Wazshı 7 bob
1 Jaqsı at qımbatbaha a'tir mayınan, O'lim ku'ni bolsa, tuwılg'an ku'nnen jaqsıraq.
2 Toy berip atırg'an u'yge barg'annan, Joqlaw aytılıp atırg'an u'yge barg'an jaqsıraq. Ha'mmenin' o'miri o'lim menen juwmaqlanadı. Adam tiri waqtında bunı ju'rekte saqlasın.
3 Qayg'ı ku'lkiden jaqsıraq. Qayg'ı o'mirden bahalı sabaq beredi.
4 Dananın' oyı joqlaw aytılıp atırg'an u'yde, Aqılsızdın' oyı toylap atırg'an u'yde.
5 Dananın' keyiwi, Aqılsızdın' maqtawınan jaqsıraq.
6 Haqıyqattan da aqılsızdın' ku'lkisi Qazan astında jang'an otınnın' sıtırlısına uqsaydı. Bul da biyhuda.
7 Basqalardı ja'birlew dananı aqılınan ayırar, Para ju'rekti azg'ırar.
8 Tamamlaw baslawdan jaqsıraq, Sabırlılıq menmenlikten jaqsıraq.
9 Ashıwlanıwg'a asıqpa, Ashıw aqılsızlardın' ju'regine uya saladı.
10 «Ne ushın o'tmishim bu'ginimnen jaqsı edi?» – dep sorama. Bul soraw danalıqqa ta'n emes.
11 Danalıq miyras sıyaqlı jaqsı, Ol quyashtı ko'rip turg'an ha'r bir adam ushın paydalı.
12 Baylıq adamdı qalay qorg'asa, Danalıq ta adamdı solay qorg'aydı. Biraq bilimnin' artıqmashlıg'ı mınaw: Danalıq o'z iyesinin' o'mirin saqlaydı.
13 Qudaydın' islerine na'zer sal. Ol qıysaytqan na'rseni kim du'zete aladı?
14 Jaqsı ku'nlerin'de onnan ra'ha'tlen, Jaman ku'nlerin'de mınag'an oy juwırt: Adam erten' ne bolatug'ının bile almawı ushın, Jaqsı ku'ndi de, jaman ku'ndi de Quday jaratqan.
15 Men usı biyhuda o'mirim dawamında ha'mme na'rseni ko'rdim: Haq adam a'dil bola tura, erte o'lip ketedi, Al jaman adam jaman bola tura, uzaq o'mir su'redi.
16 Sonlıqtan asa a'dil de, asa dana da bolma. O'zin'di o'zin' qurtıwdın' ne keregi bar?
17 Ha'dden tıs jaman da, aqılsız da bolma. A'jelin' jetpey, o'liwdin' ne keregi bar?
18 Birewin tut, Ekinshisinen de qol u'zbe. Qudaydan qorqqan adam ekewin de basshılıqqa aladı.
19 Danalıq dananı qalanın' on hu'kimdarınan da ku'shlirek qıladı.
20 Jer betinde ba'rqulla jaqsılıq islep, Hesh gu'na qılmay ju'rgen a'dil adam joq.
21 Adamlar aytıp atırg'an ha'mme so'zlerge dıqqat awdara berme, Bolmasa qulın'nın' o'zin'di jamanlap atırg'anın esitip qalıwın' mu'mkin.
22 O'zin'nin' de basqa adamlardı, Ko'p ma'rte jamanlag'anın'dı ishin' biledi.
23 Bulardın' ha'mmesin danalıg'ım menen sınap ko'rdim. O'zime o'zim: «Dana bolaman», – dedim. Biraq danalıq mennen alıs edi.
24 Danalıq degen na'rse, Ju'da' uzaq ha'm ju'da' teren'de. Onı kim taba aladı?
25 Men danalıqtı ha'm barlıqtın' mazmunın izlep tabıwg'a, izertlep, teren' tu'siniwge o'zimdi bag'ıshladım. Jawızlıqtın' aqılsızlıq, aqılsızlıqtın' telbelik ekenin bilmekshi boldım.
26 Ja'ne men mınaday hayaldı o'limnen de ashshı dep taptım: Onın' o'zi – duzaq, ju'regi tor, al qolları kisen. Qudayg'a unamlı bolg'an adam onnan qashadı, Al gu'nakar og'an tutqın boladı.
27 Mine, men mınanı u'yrendim, – deydi Wazshı. – Ko'p na'rseni izertlep, Mınanı tu'sindim:
28 Ju'regim ele izlegen na'rsesin taba almadı: Mın'nan bir haq erkekti taptım, Biraq birde bir haq hayaldı taba almadım.
29 Men tek mına na'rseni an'ladım: Quday adamdı haq etip jarattı, Biraq adamlar ju'da' ko'p nadurıs oy-qıyallarda.
