İyshaya 31 bob
1 Ja'rdem sorap Mısırg'a ketkenler, Atlarg'a isengenler, Ko'p bolg'anı ushın sawash arbalarına, Ju'da' ku'shli bolg'anı ushın shabandozlarg'a, U'mit baylag'anlar, ha'siret shegedi! Olar İzraildın' Muxaddesine ju'z burmadı, Jaratqan İyeden ken'es soramadı.
2 Biraq Jaratqan İye de dana. Ol baxıtsızlıq jawdırar, O'z so'zin qaytarıp almas. Jawızlıq islewshilerdin' u'yine qarsı ko'terilip, Qılmıskerlerge ja'rdem beriwshilerge qarsı shıg'ar.
3 Mısırlılar – Quday emes, adam, Olardın' atları – ruwx emes, deneden ibarat. Jaratqan İye qolın sozsa, ja'rdem beriwshi su'rnigip, Ja'rdem alıwshı qulap, ekewi de nabıt boladı.
4 Sebebi Jaratqan İye mag'an bılay dedi: «Arıslang'a, awlag'an awının' basında ırıldag'an jas arıslang'a, Bir topar shopan qarsı shıqsa da, Arıslan olardın' baqırg'anınan qorqpaydı, Shuwlasqanınan seskenbeydi. A'lemnin' Jaratqan İyesi de urısıw ushın, Sion tawına ha'm onın' to'belerine tu'sip keledi.
5 Quslardın' qanat jayıp, O'z palapanların qorg'ag'anı sıyaqlı, A'lemnin' Jaratqan İyesi de, Erusalimdi qorg'aydı. Ol onı qorg'aydı, qutqaradı, Rehim etip, azat qıladı».
6 Ha'y izraillılar, o'zlerin'iz o'jetlenip bas tartqan, Jaratqan İyege qaytın'lar.
7 Sebebi sol ku'ni ha'r birin'iz, Gu'nag'a batıp, o'z qolların'ız benen islegen, 1 Gu'mis ha'm altın butların'ızdan ju'z burasız.
8 «Assiriyalılar adamdiki bolmag'an qılıshtan qulaydı, Adamzattiki bolmag'an qılıshtan o'ledi. Olar qılıshtan qashadı, Jas jigitleri qul boladı.
9 Qorqıwdan jıg'ılar olardın' jartası, Sa'rka'rdaları bayraqtı ko'rip, titireser». Otı Sionda, Oshag'ı Erusalimde bolg'an Jaratqan İye usılay deydi.
