Wazshı 9 bob
1 Solay etip, bulardın' ha'mmesin u'yrenip, mına juwmaqqa keldim: a'diller, danalar ha'm olar islegen ha'r bir is Qudaydın' qolında. Olardı Quday unata ma, unatpay ma, bunı adam bilmeydi.
2 Ha'r bir adamnın' aqıbeti birdey boladı. A'dil adam menen jawız adamnın' da, jaqsı adam menen jaman adamnın' da, hadal adam menen haram adamnın' da, qurbanlıq beretug'ın adam menen qurbanlıq bermeytug'ın adamnın' da aqıbeti birdey boladı. Jaqsı adamg'a ne bolsa, gu'nakarg'a da sol boladı. Ant ishkenge ne bolsa, ant ishiwden qorqqang'a da sol boladı.
3 Quyash astında bolıp atırg'an islerdin' ha'mmesinin' ishinde qayg'ılısı mınaw: ha'mmenin' ta'g'diri birdey. Adamlardın' ju'regi jawızlıqqa tolg'an ha'm olar o'mir su'rgen da'wirinde aqmaqlıq isleydi. Keyin olar o'lilerdin' janına ketedi.
4 Biraq tiri ju'rgen ha'r bir adam ushın u'mit bar. Awa, o'li arıslannan tiri iyt jaqsı.
5 Tiriler o'letug'ının biledi, Al o'liler hesh na'rseni bilmeydi. Olarg'a artıq sıy joq, Olar endi hesh eske alınbaydı.
6 O'lgenlerdin' su'yispenshiligi, jek ko'riwshiligi, Qızg'anıshları a'lle qashan o'tip ketti. Olar quyash astında bolıp atırg'an na'rselerge, Endi aralasa almaydı.
7 ndi barıp, shadlıq penen nanın'dı jep, quwanısh penen sharabın'dı ish. Quday usı islerin'di maqullaydı.
8 Kiyimlerin'iz ha'rdayım taza bolsın, basın'ızdan a'tir arımasın.
9 Quyash astında Quday o'zin'e bergen qısqasha o'mirin'nin' pu'tkil jumbaqlı ku'nlerin su'yikli hayalın' menen ra'ha'tte o'tker. O'mirden ha'm quyashtın' astında islegen miynetin'nen sag'an berilgen pay usı boladı.
10 Qolın'nan ne na'rse kelse, ha'mmesin bar ku'shin' menen isle. Sen baratug'ın jerde, yag'nıy o'liler ma'kanında jumıs ta, oy-pikir de, bilim de, danalıq ta joq.
11 Quyash astında men ja'ne bir na'rseni ko'rdim: Jarısta ju'yrik, Urısta ku'shli jen'e bermeydi eken. Danag'a – mal-mu'lik, Aqıllıg'a – baylıq, Uqıplıg'a – hu'rmet ba'rqulla nesip ete bermeydi eken. Biraq olardın' ha'mmesi ushın ele waqıt ha'm u'mit bar.
12 Adam o'z waqtın bilmeydi. Torg'a tu'sken balıq ha'm duzaqqa tu'sken qus sıyaqlı, Adam da ku'tilmegende baxıtsızlıqqa ushıraydı.
13 Quyash astında men danalıqtan ja'ne bir mısal ko'rdim. Ol mag'an a'hmiyetli bolıp ko'rindi.
14 İshinde azg'ana adam jasaytug'ın kishkene bir qala bar edi. Ku'shli bir patsha ol jerge kelip, onı qamal qıldı ha'm qalanı basıp alıw ushın, onın' qarsısına u'lken bekinis qurdı.
15 Biraq sol qalada jarlı bolsa da, dana bir adam jasaytug'ın edi. Ol o'z danalıg'ı menen bul qalanı qutqarıp qaldı. Degen menen, keyin bul jarlı adamdı hesh kim eske almadı.
16 Sonda men o'zime o'zim: «Danalıq ku'shten artıq. Biraq jarlı adamnın' danalıg'ına kewil bo'lip, onın' so'zlerin tın'lamaydı eken», – dedim.
17 Dananın' a'lpayım aytqan so'zi, Aqılsızlar ishindegi basshının' baqırıp aytqan so'zlerinen jaqsıraq.
18 Danalıq urıs qurallarınan jaqsıraq, Biraq bir aqılsız ko'p jaqsılıqtı joqqa shıg'aradı.
