan İye Muwsag'a: – Xarong'a ayt, ol qolındag'ı tayag'ın da'ryalar, o'zekler ha'm ko'llerge qaray sozıp, qurbaqalardı shıg'arsın ha'm Mısırdı qurbaqalarg'a toltırsın, – dedi.
6 Solay etip, Xaron qolındag'ı tayag'ın Mısırdag'ı suwlarg'a qaray sozdı. Sonda qurbaqalar shıg'ıp, Mısırdı jaylap ketti.
7 Degen menen, sıyqırshılar da o'z sıyqırshılıg'ı menen anıq usılay islep, Mısır eline qurbaqalardı shıg'ardı.
8 Faraon Muwsa menen Xarondı shaqırtıp alıp: – Jaratqan İyege duwa etin'ler, Ol mennen ha'm xalqımnan qurbaqalardı alıp taslasın. Sonda men de Jaratqan İyege qurbanlıq beriwi ushın, xalqın'ızdı jiberemen, – dedi.
9 Muwsa og'an: – A'jep boladı, waqıttı o'zin'iz belgilen'. Qurbaqalar tek Nil da'ryasında qalıp, o'zin'iz de, u'yin'iz de qurbaqalardan qutılıwın'ız ushın, men siz, xızmetkerlerin'iz ha'm xalqın'ız ushın qashan duwa eteyin? – dedi.
10 Faraon Muwsag'a: – Erten', – dedi. Muwsa og'an bılay dep juwap berdi: – Yaqshı, aytqanın'ızday bolsın. Usılayınsha, siz Qudayımız bolg'an Jaratqan İyege ten' keletug'ını joq ekenin bilip alasız.
11 Qurbaqalar sizden, u'ylerin'izden, xızmetkerlerin'iz benen xalqın'ızdan ketip, tek da'ryada g'ana qaladı.
12 Solay etip, Muwsa menen Xaron faraonnın' aldınan ketti. Muwsa Jaratqan İyege duwa etip, Onın' faraong'a jibergen qurbaqa ba'lesi ushın jalbarındı.
13 Jaratqan İye Muwsanın' tilegin orınladı: u'ylerdegi, ha'wlilerdegi ha'm atızlardag'ı qurbaqalar qırılıp qaldı.
14 Qurbaqalardı jıynap, u'yin-u'yin etip qoydı. Sasıq iyis eldi jaylap ketti.
15 Degen menen, faraon jag'daydın' jen'illeskenin ko'rgende, Jaratqan İyenin' aytqanınday ju'regin qatal etip, Muwsa menen Xarondı tın'lamadı.
16 Jaratqan İye Muwsag'a: – Xarong'a ayt, ol tayag'ı menen jerdi ursın. Sonda jerdin' shan'ı shirkeyge aylanıp, pu'tkil Mısırdı qaplaydı, – dedi.
17 Olar solay isledi. Xaron tayag'ı menen jerdin' shan'ın urıp jibergende, pu'tkil Mısır jerindegi shan' shirkeyge aylandı. Adamlar menen mallardın' u'stin shirkeyler basıp ketti.
18 Sıyqırshılar da o'z sıyqırshılıg'ı menen shirkeyler payda etpekshi boldı, biraq qollarınan kelmedi. Adamlardın' ha'm mallardın' u'stin shirkey qaplag'an edi.
19 Sonda sıyqırshılar faraong'a: – Bul iste Qudaydın' qolı bar, – dedi. Biraq Jaratqan İyenin' aytqanınday, faraon ju'regin qatal qılıp, Muwsa menen Xarondı tın'lamadı.
20 Jaratqan İye Muwsag'a bılay dedi: – Tan' azannan tur da, faraon da'ryag'a qaray baratırg'anda, onın' aldınan shıg'ıp tur ha'm og'an Jaratqan İyenin', yag'nıy Menin' mına so'zlerimdi jetkiz: «Mag'an sıyınıwı ushın, xalqımdı jiber.
21 Eger jibermesen', senin', xızmetshilerin'nin', xalqın'nın' ha'm u'ylerin'nin' u'stine iytshıbın jawdıraman. Mısırlılardın' u'yleri ha'm olar jasap atırg'an jer iytshıbıng'a tolıp ketedi.
22 Biraq sol ku'ni xalqım jasaytug'ın Goshen jerin ayırıp qoyaman. Ol jerde iytshıbın bolmaydı. Usılay etip, sen Mısır jerinde Jaratqan İyenin', yag'nıy Menin' bar ekenimdi bilip alasan'.
23 Men O'z xalqım menen senin' xalqın'nın' arasına ayırmashılıq qoyaman. Erten' usı ka'ramat a'melge asadı».
24 Jaratqan İye aytqanın isledi. Faraonnın' sarayına, xızmetkerlerinin' u'ylerine ha'm pu'tkil Mısır eline bıjnag'an iytshıbınlar ushıp keldi. El iytshıbınnın' kesirinen wayran boldı.
25 Sonda faraon Muwsa menen Xarondı shaqırtıp alıp, olarg'a: – Barın'lar, Qudayın'ızg'a usı elde qurbanlıq berin'ler, – dedi.
26 Biraq Muwsa og'an bılay dep juwap berdi: – Bulay islesek, tuwrı bolmaydı. O'ytkeni mısırlılar Qudayımız Jaratqan İyege qurbanlıq beriwimizdi jerkenishli dep sanaydı. Eger olar jerkenishli dep sanag'an na'rseni ko'z aldında islesek, olar bizlerdi tas boran qılıp o'ltirmey me?
27 Qudayımız Jaratqan İyege qurbanlıq beriw ushın, bizler sho'lde u'sh ku'nlik jol ju'rip barıwımız kerek.
28 Sonda faraon: – Sho'lde Qudayın'ız Jaratqan İyege qurbanlıq beriwin'iz ushın, sizlerdi jiberemen. Tek ju'da' uzaqlap ketpen'ler. Endi men ushın duwa etin'ler, – dedi.
29 Muwsa og'an: – Erten' sizden, xızmetkerlerin'izden ha'm xalqın'ızdan iytshıbınlar ketsin dep, sizin' aldın'ızdan shıg'ıwdan-aq, Jaratqan İyege duwa etemen. Tek siz Jaratqan İyege qurbanlıq beriw ushın xalıqtı jibermey qalıp, bizlerdi ja'ne aldaman', – dedi.
30 Solay etip, Muwsa faraonnın' aldınan shıg'ıp, Jaratqan İyege duwa etti.
31 Jaratqan İye Muwsanın' tilegin orınlap, iytshıbınlardı faraonnan, onın' xızmetkerlerinen ha'm xalqınan alıp tasladı. Birde bir iytshıbın qalmadı.
32 Solay bolsa da, faraon bul ret te ju'regin qatal qılıp, xalıqtı jibermedi.
